லெனோவா அரோரா GK1077 லைட்: 4,000mAh பேட்டரி, ஆர்.ஜி.பி லைட்டிங்குடன் புதிய வயர்லெஸ் கீபோர்டு!

வெறும் ரூ.1,500 விலையில் மினி டிஸ்ப்ளே, ரோட்டரி நாப், 4000mAh பேட்டரி மற்றும் 3 வித இணைப்பு வசதிகளுடன் வெளியானது புதிய லெனோவா அரோரா GK1077 லைட் கீபோர்டு! முழு விவரம் இதோ!

Image Credit : Lenovo

லெனோவா அரோரா GK1077 லைட் கீபோர்டு

லெனோவா நிறுவனம் சீனச் சந்தையில் அரோரா GK1077 லைட் (Aurora GK1077 Lite) என்ற புதிய பட்ஜெட் ரக கீபோர்டை அறிமுகப்படுத்தி உள்ளது. இதன் விலை 129 யுவான் (இந்திய மதிப்பில் சுமார் ரூ.1,500 / $19) என நிர்ணயிக்கப்பட்டுள்ளது. இந்த விலைக் குறைவான மாடலில், பொதுவாக விலை உயர்ந்த பிரீமியம் கீபோர்டுகளில் மட்டுமே காணப்படும் ஸ்டேட்டஸ் டிஸ்ப்ளே திரை, சுழலும் ரோட்டரி நாப் (Rotary knob) மற்றும் மூன்று விதமான இணைப்பு முறைகள் (Tri-mode connectivity) உள்ளிட்ட சிறப்பம்சங்கள் வழங்கப்பட்டுள்ளன.

கச்சிதமான வடிவமைப்பு & தோற்றம்

மேஜையில் அதிக இடம் அடைக்காத வகையில், எண் பலகை (Numpad) மற்றும் சில வழிசெலுத்தல் விசைகள் நீக்கப்பட்ட 77-கீ (70% லேஅவுட்) அமைப்பைக் கொண்டுள்ளது. 332 x 143 x 40.7 மி.மீ அளவும், சுமார் 680 கிராம் எடையும் கொண்டது. அரை-வெளிப்படையான (Translucent), உறைபனி போன்ற மேல்பரப்பு (Frosted cover) மற்றும் வளைந்த விளிம்புகளுடன் கூடிய கட்டமைப்பைப் பெற்றுள்ளது. ஐஸ் மிஸ்ட் ப்ளூ (Ice Mist Blue), மில்க் காஃபி ஆரஞ்சு (Milk Coffee Orange) மற்றும் பீச் பிங்க் (Peach Pink) ஆகிய 3 கண்கவர் பேஸ்டல் வண்ணங்களில் கிடைக்கிறது. செர்ரி புரொஃபைல் (Cherry profile) கொண்ட ஏபிஎஸ் பிளாஸ்டிக்கால் ஆன விசைகள் பயன்படுத்தப்பட்டுள்ளன. கச்சிதமான லேஅவுட்டில் எளிதாகப் பயன்படுத்த 2-ம் நிலைச் செயல்பாடுகளின் குறியீடுகளும் விசைகளில் அச்சிடப்பட்டுள்ளன.

Image Credit : Lenovo

டிஸ்ப்ளே திரை & மல்டி-ஃபங்க்ஷன் நாப் வசதி

கீபோர்டின் மேல் வலது மூலையில் ஒரு சிறிய திரையும் மல்டி-ஃபங்க்ஷன் நாப்பும் அமைக்கப்பட்டுள்ளது. தற்போதைய பேட்டரி சதவீதம், சார்ஜிங் நிலை & பயன்பாட்டில் உள்ள இணைப்பு முறை போன்ற அடிப்படை சிஸ்டம் தகவல்களை இந்தத் திரை காட்டுகிறது.

வழக்கமாக ஒலியளவை (Volume) கட்டுப்படுத்த இதைப் பயன்படுத்தலாம்; ஒலியை அதிகரிக்கவோ குறைக்கவோ சுழற்றலாம், மியூட் (Mute) செய்ய அழுத்தலாம். இதே நாப்பை 3 வினாடிகள் அழுத்திப் பிடித்தால், அது லைட்டிங் பயன்முறைக்கு (Lighting mode) மாறும். இதன் மூலம் ஆர்ஜிபி (RGB) ஒளியின் வெளிச்ச அளவைக் கட்டுப்படுத்தவும், வண்ணங்களை மாற்றவும் முடியும்.

Image Credit : Lenovo

டைப்பிங் அனுபவம் & தொழில்நுட்ப விவரங்கள்

இதில் மெக்கானிக்கல் சுவிட்சுகளுக்குப் பதிலாக, குஷனிங் கட்டமைப்பு கொண்ட சிலிகான் விசைகள் பயன்படுத்தப்பட்டுள்ளன. இது தட்டச்சு செய்யும் போது ஏற்படும் அதிர்வுகளை உள்வாங்கி, சத்தத்தைக் குறைக்கிறது. எனவே, அமைதியான சூழல்களுக்கும் அலுவலகப் பயன்பாட்டிற்கும் இது மிகவும் ஏற்றது. 125Hz போலிங் ரேட் (Polling rate) மற்றும் 26-கீ ரோல்ஓவர் அமைப்பைக் கொண்டுள்ளது. இதன் மூலம் ஒரே நேரத்தில் 26 விசைகளை அழுத்தினாலும் உள்ளீட்டுப் பிழைகள் இன்றித் துல்லியமாகப் பதிவாகும்.

Image Credit : Lenovo

இணைப்பு முறைகள் மற்றும் இயங்குதள ஆதரவு

வயர்டு USB-C, புளூடூத் மற்றும் 2.4GHz வயர்லெஸ் ஆகிய மூன்று இணைப்புகளையும் ஆதரிக்கிறது. புளூடூத் மூலம் ஒரே நேரத்தில் இரண்டு சாதனங்களை இணைக்க முடியும். 2.4GHz USB ரிசீவரை பத்திரமாக வைக்க வலதுபுற கிக்ஸ்டாண்டிற்கு அடியில் ஒரு சிறிய அறை கொடுக்கப்பட்டுள்ளது. விண்டோஸ் (Windows) மற்றும் மேக் (macOS) ஆகிய 2 இயங்குதளங்களிலும் இயங்கும். இவ்விரு தளங்களுக்கு இடையே லேஅவுட்டை மாற்ற பிரத்யேக ஷார்ட்கட்களும் உள்ளன.

பேட்டரி திறன் மற்றும் ஆர்ஜிபி லைட்டிங்

உள்ளமைக்கப்பட்ட 4,000mAh ரீசார்ஜ் செய்யக்கூடிய பேட்டரி இதில் இடம்பெற்றுள்ளது. மேலும், சார்ஜ் ஆகும்போது வெப்பநிலையைக் கண்காணிக்க NTC வெப்பநிலை கண்காணிப்பு அமைப்பும் இணைக்கப்பட்டுள்ளது. 14 முன்னமைக்கப்பட்ட லைட்டிங் எஃபெக்ட்கள் உள்ளன. 'லெனோவா அரோரா' மென்பொருள் மூலம் லைட்டிங்கைத் தனிப்பயனாக்கலாம்; பிற லெனோவா சாதனங்களுடனும் இதை சின்க் (Sync) செய்துகொள்ளலாம்.