IPL 2023: ரஜத் பட்டிதார், ரீஸ் டாப்ளிக்கு மாற்று வீரர்களை அறிவித்தது ஆர்சிபி

ஐபிஎல் 16வது சீசனிலிருந்து காயத்தால் விலகிய ரஜத் பட்டிதார் மற்றும் ரீஸ் டாப்ளி ஆகிய இருவருக்கும் மாற்று வீரர்களை அறிவித்துள்ளது ஆர்சிபி அணி. 

ஐபிஎல் 16வது சீசன் விறுவிறுப்பாக நடந்துவருகிறது. வழக்கம்போலவே இந்த சீசனிலும் முதல் முறையாக கோப்பையை வெல்லும் முனைப்பில் களமிறங்கியுள்ள ஆர்சிபி அணி முதல் போட்டியில் மும்பை இந்தியன்ஸுக்கு எதிராக அபாரமாக ஆடி வெற்றி பெற்றது. 

ஆனால் 2வது போட்டியில் கேகேஆரிடம் படுதோல்வி அடைந்தது. விராட் கோலி மற்றும் ஃபாஃப் டுப்ளெசிஸ் ஆகிய இருவரையும் பேட்டிங்கில் அதிகமாக சார்ந்திருப்பதே இந்த தோல்விக்கு காரணம். அவர்கள் இருவரும் நன்றாக ஆடியதால் மும்பை இந்தியன்ஸை வீழ்த்திய ஆர்சிபி அணி, அவர்கள் இருவரும் பவர்ப்ளேயில் ஆட்டமிழந்ததால், அடுத்த 80 ரன்களுக்கு அனைத்து விக்கெட்டுகளையும் இழந்து கேகேஆரிடம் படுதோல்வி அடைந்தது. 

அதற்கு காரணம் ரஜத் பட்டிதார் காயத்தால் இந்த சீசனிலிருந்து விலகியதால் மிடில் ஆர்டர் பலவீனமடைந்ததுதான். ரஜத் பட்டிதார் காயத்தால் இந்த சீசனிலிருந்து விலகினார். ஆஸ்திரேலிய ஃபாஸ்ட் பவுலர் ஜோஷ் ஹேசில்வுட் காயம் காரணமாக முதல் பாதி சீசனிலிருந்து விலகினார். 

அவரது இடத்தை நிரப்புவார் என்று எதிர்பார்க்கப்பட்ட இங்கிலாந்து ஃபாஸ்ட் பவுலர் ரீஸ் டாப்ளியும் முதல் போட்டியிலேயே காயமடைந்து இந்த தொடரைவிட்டு விலகினார். 

இதையடுத்து இவர்கள் இருவருக்கும் மாற்று வீரர்கள் அறிவிக்கப்பட்டுள்ளனர். ரீஸ் டாப்ளிக்கு மாற்றாக தென்னாப்பிரிக்க ஃபாஸ்ட் பவுலிங் ஆல்ரவுண்டர் வைன் பார்னெல் ஒப்பந்தம் செய்யப்பட்டுள்ளார். வைன் பார்னெல் சர்வதேச கிரிக்கெட்டில் 6 டெஸ்ட், 73 ஒருநாள் மற்றும் 56 டி20 போட்டிகளில் ஆடியுள்ளார். ஐபிஎல்லில் 26 போட்டிகளில் ஆடி 26 விக்கெட் வீழ்த்தியுள்ளார். சர்வதேச கிரிக்கெட் மற்றும் ஐபிஎல்லில் நல்ல அனுபவம் கொண்ட பார்னெலை ரூ.75 லட்சத்துக்கு ஒப்பந்தம் செய்துள்ளது ஆர்சிபி அணி.. பேட்ஸ்மேனான ரஜத் பட்டிதாருக்கு மாற்றாக  ஃபாஸ்ட் பவுலரான வைஷாக் விஜய் குமார் ஒப்பந்தம் செய்யப்பட்டுள்ளார்.