PM-WANI: பப்ளிக் Wi-Fi கனெக்ட் பண்றது இனி ரொம்ப ஈஸி! QR கோட் ஸ்கேன் போதும்! மத்திய அரசு சூப்பர் அப்டேட்!

PM-WANI: இந்தியாவில் இனி பொது இடங்களில் மிக எளிதாக Wi-Fi கனெக்ட் செய்யும் வகையில் மத்திய அரசு சூப்பர் அப்டேட் கொண்டு வந்துள்ளது. இது குறித்து இந்த செய்தியில் பார்க்கலாம். 

Image Credit : AI

பப்ளிக் வைஃபை கனெக்ட் செய்வது இனி எளிது

இந்தியா முழுவதும் பொது இடங்களில் வைஃபை (Wi-Fi) சேவையை எளிதாகவும் பரவலாகவும் கொண்டு சேர்க்கும் நோக்கில், PM-WANI (பிரதமரின் Wi-Fi அணுகல் நெட்வொர்க் இடைமுகம்) திட்டத்தின் கீழ், மத்திய தொலைத்தொடர்புத் துறை சில சூப்பரான புதிய சீர்திருத்தங்களை அறிமுகப்படுத்தியுள்ளது.

மத்திய தகவல் தொடர்பு அமைச்சகம் வெளியிட்டுள்ள அறிக்கையின்படி, இந்த புதிய மாற்றங்கள் பொதுமக்களுக்கு மிகவும் பயனுள்ளதாக இருக்கும் எனத் தெரிகிறது. முக்கியமாக, லேப்டாப் மற்றும் பிற சாதனங்களில் வைஃபை கனெக்ட் செய்ய QR கோட் ஸ்கேன் செய்யும் வசதி, குறைந்த நேரப் பயன்பாட்டிற்கான சிறிய வைஃபை திட்டங்கள், மற்றும் உண்மையான PM-WANI ஹாட்ஸ்பாட்களை எளிதாக அடையாளம் காண தரப்படுத்தப்பட்ட பெயர்கள் ஆகியவை இதில் அடங்கும்.

Image Credit : Google

லேப்டாப்களுடன் எளிதாக இணைக்கலாம்

இந்த புதிய வழிகாட்டுதல்கள், மே 22 அன்று தொலைத்தொடர்புத் துறை வெளியிட்ட சுற்றறிக்கைகள் மூலம் அறிவிக்கப்பட்டுள்ளன. வைஃபை திட்டத்தில் உள்ள அனைத்து பங்குதாரர்களும் இந்த புதிய விதிமுறைகளை எட்டு வாரங்களுக்குள் செயல்படுத்த வேண்டும் என்றும், ஜூலை 2026-க்குள் இந்த மேம்படுத்தப்பட்ட வசதிகள் நாடு முழுவதும் பயன்பாட்டிற்கு வரும் என்றும் அறிவுறுத்தப்பட்டுள்ளது.

இந்தியாவின் டிஜிட்டல் பொது உள்கட்டமைப்பை வலுப்படுத்தவும், 'டிஜிட்டல் இந்தியா' திட்டத்தின் கீழ் குடிமக்களுக்கு மலிவு விலையில் இணைய வசதியை வழங்கவும் அரசு எடுத்துவரும் முயற்சிகளின் ஒரு பகுதியாக இந்த நடவடிக்கை பார்க்கப்படுகிறது. இந்த புதிய மாற்றங்களின்படி, பயனர்கள் தங்கள் ஸ்மார்ட்போன் செயலியில் இருந்து QR கோடை ஸ்கேன் செய்வதன் மூலம், தங்கள் லேப்டாப் மற்றும் பிற சாதனங்களை PM-WANI ஹாட்ஸ்பாட்களுடன் எளிதாக இணைக்க முடியும். இது தேவையற்ற லாகின் சிக்கல்களைக் குறைத்து, பாதுகாப்பான இணைய இணைப்பை வழங்கும் என தொலைத்தொடர்புத் துறை தெரிவித்துள்ளது.

Image Credit : Google

15, 30 மற்றும் 60 நிமிடங்கள் கொண்ட சிறு பிளான்கள்

மேலும், ரயில் நிலையங்கள், மால்கள் மற்றும் பிற பொது இடங்களில் குறிப்பிட்ட நேரம் மட்டும் இன்டர்நெட் தேவைப்படும் பயணிகளுக்காகவும், மாணவர்களுக்காகவும் 15, 30 மற்றும் 60 நிமிடங்கள் கொண்ட 'சாஷே' போன்ற சிறிய திட்டங்களை அறிமுகப்படுத்துமாறு ஹாட்ஸ்பாட் ஆப்ரேட்டர்களுக்கு அறிவுறுத்தப்பட்டுள்ளது. நம்ம ஊரில் சின்னதாக ரீசார்ஜ் செய்வது போல, இந்த பிளான்கள் இருக்கும். இது பயனர்களுக்கு மலிவாக இருப்பதுடன், ஹாட்ஸ்பாட் பயன்பாட்டையும், ஆப்ரேட்டர்களின் வருவாயையும் அதிகரிக்கும் என எதிர்பார்க்கப்படுகிறது.

மற்றொரு முக்கிய சீர்திருத்தமாக, ஹாட்ஸ்பாட்களின் பெயர்கள் (SSIDs) இனி 'PMWANI' என்ற தரப்படுத்தப்பட்ட வடிவத்தில் இருக்கும். இதன் மூலம், பயனர்கள் உண்மையான மற்றும் பாதுகாப்பான பொது Wi-Fi நெட்வொர்க்குகளை எளிதாக அடையாளம் கண்டுகொள்ள முடியும். PM-WANI திட்டத்தின் கீழ் அணுகல் மற்றும் மக்களின் பப்ளிக் நெட்வொர்க் பயன்பாட்டை அதிகரிக்க அரசு முயன்று வரும் நிலையில் இந்த சீர்திருத்தங்கள் வந்துள்ளன.