எந்த position இல் படுத்து தூங்குவது ஆரோக்கியமானது தெரியுமா?
ஒவ்வொருவரும் தூங்கும் விதம் என்பது மாறுப்பட்டு இருக்கும்.சிலருக்கு நேரமாக படுத்தால் தான் தூக்கம் வரும்,சிலருக்கோ ஒரு பக்கமாக திரும்பி படுத்தால் தான் தூக்கம் வரும்.தூக்கம் வருவதை விட எந்த முறையில் படுத்தால் ஆரோக்கியத்திற்கு நல்லது என்பது முக்கியம்.
நிமிர்ந்து படுப்பது :
நிமிர்ந்து படுப்பது முதுகுத்தண்டுக்கு சிறந்த நிலை என்று நிபுணர்கள் கூறுகிறார்கள். இந்த நிலையில் படுக்கும்போது, நமது முதுகுத்தண்டு இயற்கையான வளைவுடன் இருக்கும், இதனால் கழுத்து மற்றும் முதுகுவலி குறையும். மேலும், தலையணையை சரியாக வைத்து படுத்தால், நமது சுவாச மண்டலம் சீராக இயங்கும், இதனால் மூச்சுத் திணறல் போன்ற பிரச்சனைகள் ஏற்படாது. ஆனால், நிமிர்ந்து படுக்கும்போது சிலருக்கு குறட்டைப் பிரச்சனை அதிகமாகும். நாக்கு மற்றும் தொண்டையின் தசைகள் தளர்ந்து, சுவாசப் பாதையை அடைப்பதால் இது ஏற்படுகிறது. மேலும், தூக்கத்தின்போது ஏற்படும் மூச்சுத்திணறல் உள்ளவர்களுக்கு இந்த நிலை சிறந்ததல்ல.
ஒருக்களித்து படுப்பது :
ஒருக்களித்து படுப்பது, அதாவது பக்கவாட்டில் படுப்பது, பெரும்பாலானோரால் விரும்பப்படும் ஒரு தூங்கும் நிலை. இந்நிலையில் தூங்கும் போது நாக்கு மற்றும் தொண்டையின் தசைகள் சுவாசப் பாதையை அடைக்காமல் இருப்பதால் குறட்டை குறைகிறது. மூளைக்குச் செல்லும் கழிவுப்பொருட்களை நீக்குவதில் இந்த நிலை சிறப்பாகச் செயல்படுவதாக சில ஆய்வுகள் கூறுகின்றன.ஆனால், ஒரே பக்கமாக நீண்ட நேரம் படுக்கும்போது, அந்தப் பக்கத்தில் உள்ள தோள்பட்டை, கை, மற்றும் இடுப்புப் பகுதியில் அழுத்தம் அதிகமாகி, வலி ஏற்பட வாய்ப்புள்ளது. நமது முகம் தலையணையில் அழுந்தும்போது, சிலருக்கு முகச் சுருக்கங்கள் ஏற்படலாம். மேலும், ஒருக்களித்து படுக்கும்போது, கழுத்தின் வளைவை சீராகப் பராமரிக்க சரியான தலையணை அவசியமாகிறது.
கர்ப்பிணிப் பெண்களுக்கு எது சிறந்தது?
கர்ப்பிணிப் பெண்களுக்கு ஒருக்களித்து படுப்பதுதான் சிறந்த நிலை. இடதுபக்கமாக படுப்பதன் மூலம், தாயின் கல்லீரலில் அழுத்தம் குறைந்து, சிறுநீரகங்கள் சிறப்பாக செயல்படுகின்றன. இதனால் கால்களில் ஏற்படும் வீக்கம் குறையும். மேலும், கருப்பைக்குச் செல்லும் இரத்த ஓட்டம் அதிகரித்து, குழந்தையின் வளர்ச்சிக்கு தேவையான ஊட்டச்சத்துகள் எளிதாகக் கிடைக்கும்.
முதுகுவலி உள்ளவர்களுக்கு எது சிறந்தது?
முதுகுவலி உள்ளவர்கள் நிமிர்ந்து படுக்கும்போது, சிறிய தலையணையை முழங்கால்களுக்கு அடியில் வைத்துப் படுப்பது நல்லது. இது முதுகுத்தண்டின் வளைவைச் சீராக்கி, இடுப்புப் பகுதியில் ஏற்படும் அழுத்தத்தைக் குறைத்து, வலியை குறைக்கும். ஒருக்களித்து படுப்பவர்கள், முழங்கால்களுக்கு இடையில் ஒரு தலையணையை வைத்துப் படுப்பது இடுப்பு மற்றும் முதுகுவலியை குறைக்கும்.
இதய நோயாளிகளுக்கு எது சிறந்தது?
இதய நோயாளிகள் இடது பக்கம் ஒருக்களித்து படுப்பதைத் தவிர்ப்பது நல்லது. ஏனெனில், இந்த நிலையில் இதயத்தின் மீது அழுத்தம் ஏற்பட வாய்ப்புள்ளது. எனவே, வலது பக்கம் ஒருக்களித்து படுப்பது அல்லது நிமிர்ந்து படுப்பது அவர்களுக்கு சிறந்தது.
செரிமானப் பிரச்சனை உள்ளவர்களுக்கு எது சிறந்தது?
செரிமானப் பிரச்சனை உள்ளவர்கள் இடதுபக்கமாக ஒருக்களித்து படுப்பது நல்லது. இதனால் இரைப்பைக்கு அழுத்தம் குறைந்து, உணவு எளிதாக செரிமானம் ஆகும். மேலும், அமிலம் உணவுக்குழாயில் ஏறுவதைத் தடுக்கும். இரவு உணவுக்குப் பிறகு, இடதுபக்கமாக படுத்து ஓய்வெடுப்பது செரிமானத்திற்கு மிகவும் உதவும்.
எது ஆரோக்கியமானது:
நிமிர்ந்து படுப்பதும், ஒருக்களித்து படுப்பதும் அவரவர் உடல்நிலையைப் பொறுத்தது. ஒருவருக்கு எது வசதியோ, எது ஆரோக்கியமானதாக உணர்கிறாரோ, அதைத் தேர்ந்தெடுக்கலாம். ஆனால், இந்த இரண்டு நிலைகளிலும் ஏற்படும் நன்மை, தீமைகளை அறிந்து, அதற்கேற்றவாறு படுத்துப் பழகுவது நல்லது. மேலும், தூக்கத்தின்போது நமக்கு சரியான தலையணை மற்றும் மெத்தை பயன்படுத்துவது மிகவும் அவசியம். சரியான தலையணை நமது கழுத்து மற்றும் தலையை சரியான நிலையில் வைத்திருக்கும், இது முதுகுவலி மற்றும் கழுத்துவலியைத் தடுக்கும்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
