Phone Lock: பேட்டர்ன் லாக்கா, பின் நம்பரா? உங்கள் போனுக்கு எது அதிக பாதுகாப்பு தெரியுமா?

Phone Lock: மொபைல் போனைப் பாதுகாக்கப் பலரும் பேட்டர்ன் லாக் பயன்படுத்துகிறார்கள்.பேட்டர்ன் லாக், பின் (PIN) எண் ஆகியவற்றில் எது பாதுகாப்பானது? என்பதை பார்க்கலாம்.

Image Credit : AI Generated Image

பேட்டர்ன் லாக்

புதிய ஸ்மார்ட்போன் வாங்கியதும் பலரும் முதலில் செய்வது ஸ்க்ரீன் லாக்கை அமைப்பதுதான். எளிதாக நினைவில் வைத்துக்கொள்ள முடியும் என்பதால் சிலர் பேட்டர்ன் லாக்கையும், மற்றவர்கள் எண் அல்லது எழுத்துகளைக் கொண்ட கடவுச்சொல்லையும் தேர்ந்தெடுக்கிறார்கள். ஆனால், எளிமையாக இருப்பது மட்டுமே பாதுகாப்புக்கு உத்தரவாதம் அல்ல. குறிப்பாக, பொதுமக்கள் அதிகம் கூடும் இடங்களில் போனைத் திறக்கும்போது அருகில் இருப்பவர்கள் உங்கள் விரல் அசைவுகளைக் கவனிக்கலாம். இதனால் நீங்கள் பயன்படுத்தும் பேட்டர்னை அவர்கள் ஊகிப்பதற்கான வாய்ப்பு ஏற்படுகிறது. மேலும், 1234, 0000, பிறந்த தேதி, திருமண நாள் அல்லது குடும்ப உறுப்பினர்களின் பிறந்த நாள் போன்ற எளிதில் கணிக்கக்கூடிய எண்களைப் லாக் ஆகப் பயன்படுத்துவதும் ஆபத்தானது.

Image Credit : chatgpt

லாக்

சமூக வலைத்தளங்களில் பகிரப்படும் தனிப்பட்ட தகவல்களை வைத்து மற்றவர்கள் இத்தகைய எண்களை ஊகிக்கக்கூடும். போன் திருடப்பட்டால், பாதுகாப்பற்ற லாக் ஸ்க்ரீன் உ உங்கள் தனிப்பட்ட படங்கள், செய்திகள் மற்றும் செயலிகளில் உள்ள தகவல்களை அணுகுவதற்கான தடையை பலவீனப்படுத்தலாம். பேட்டர்ன் லாக்கின் பாதுகாப்பு குறித்த ஆய்வு ஒன்றில் கவனிக்கத்தக்க தகவல்கள் வெளியிடப்பட்டுள்ளன. கணினிப் பாதுகாப்பு தொடர்பான ஆய்வுக் கட்டுரையில் விவரிக்கப்பட்ட பரிசோதனையில், பங்கேற்பாளர்கள் போனில் ஆறு இலக்க பின் எண்ணையும் ஆறு புள்ளிகளைக் கொண்ட பேட்டர்னையும் உள்ளிடும் காணொளிகள் காட்டப்பட்டன.

Image Credit : Chatgpt

போன் கடவுச்சொல்

அந்தக் காணொளிகளைப் பார்த்தவர்கள் லாக்கை ஊகிக்க முடியுமா என்பது சோதிக்கப்பட்டது. ஆய்வில், பேட்டர்ன் லாக்கை ஒருமுறை பார்த்த பிறகு 64.2 சதவீதம் பேர் சரியாகக் கண்டறிந்ததாகவும், மீண்டும் பார்க்கும் வாய்ப்பு கிடைத்தபோது இந்த விகிதம் 79.9 சதவீதமாக உயர்ந்ததாகவும் தெரிவிக்கப்பட்டது. இதற்கு மாறாக, ஆறு இலக்க பின் எண்ணை ஒருமுறை பார்த்தவர்கள் 10.8 சதவீதம் பேர் மட்டுமே சரியாகக் கண்டறிந்தனர். மீண்டும் பார்க்கும் வாய்ப்பு வழங்கப்பட்டபோதும் அந்த விகிதம் 26.5 சதவீதத்தைத் தாண்டவில்லை என்று ஆய்வு கூறுகிறது. இந்த முடிவுகள், திரையில் வரையும் கோடுகளைப் பார்ப்பதன் மூலம் பேட்டர்னை ஊகிப்பது சில சூழல்களில் எளிதாக இருக்கலாம் என்பதைச் சுட்டிக்காட்டுகின்றன.

Image Credit : chatgpt

ஸ்மார்ட்போன் பாதுகாப்பு

அப்படியானால், உங்கள் போனுக்குப் பாதுகாப்பான லாக்கை எப்படித் தேர்ந்தெடுப்பது? முதலில், பிறந்த தேதி அல்லது தொடர்ச்சியான எண்கள் போன்ற எளிதில் கணிக்கக்கூடிய பின் எண்களைத் தவிர்க்க வேண்டும். குறைந்தபட்சம் ஆறு இலக்கங்கள் கொண்ட, மற்றவர்கள் ஊகிக்க முடியாத பின் எண்ணைத் தேர்ந்தெடுக்கலாம். உங்கள் போன் அனுமதித்தால், எழுத்துகள், எண்கள் மற்றும் சிறப்புக் குறியீடுகள் கொண்ட வலுவான கடவுச்சொல்லையும் பயன்படுத்தலாம். கைரேகை அல்லது முக அடையாளம் மூலம் போனைத் திறக்கும் வசதிகள் அன்றாடப் பயன்பாட்டை எளிதாக்கும். ஆனால் இவை மட்டும் போதாது. பல மொபைல்களில் கைரேகை அல்லது முக அடையாளத்தை அமைத்திருந்தாலும், ரீஸ்டார்ட் செய்த பிறகு அல்லது குறிப்பிட்ட பாதுகாப்புச் சூழல்களில் பின் அல்லது கடவுச்சொல் கேட்கப்படலாம்.

Image Credit : Gemini AI

முக அடையாளப் பூட்டு

எனவே, மாற்று லாக்கையும் வலுவாக அமைப்பது முக்கியம். பேட்டர்ன் லாக்கைத் தொடர்ந்து பயன்படுத்த விரும்பினால், திரையில் கோடுகள் தெரியும்படி காட்டும் வசதியை செட்டிங்க்ஸ்களில் முடக்கலாம். இது அருகில் இருப்பவர்கள் கோடுகளைக் கவனிப்பதைக் கடினமாக்கலாம். போன் பாதுகாப்பு என்பது லாக் ஸ்க்ரீன் உடன் மட்டும் முடிந்துவிடுவதில்லை. சாப்ட்வேர் அப்டேட்களைத் தொடர்ந்து நிறுவுவது, அதிகாரப்பூர்வ செயலி அங்காடிகளில் இருந்து மட்டுமே செயலிகளைப் பதிவிறக்குவது, தெரியாத இணைப்புகளைத் திறக்காமல் இருப்பது போன்ற பழக்கங்களும் முக்கியம்.

Image Credit : Gemini AI

மொபைல் திரைப் பூட்டு

மேலும், போன் தொலைந்துவிட்டால் அதைத் தொலைவிலிருந்து பூட்டவோ அதன் டேட்டாகளை அழிக்கவோ உதவும் வசதிகளை முன்கூட்டியே அமைத்துக்கொள்ளலாம். வங்கிச் செயலிகள் மற்றும் மின்னஞ்சல் கணக்குகளுக்கு கூடுதல் சரிபார்ப்பு முறைகளைப் பயன்படுத்துவது, ஒரு கடவுச்சொல் கசிந்தாலும் ஏற்படக்கூடிய பாதிப்பைக் குறைக்க உதவும். ஆறு இலக்க பின் என்பது எளிய பேட்டர்னை விடப் பாதுகாப்பான தேர்வாக இருக்கக்கூடும் என்று ஆய்வு காட்டினாலும், எந்தப் பூட்டும் எல்லா ஆபத்துகளிலிருந்தும் முழுமையாகப் பாதுகாக்காது. பாதுகாப்பின் தரம் நீங்கள் தேர்ந்தெடுக்கும் எண் அல்லது கடவுச்சொல், போனின் செட்டிங்க்ஸ்கள் மற்றும் உங்கள் பயன்பாட்டு முறையைப் பொறுத்தது. எனவே, நினைவில் வைத்துக்கொள்ள எளிதானது என்பதற்காக மட்டுமே பலவீனமான லாக்கைத் தேர்ந்தெடுக்காதீர்கள். வலுவான பின் அல்லது கடவுச்சொல், கைரேகை வசதி, புதுப்பிக்கப்பட்ட சாப்ட்வேர் மற்றும் கவனமான பயன்பாடு ஆகியவற்றை ஒன்றாகப் பின்பற்றுவது உங்கள் தனிப்பட்ட தகவல்களைப் பாதுகாக்க உதவும்.