Fridge : ஃபிரிட்ஜில் கூலிங் நிக்கமாட்டேங்குதா? ரூபாய் நோட்டை வச்சு என்ன பிரச்சனைனு ஈஸியா கண்டுபிடிக்கலாம்...!

Fridge Cleaning Tips : உங்க வீட்டு ஃபிரிட்ஜ் எவ்வளவு நேரம் ஓடினாலும் அதில் கூலிங் நிற்பதில்லையா, உடனே ரூபாய் நோட்டை வச்சு இந்த ஒரு டெஸ்டை பண்ணிப்பாருங்க.

Image Credit : grok AI

Fridge Cleaning Tips

வீட்டில் பயன்படுத்தும் ஃப்ரிட்ஜை அவ்வப்போது சுத்தம் செய்வது நம்மில் பலருக்கும் வழக்கமான விஷயம்தான். அதில் இருக்கும் பழைய உணவுகள், காய்கறிகள், பால் பொருட்கள் உள்ளிட்டவற்றை அகற்றி, உள்ளே இருக்கும் தட்டுகள் மற்றும் பகுதிகளைத் துடைத்து சுத்தமாக வைத்திருப்போம். ஆனால், ஃப்ரிட்ஜின் செயல்பாட்டில் மிகவும் முக்கியமான ஒரு பகுதியை பெரும்பாலும் கவனிக்காமல் விட்டுவிடுகிறோம். அது ஃப்ரிட்ஜ் கதவைச் சுற்றியுள்ள ரப்பர் சீல்.

ஃப்ரிட்ஜ் கதவு சரியாக மூடப்படுவதற்கு இந்த ரப்பர் பட்டை முக்கியப் பங்கு வகிக்கிறது. ஃப்ரிட்ஜுக்குள் இருக்கும் குளிர்ந்த காற்று வெளியேறாமல் இருப்பதுடன், வெளிப்புற வெப்பக்காற்று உள்ளே புகுவதையும் இது தடுக்கிறது. எனவே, ரப்பர் சீல் சுத்தமாகவும் நல்ல நிலையில் இருப்பதும் அவசியம்.

Image Credit : AI

அழுக்கு சேர்ந்தால் என்ன ஆகும்?

காலப்போக்கில் ரப்பர் சீலின் மடிப்புகள் மற்றும் இடுக்குகளில் உணவுத் துகள்கள், தூசி, எண்ணெய் பிசுக்கு மற்றும் ஈரப்பதம் தேங்க வாய்ப்புள்ளது. இதை நீண்ட நாட்கள் சுத்தம் செய்யாமல் விட்டால், அங்கு பூஞ்சை உருவாகி கருமையான கறைகள் தோன்றலாம். மேலும், தொடர்ந்து அழுக்கு படிவதால் ரப்பரின் நெகிழ்வுத்தன்மை குறைந்து, அது தளர்வடையவோ அல்லது வெடிக்கவோ வாய்ப்புள்ளது. இதனால் கதவு முழுமையாக மூடப்படாமல் போகலாம்.

கதவு சரியாக மூடாத நிலையில் ஃப்ரிட்ஜுக்குள் இருக்கும் குளிர் வெளியேறுவதால், குளிரூட்டும் அமைப்பு அதிக நேரம் இயங்க வேண்டிய நிலை ஏற்படும். இதன் காரணமாக மின்சாரப் பயன்பாடு அதிகரிப்பதுடன், உணவுப் பொருட்களும் வழக்கத்தைவிட விரைவாக கெட்டுப்போகும் வாய்ப்பு உள்ளது. ரப்பர் சீலை சுத்தம் செய்வதற்கு விலை உயர்ந்த துப்புரவு பொருட்கள் அவசியமில்லை. வீட்டிலேயே கிடைக்கும் சில பொருட்களை வைத்து இதை எளிமையாகச் செய்யலாம்.

Image Credit : X

சுத்தம் செய்ய தேவைப்படுவது என்ன?

2 கப் மிதமான சுடுநீர்; பேக்கிங் சோடா 2 தேக்கரண்டி எடுத்துக்கோங்க. பழைய பல் துலக்கும் பிரஷ் மற்றும் மென்மையான துணி எடுத்துக்கொள்ளுங்கள். தேவைப்பட்டால் சிறிதளவு பாத்திரம் கழுவும் லிக்விட் எடுத்துக்கோங்க. முதலில் ஒரு பாத்திரத்தில் மிதமான சுடுநீரை எடுத்துக்கொண்டு அதில் பேக்கிங் சோடாவை நன்றாகக் கலக்க வேண்டும். அழுக்கு அதிகமாக இருந்தால், சிறிதளவு பாத்திரம் கழுவும் லிக்விடையும் சேர்த்துக்கொள்ளலாம்.

பின்னர் பழைய பல் துலக்கும் பிரஷ்ஷை அந்தக் கலவையில் நனைத்து, ரப்பர் சீலின் மடிப்புகள் மற்றும் இடுக்குகளில் மெதுவாகத் தேய்க்க வேண்டும். குறிப்பாக அழுக்கு மற்றும் கரும்புள்ளிகள் இருக்கும் பகுதிகளில் கவனம் செலுத்துவது நல்லது. தேய்த்து முடித்த பிறகு, சுத்தமான ஈரத்துணியால் ரப்பர் முழுவதையும் நன்றாகத் துடைக்க வேண்டும். அதன்பிறகு காய்ந்த மென்மையான துணியால் மீண்டும் துடைத்து ஈரம் எதுவும் இல்லாமல் பார்த்துக்கொள்ள வேண்டும். ஈரப்பதம் நீண்ட நேரம் இருப்பதைத் தவிர்ப்பது முக்கியம்.

Image Credit : X

ரப்பர் சீல் மாற்ற வேண்டுமா?

உங்கள் ஃப்ரிட்ஜின் ரப்பர் சீல் சரியாக செயல்படுகிறதா என்பதை வீட்டிலேயே ஒரு எளிய முறையில் சோதிக்கலாம். ரூபாய் நோட்டை கதவுக்கும் ரப்பர் சீலுக்கும் இடையில் வைத்து ஃப்ரிட்ஜ் கதவை மூடுங்கள். பின்னர் அந்த நோட்டை வெளியே இழுத்துப் பாருங்கள்.

நோட்டை இழுக்கும்போது இறுக்கமாக இருப்பது, கதவு மற்றும் சீலுக்கு இடையே நல்ல பிடிப்பு இருப்பதைக் காட்டும். ஆனால், எந்தவித எதிர்ப்பும் இல்லாமல் நோட்டு எளிதாக வெளியே வந்தால், ரப்பர் சீல் தளர்ந்திருக்கலாம். அப்படியான நிலையில் சீலை பரிசோதித்து, தேவைப்பட்டால் மாற்றுவது குறித்து பரிசீலிக்கலாம்.

Image Credit : X

எந்த கிளீனர்களை தவிர்க்க வேண்டும்?

ரப்பர் சீலை சுத்தம் செய்யும்போது கடுமையான ரசாயனங்களை பயன்படுத்துவதில் கவனம் தேவை. குறிப்பாக பிளீச் அல்லது அமோனியா கலந்த துப்புரவு திரவங்களை பயன்படுத்துவது ரப்பரின் தன்மையை பாதிக்கக்கூடும். வினிகரை பயன்படுத்த விரும்பினால், அதை நேரடியாகப் பயன்படுத்தாமல் தண்ணீரில் கலந்து பயன்படுத்துவது நல்லது.

எந்த துப்புரவு முறையைப் பயன்படுத்தினாலும், இறுதியில் ரப்பர் சீலை நன்றாகத் துடைத்து உலர்த்துவது அவசியம். ஃப்ரிட்ஜை சுத்தம் செய்யும்போது உள்ளே இருக்கும் தட்டுகளை மட்டும் கவனிப்பதைவிட, கதவைச் சுற்றியுள்ள இந்த சிறிய ரப்பர் சீலையும் அவ்வப்போது பராமரிப்பது ஃப்ரிட்ஜின் கதவு சரியாக மூடப்படுவதற்கும் அதன் செயல்பாட்டை சீராக வைத்திருப்பதற்கும் உதவும்.