உங்க குழந்தை எப்பவும் 'செல்'லையே பார்த்துட்டு இருக்காங்களா? உஷார்! காத்திருக்கும் பேரபாயம்.. பெற்றோரே படியுங்கள்!

Screen Addiction ஸ்மார்ட்போன் போதையிலிருந்து குழந்தைகளை மீட்க வேண்டுமா? 'கேட்ஜெட்களை' ஓரங்கட்டிவிட்டு பழைய விளையாட்டுகளை கையில் எடுங்கள்!

Image Credit : gemini

Screen Addiction

இன்றைய நவீன உலகில், குழந்தைகளின் கைகளில் தவழும் ஸ்மார்ட்போன்கள் அவர்களின் உலகத்தையே சுருக்கிவிட்டன. 1989-ம் ஆண்டு ஐக்கிய நாடுகள் சபை கொண்டுவந்த குழந்தைகள் உரிமைகள் மாநாடு (CRC), குழந்தைகளின் சுதந்திரம், கல்வி மற்றும் ஆரோக்கியத்தை வலியுறுத்தியது. ஆனால், இன்றைய டிஜிட்டல் யுகத்தில், இந்த உரிமைகளைத் தாண்டியும் குடும்பம் மற்றும் சமூகத்தின் 'கடமை' என்பது மிக முக்கியமானதாக மாறியுள்ளது. தொழில்நுட்ப சாதனங்களைச் சார்ந்திருக்காத செயல்பாடுகள் மூலமே குழந்தைகளின் முழுமையான வளர்ச்சியை உறுதி செய்ய முடியும்.

Image Credit : iSTOCK

உரிமைகளும் சமூகத்தின் கடமைகளும்

குழந்தைகளின் பாதுகாப்பில் அரசு, சமூகம் மற்றும் குடும்பத்திற்குப் பெரும் பங்கு உண்டு. அல்காரிதம்களால் தீர்மானிக்கப்படும் இன்றைய விர்ச்சுவல் உலகில், குழந்தை வளர்ப்பு என்பது வெறும் சட்ட ரீதியான விஷயமாக மட்டும் மாறிவிடக்கூடாது. உரிமைகளைப் பற்றிப் பேசும் அதே வேளையில், சமூகக் கடமைகளை நினைவுபடுத்துவது காலத்தின் கட்டாயமாகும். நாம் நமது கடமைகளைச் சரியாகச் செய்யத் தவறினால், அது குழந்தைகளின் எதிர்காலத்தை மோசமாகப் பாதிக்கும்.

Image Credit : Freepik

டிஜிட்டல் உலகில் மூழ்கும் சிறார்கள்

இன்றைய குழந்தைகள் 'டிஜிட்டல் நேட்டிவ்ஸ்' (Digital Natives) என்று அழைக்கப்படுகிறார்கள். பொது இடங்களிலும் சரி, வீட்டிலும் சரி, ஸ்மார்ட்போன்கள், டேப்லெட்டுகள் மற்றும் லேப்டாப்களுடனேயே அவர்கள் நேரத்தைச் செலவிடுகிறார்கள். இணையம் என்பது அவர்களுக்கு பொழுதுபோக்கின் திறவுகோலாகிவிட்டது. இந்தியாவின் இணையப் பயனர்களில் சுமார் 14 சதவீதம் பேர் குழந்தைகள் என்பது குறிப்பிடத்தக்கது. இது அவர்களை நிஜ உலகிலிருந்து பிரித்து, விர்ச்சுவல் உலகிற்குள் தள்ளிவிடுகிறது.

Image Credit : Freepik

கொரோனா காலமும் திரை நேர அதிகரிப்பும்

கோவிட்-19 ஊரடங்கு காலம், குழந்தைகளை ரியல் வேர்ல்டில் இருந்து விர்ச்சுவல் வேர்ல்டிற்கு வெகு வேகமாக மாற்றிவிட்டது. கல்விக்காகத் தொடங்கிய இணையப் பயன்பாடு, இப்போது பொழுதுபோக்கு மற்றும் கேமிங் வரை நீண்டுள்ளது. 2023-ம் ஆண்டின் குழந்தைகள் இணையப் பாதுகாப்பு அறிக்கையின்படி, 6 முதல் 16 வயதுக்குட்பட்ட குழந்தைகள் தினமும் 6 மணி நேரத்திற்கும் மேலாக ஸ்மார்ட்போன்களில் செலவிடுகிறார்கள். இது அவர்களின் உளவியல் மற்றும் சமூகப் பாதுகாப்பைக் கேள்விக்குறியாக்கியுள்ளது.

Image Credit : Getty

அச்சுறுத்தும் சைபர் குற்றங்கள்

குழந்தைகள் அதிக நேரம் ஆன்லைனில் செலவிடுவது, சைபர் குற்றவாளிகளுக்கு எளிதான வாய்ப்பாக அமைகிறது. 2021 மற்றும் 2022-க்கு இடைப்பட்ட காலத்தில் குழந்தைகளுக்கு எதிரான சைபர் குற்றங்கள் 32 சதவீதம் அதிகரித்துள்ளதாக தேசிய குற்ற ஆவணக் காப்பகம் (NCRB) தெரிவிக்கிறது. ஆன்லைன் கேமிங் மற்றும் சேட் ரூம்களில் (Chat rooms) நிலவும் சைபர் புல்லிங் (Cyberbullying) மற்றும் தகாத கருத்துக்கள் குழந்தைகளின் மனநலத்தைப் பெரிதும் பாதிக்கின்றன. வெறும் சட்டப் பாதுகாப்பு மட்டும் இதற்குத் தீர்வாகாது.

Image Credit : Getty

மாற்றத்திற்கான வழி: கதைகளும் களப்பயணங்களும்

தொழில்நுட்பம் சார்ந்த கவலைகளுக்குத் தீர்வு, வெறும் அறிவுரைகள் கூறுவது அல்ல; இன்றைய 'ஸ்மார்ட்' குழந்தைகள் உபதேசங்களைக் கேட்பதில்லை. அதற்குப் பதிலாக, நாம் நமது செயல்கள் மூலம் முன்னுதாரணமாகத் திகழ வேண்டும். தொழில்நுட்பம் இல்லாத பழைய வாழ்க்கை முறைக்கு முழுமையாகத் திரும்ப முடியாவிட்டாலும், கேட்ஜெட்கள் இல்லாத நேரத்தை உருவாக்க முடியும். கதைகள், பாடல்கள், இசை, பாரம்பரிய விளையாட்டுகள் மற்றும் சுற்றுலாக்கள் (Excursions) மூலம் குழந்தைகளை மகிழ்விக்க வேண்டும். இதுவே தொழில்நுட்பத்தால் இயந்திரமாகி வரும் உலகத்தை மீண்டும் மனிதாபிமானமுள்ளதாக மாற்றும் வழியாகும்.