டிஷ், செட்-டாப் பாக்ஸ தூக்கிப்போடுங்க... வெறும் ரூ.199-க்கு 500+ லைவ் டிவி சேனல்கள்; டாடா ப்ளேயின் புதிய ஆப் அறிமுகம்!

டிடிஹெச் சேவையில் முன்னணியில் உள்ள டாடா ப்ளே டிஷ் ஆன்டெனா, செட்-டாப் பாக்ஸ், கேபிள் வயர்கள் எதுவுமின்றி ஸ்மார்ட்டிவிகளில் நேரடியாக 500+ நேரலை சேனல்களைப் பார்க்கும் வகையில் டாடா ப்ளே ஸ்மார்ட் எனும் புதிய இணையவழி ஆப்-ஐ அறிமுகப்படுத்தியுள்ளது.

Image Credit : tata

500+ லைவ் சேனல்களுடன் டாடா ப்ளே ஸ்மார்ட் ஆப்!

பாரம்பரிய டைரக்ட்-டு-ஹோம் (DTH) சேவையில் முன்னணியில் உள்ள டாடா ப்ளே (Tata Play) நிறுவனம், இணைய வழியிலான தனது புதிய ஸ்ட்ரீமிங் தளமான ‘டாடா ப்ளே ஸ்மார்ட்’ (Tata Play Smart) செயலியை அறிமுகப்படுத்தியுள்ளது. இதன் மூலம் டிஷ் ஆன்டெனா, செட்-டாப் பாக்ஸ் அல்லது எந்தவொரு கேபிள் வயர்களும் இல்லாமலேயே, ஸ்மார்ட் டிவிகளில் 500-க்கும் மேற்பட்ட நேரலைத் தொலைக்காட்சி (Live TV) சேனல்களைப் பிராட்பேண்ட் இணையம் வழியாக நேரடியாகப் பார்க்க முடியும். அதே நேரத்தில், இது சாட்டிலைட் வழி DTH சேவையிலிருந்து வெளியேறுவதற்கான முயற்சி அல்ல என்றும், இணையவழி டிவியும் டிடிஹெச்-சும் இணைந்தே வளர்ச்சி அடையும் என்றும் நிறுவனம் தெளிவுபடுத்தியுள்ளது.

Image Credit : tata

DTH சந்தை நிலவரமும் டாடா ப்ளேயின் பங்கும்

இந்தியாவில் கட்டண டிடிஹெச் துறையில் சந்தாதாரர்களின் எண்ணிக்கை தொடர்ந்து சரிவைச் சந்தித்து வரும் சூழலில் இந்த அறிமுகம் நிகழ்ந்துள்ளது. இந்தியத் தொலைத்தொடர்பு ஒழுங்குமுறை ஆணையத்தின் (TRAI) ஏப்ரல்–ஜூன் காலாண்டு அறிக்கையின்படி, ஜூன் 30, 2026 நிலவரப்படி இந்தியாவின் 4 முன்னணி கட்டண டிடிஹெச் நிறுவனங்களின் மொத்த சந்தாதாரர் எண்ணிக்கை ஆண்டுக்கு ஆண்டு 13.4% குறைந்து 4.85 கோடியாகச் சரிந்துள்ளது (முந்தைய ஆண்டு இது 5.60 கோடியாக இருந்தது).

டாடா ப்ளே முதலிடம்: சந்தாதாரர் எண்ணிக்கை குறைந்தாலும், 1.48 கோடி சந்தாதாரர்களுடனும் 30.56% சந்தைப் பங்குடனும் டாடா ப்ளே நாட்டின் மிகப்பெரிய கட்டண டிடிஹெச் நிறுவனமாகத் தொடர்ந்து நீடிக்கிறது. இதற்கு அடுத்தடுத்த இடங்களில் பாரதி டெலிமீடியா (1.35 கோடி), சன் டைரக்ட் (1.09 கோடி) மற்றும் டிஷ் டிவி இந்தியா (92.1 லட்சம்) ஆகியவை உள்ளன. (இக்கணக்கீட்டில் பிரசார் பாரதியின் இலவச 'டிடி ஃப்ரீ டிஷ்' சேவை சேர்க்கப்படவில்லை).

Image Credit : tata

டாடா ப்ளே ஸ்மார்ட் – சிறப்பம்சங்கள் என்னென்ன?

பாரம்பரிய டிடிஹெச்-இல் சேனல்களை மாற்றிப் பார்க்கும் அதே பழக்கப்பட்ட அனுபவத்தை ஸ்மார்ட் டிவிகளில் கொண்டுவரும் வகையில் இந்த ஆப் வடிவமைக்கப்பட்டுள்ளது. ஸ்மார்ட் டிவியில் வழக்கம் போல் சேனல் எண்கள், நிகழ்ச்சிகளின் கால அட்டவணை (Programme Guide) மற்றும் ரிமோட் மூலம் எளிதாகக் கட்டுப்படுத்தும் வசதிகள் இதில் இடம்பெற்றுள்ளன. தொலைக்காட்சிகளில் நேரலையாக ஒளிபரப்பான சில குறிப்பிட்ட நிகழ்ச்சிகளை, ஒளிபரப்பாளர் அனுமதியைப் பொறுத்து தவறவிட்டவர்கள் மீண்டும் பார்க்கும் வசதியும் உண்டு.

பிராட்பேண்ட் இணைய இணைப்பு மூலம் சாம்சங் (Samsung), ஆண்ட்ராய்டு டிவி (Android TV), கூகுள் டிவி (Google TV), விடா (VIDAA) மற்றும் ஃபயர் டிவி (Fire TV) ஆகியவற்றின் ஆப் ஸ்டோர்களில் இருந்து இந்த செயலியைப் பதிவிறக்கலாம். மேலும் ஆண்ட்ராய்டு மற்றும் ஐஓஎஸ் (iOS) இயங்குதளங்களைக் கொண்ட ஸ்மார்ட்போன்கள், டேப்லெட்டுகள் மற்றும் மடிக்கணினிகளிலும் இதைப் பயன்படுத்த முடியும். தற்போது டிடிஹெச் அல்லது கேபிள் இணைப்பு இல்லாதவர்கள் கூட இந்தச் செயலியைத் தனித்துப் பதிவிறக்கம் செய்து பயன்படுத்தலாம்.

Image Credit : tata

கட்டண விவரங்கள் என்ன?

ஒரு வீட்டிற்கு மாதக் குறைந்தபட்சக் கட்டணமாக ரூ. 199 நிர்ணயிக்கப்பட்டுள்ளது (முதல் மொழிக்கு). கூடுதல் மொழிகளைத் தேர்வு செய்ய விரும்பினால், ஒவ்வொரு கூடுதல் மொழிக்கும் மாதம் ரூ. 99 வசூலிக்கப்படும். பெரிய ஸ்கிரீனில் நேரலை விளையாட்டுப் போட்டிகள், செய்திகள் மற்றும் தினசரி தொடர்களை டிஷ் ஆன்டெனா தொந்தரவு இன்றிப் பார்க்க விரும்பும் நகரப்புற பிராட்பேண்ட் பயனர்களைக் குறிவைத்து இந்தத் திட்டம் அறிமுகம் செய்யப்பட்டுள்ளது.