Mobile Price Hike: மொபைல், லேப்டாப் விலை கிடுகிடுன்னு ஏறப்போகுது! காரணம் என்ன தெரியுமா?

Mobile Price Hike: நீங்கள் புதிய ஸ்மார்ட்போன் அல்லது லேப்டாப் வாங்க திட்டமிட்டிருந்தால், இந்த செய்தி உங்களுக்குத்தான். ஏன் என்றால் மொபைல் மற்றும் லேப்டாப் விலைகள் உயர வாய்ப்புள்ளது. இதன் பின்னணி காரணம் குறித்து இந்த செய்தியில் விரிவாக பார்ப்போம்.

Image Credit : AI

மொபைல், லேப்டாப் விலை உயர போகுது

இப்போது உலகெங்கும் ஆர்ட்டிஃபிஷியல் இன்டலிஜென்ஸ், அதாவது AI-யின் பயன்பாடு ஜெட் வேகத்தில் வளர்ந்து வருகிறது. இதன் தாக்கம் இப்போது சாமானிய மக்களின் பாக்கெட்டையும் பதம் பார்க்கப் போகிறது. ஸ்மார்ட்போன்கள், லேப்டாப்கள், டேப்லெட்டுகள் போன்ற எலக்ட்ரானிக் பொருட்களின் விலை வரும் காலங்களில் அதிகரிக்கலாம். இதற்கு சில முக்கிய காரணங்கள் உள்ளன. அது என்னவென்று விரிவாகப் பார்ப்போம்.

AI நிறுவனங்களின் சிப் கொள்முதல்

சாட்பாட்கள் மற்றும் பல்வேறு AI மாடல்களுக்கு பயிற்சி அளிக்க, அதிக அளவில் டேட்டா ஸ்டோரேஜ் மற்றும் பிராசசிங் தேவைப்படுகிறது. இதற்காக AI துறையில் உள்ள நிறுவனங்கள், மெமரி மற்றும் ஸ்டோரேஜ் சிப்களை வாங்குகின்றன. இந்த சிப்களை முக்கியமாக சாம்சங் (Samsung), எஸ்.கே. ஹைனிக்ஸ் (SK Hynix) மற்றும் மைக்ரான் (Micron) ஆகிய மூன்று நிறுவனங்கள்தான் தயாரிக்கின்றன. AI நிறுவனங்களின் இந்த அதிகப்படியான தேவையால், சாதாரண எலக்ட்ரானிக் சாதனங்களுக்குத் தேவையான சிப்களுக்கு தட்டுப்பாடு ஏற்பட்டுள்ளது. இதனால், அவற்றின் விலையும் கடுமையாக உயர்ந்துள்ளது.

Image Credit : Getty

Apple கொடுத்த விலை உயர்வு சிக்னல்

Apple நிறுவனத்தின் தலைமைச் செயல் அதிகாரி டிம் குக், சமீபத்தில் அளித்த பேட்டி ஒன்றில், வரவிருக்கும் மேக்புக், ஐபோன் மற்றும் ஐபேட் ஆகியவற்றின் விலைகள் அதிகரிக்க வாய்ப்புள்ளது என்று சூசகமாகத் தெரிவித்துள்ளார். கடந்த ஆண்டுகளுடன் ஒப்பிடும்போது, மெமரி சிப்களின் விலை நான்கு மடங்கு அதிகரித்துள்ளதாக அவர் குறிப்பிட்டார். டேட்டா சென்டர்களில் பயன்படுத்தப்படும் ஒரு சிப்பின் விலை 350 டாலரிலிருந்து 1300 டாலர் வரை உயர்ந்துள்ளதாகவும் டிம் குக் கூறியுள்ளார்.

Image Credit : Google

Oppo, Vivo, Samsung போன்களும் தப்பாது

ஒரு ஸ்மார்ட்போனைத் தயாரிக்கும் செலவில், மெமரி சிப்களின் பங்கு மட்டும் சுமார் 8 முதல் 12 சதவீதம் வரை இருக்கும். நவம்பர் 2025 முதல் ஸ்மார்ட்போன்களின் விலை தொடர்ந்து அதிகரித்து வருகிறது. சில மாடல்களின் விலை இரண்டு மடங்காக உயர்ந்துள்ளது. Oppo மற்றும் Vivo நிறுவனங்கள் இந்தியாவில் தொடர்ந்து புதிய ஸ்மார்ட்போன்களை அறிமுகப்படுத்தி வருகின்றன. இது தவிர, சாம்சங்கின் வரவிருக்கும் ஃபோல்டபிள் ஸ்மார்ட்போனின் விலையும் அதிகரிக்க வாய்ப்புள்ளது.

ரூபாய் மதிப்பு சரிவின் தாக்கம்

இந்தியாவில் இந்த சிப்கள் டாலர் மூலம்தான் வாங்கப்படுகின்றன. டாலருக்கு நிகரான இந்திய ரூபாயின் மதிப்பு சரிந்து வருவதால், நிறுவனங்களின் இறக்குமதிச் செலவு அதிகரிக்கிறது. இந்த கூடுதல் சுமை, இறுதியில் நுகர்வோரான நம் மீதுதான் சுமத்தப்படும். இதனால், ஸ்மார்ட்போன், லேப்டாப் மற்றும் பிற எலக்ட்ரானிக் பொருட்களை வாங்க இனி அதிக பணம் செலவழிக்க வேண்டியிருக்கும்.