ஒரே மேடையில் ஸ்டாலின், இ.பி.எஸ், சீமான், திருமா: சேலத்தைக் கலக்கிய வி.ஐ.பி திருமணம்; யார் இந்த திரிவேணி?

சேலத்தில் பிரம்மாண்ட அரண்மனை செட்டில் நடந்த தொழிலதிபர் வீட்டுத் திருமணம்.அரசியல் எல்லைகளைக் கடந்து ஸ்டாலின், எடப்பாடி பழனிசாமி, நயினார் நாகேந்திரன், சீமான், திருமாவளவன், அண்ணாமலை உள்ளிட்டோர் நேரில் பங்கேற்றனர்.

Image Credit : x

சேலத்தைக் கலக்கிய வி.ஐ.பி திருமணம்; யார் இந்த திரிவேணி?

சேலம் மாவட்டம் ஓமலூர் அருகே முன்னணித் தொழிலதிபர் இல்லத் திருமண வரவேற்பு விழா நேற்று மிக விமரிசையாக நடைபெற்றது. தமிழக மற்றும் இந்திய அளவில் பெரும் கவனத்தைப் பெற்றுள்ள இந்த விழாவில், பல்வேறு அரசியல் கட்சிகளின் முக்கியத் தலைவர்கள், மக்கள் பிரதிநிதிகள், அமைச்சர்கள் மற்றும் முன்னணித் திரை நட்சத்திரங்கள் நேரில் கலந்துகொண்டு மணமக்களை வாழ்த்தினர்.

Image Credit : salem mrg triveni

அரசியல் தலைவர்கள், திரை நட்சத்திரங்கள் சங்கமம்!

இவ்விழாவில் முன்னாள் முதலமைச்சர்கள் மு.க.ஸ்டாலின் (மனைவி துர்கா ஸ்டாலினுடன்), எடப்பாடி பழனிசாமி, திமுக நாடாளுமன்ற உறுப்பினர் கனிமொழி, பாரதிய ஜனதா கட்சியின் நயினார் நாகேந்திரன், அண்ணாமலை, நாம் தமிழர் கட்சியின் தலைமை ஒருங்கிணைப்பாளர் சீமான், விடுதலைச் சிறுத்தைகள் கட்சியின் தலைவர் தொல். திருமாவளவன், மதிமுக நாடாளுமன்ற உறுப்பினர் துரை வைகோ உள்ளிட்ட பல்வேறு அரசியல் தலைவர்கள் பங்கேற்றனர். மேலும், மத்திய மற்றும் மாநில அரசுகளின் மக்கள் பிரதிநிதிகள், அமைச்சர்கள், நாட்டின் பல பகுதிகளில் இருந்தும் தொழிலதிபர்கள் மற்றும் வி.ஐ.பி, வி.வி.ஐ.பி-க்கள் பெருமளவில் குவிந்தனர். முன்னதாக, முதல்வர் விஜய் இந்நிகழ்வில் பங்கேற்பார் எனத் தகவல் வெளியான நிலையில், அவரது வருகை கடைசி நேரத்தில் ரத்தானது.

அதேபோல் திரையுலகில் முன்னணி நடிகர்களான சூர்யா, கார்த்தி, சிவகார்த்திகேயன் மற்றும் லைகா நிறுவன நிர்வாகிகள் உள்ளிட்ட திரைத்துறை சார்ந்த பிரபலங்களும் நேரில் கலந்துகொண்டு சிறப்பித்தனர்.

Image Credit : x

யார் இந்த திரிவேணி? தொழில் சாம்ராஜ்யம்

சேலத்தைத் தலைமையிடமாகக் கொண்டு இயங்கி வரும் 'திரிவேணி எர்த்மூவர்ஸ்' நிறுவனம், சுரங்கத் துறையில் நாட்டின் முன்னணி நிறுவனங்களில் ஒன்றாகத் திகழ்கிறது. இந்நிறுவனத்தை பி. பிரபாகரன் தலைமையேற்று நடத்தி வருகிறார். 1991-ல் தொடங்கப்பட்டு (நிறுவனத் தகவலின் படி 1993-ல் ஒரு எக்ஸ்கவேட்டருடன் தொழில் பயணம் தொடங்கி), தற்போது ஒடிசா, ஜார்க்கண்ட், சத்தீஸ்கர் ஆகிய முக்கியத் தாது வளம் கொழிக்கும் மாநிலங்களில் உள்ள பெரிய சுரங்கங்களை நிர்வகிக்கும் அளவிற்குப் பிரம்மாண்ட வளர்ச்சி அடைந்துள்ளது. மேலும் இந்தோனேசியா, தென்னாப்பிரிக்கா உள்ளிட்ட சில ஆப்பிரிக்க நாடுகளிலும் சுரங்கத் தொழிலை இந்நிறுவனம் விரிவுபடுத்தியுள்ளது.

இக்குழுமத்தின் நிர்வாக இயக்குநர் பி. பிரபாகரனின் மகனுக்கும், மும்பையைச் சேர்ந்த பிரபல இரும்பு மற்றும் தாது உற்பத்தி நிறுவனமான 'லாயிட்ஸ் மெட்டல்ஸ்' அதிபரின் மகளுக்கும் இடையே இத்திருமணம் நடந்துள்ளது. இரு குடும்பங்களுக்கும் இந்திய அளவில் அரசியல் மற்றும் அதிகார மட்டத்தில் மிக நெருங்கிய தொடர்பு உள்ளது.

Image Credit : x

அரசியல் கட்சிகளுடனான தொடர்பு மற்றும் தேர்தல் நிதி

திரிவேணி குழுமம் கடந்த காலங்களிலும் அரசியல் தொடர்புகளால் செய்திகளில் இடம்பிடித்துள்ளது. ஒடிசாவின் கியோஞ்சர் பகுதியில் சுரங்கப் பணிகளில் ஈடுபட்டிருந்தபோது, பிரபாகரனுக்கு அப்போதைய ஆளும் பிஜு ஜனதா தளத்தின் மூத்த தலைவர்களின் ஆதரவு மற்றும் அரசியல் தொடர்பு இருந்ததாக பாஜக செய்தித் தொடர்பாளர் குற்றம்சாட்டியதை 2012-ல் 'டைம்ஸ் ஆஃப் இந்தியா' வெளியிட்டிருந்தது.மேலும், தேர்தல் பத்திரங்கள் வாயிலாக இந்நிறுவனம் பாஜகவுக்கு ரூ.5 கோடியும், திமுகவுக்கு ரூ.3 கோடியும் நிதி வழங்கியிருப்பது பதிவாகியுள்ளது. அதேபோல், பிஜு ஜனதா தளத்திற்கும் நிதி அளித்துள்ளது.

இதுதவிர, அதிமுகவின் 2024-25 நிதியாண்டு நன்கொடை பதிவேட்டின்படி, ஏப்ரல் 2024-ல் முறையே ரூ.2 கோடி, ரூ.2 கோடி, ரூ.1 கோடி என மொத்தம் ரூ.5 கோடியை இந்நிறுவனம் வழங்கியுள்ளது. இதன்மூலம், குறிப்பிட்ட ஒரு கட்சியுடன் மட்டுமின்றி அனைத்து முக்கிய அரசியல் கட்சிகளுடனும் பரந்த சமூக மற்றும் நிதித் தொடர்புகளைக் கொண்ட நிறுவனமாக இது விளங்கி வருகிறது.

இத்திருமணத்திற்காகச் சேலம் பிருந்தாவன் மைதானத்தில் பல ஏக்கர் பரப்பளவில் பிரம்மாண்டமான அரண்மனை வடிவிலான செட் அமைக்கப்பட்டிருந்தது. நாட்டின் முக்கிய வி.ஐ.பி-க்கள் நேரில் வர வசதியாகப் பிரத்யேகமாக ஹெலிபேட் வசதிகளும் செய்யப்பட்டு இருந்தன. விழாவில் பங்கேற்ற விருந்தினர்களுக்கு நூற்றுக்கணக்கான உணவு வகைகள் பரிமாறப்பட்டு, திருமண விழா கோலாகலமாக நடந்து முடிந்துள்ளது.