இந்தியா குடியரசாக மாற 2 வருடம் ஏன் எடுத்தது? குடியரசு தினத்தின் உண்மை கதை
குடியரசு தினம் ஒவ்வொரு குடிமகனின் உரிமைகளையும் கடமைகளையும் நினைவூட்டுகிறது. ஜனவரி 26 தற்செயலான தேதி அல்ல. இதற்கு பின்னால் உள்ள கதையை பற்றி விரிவாக பார்க்கலாம்.
ஜனவரி 26 ஏன் குடியரசு தினம்?
ஜனவரி 26 தற்செயலான தேதி அல்ல. 1930 ஜனவரி 26 அன்று லாகூர் மாநாட்டில் 'பூரண சுயராஜ்ஜியம்' அறிவிக்கப்பட்டது. அன்று முதல் சுதந்திரம் வரை இதுவே சுதந்திர தினமாகக் கொண்டாடப்பட்டது. அந்த வரலாற்று சிறப்புக்கு மரியாதை அளிக்கும் விதமாக, ஜனவரி 26 அரசியலமைப்பு அமலுக்கு வரும் நாளாகத் தேர்ந்தெடுக்கப்பட்டது. ஆகஸ்ட் 15, 1947-ல் இந்தியா சுதந்திரம் பெற்றது. ஆனால் உடனடியாக குடியரசாகவில்லை. ஜனவரி 26, 1950 வரை, பிரிட்டிஷ் மன்னரே அதிகாரப்பூர்வ தலைவர். ஆளுநர் ஜெனரல் மூலம் ஆட்சி நடந்தது. அரசியலமைப்பு அமலுக்கு வந்த பிறகே முழுமையான ஜனநாயக குடியரசானது.
இந்திய அரசியலமைப்பு
இந்திய அரசியலமைப்பை உருவாக்க 2 ஆண்டுகள், 11 மாதங்கள், 18 நாட்கள் ஆனது. அரசியல் நிர்ணய சபை 165 நாட்கள் கூடி விவாதித்தது. அடிப்படை உரிமைகள், ஆட்சி முறை, மாநில அமைப்பு போன்ற முக்கிய விஷயங்கள் ஆழமாக விவாதிக்கப்பட்டன. இது நாட்டின் எதிர்காலம் குறித்த மிக பொறுப்பான முடிவு. அரசியலமைப்பு நவம்பர் 26, 1949-ல் தயாரானது. ஆனால், 1930 பூரண சுயராஜ்ஜிய பிரகடன நாளுடன் இணைக்க, இரண்டு மாதங்கள் காத்திருந்து ஜனவரி 26, 1950-ல் அமல்படுத்தப்பட்டது. இது வரலாற்றுக்கு அளிக்கப்பட்ட மரியாதை.
ஜனவரி 26 முக்கியத்துவம்
இந்திய அரசியலமைப்பின் அசல் பிரதிகள் அச்சிடப்படவில்லை. பிரேம் பிஹாரி நரேன் ரைசாடா என்ற கை எழுத்தாளர் அதை எழுதினார். அதன் பக்கங்களில் இந்திய கலாச்சாரத்தை பிரதிபலிக்கும் ஓவியங்கள் உள்ளன. இந்த பிரதிகள் நாடாளுமன்ற நூலகத்தில் பாதுகாக்கப்படுகின்றன. இந்திய அரசியலமைப்பு என்றதும் நினைவுக்கு வருபவர் டாக்டர் பி.ஆர். அம்பேத்கர். வரைவுக் குழுத் தலைவராக, சமத்துவம், நீதி, அடிப்படை உரிமைகளை அரசியலமைப்பில் நிலைநாட்டினார். ஒடுக்கப்பட்ட மக்களுக்கு உரிமைகளை வழங்குவதில் அம்பேத்கரின் பங்கு மகத்தானது.
இந்தியா குடியரசாக மாற காரணம்
முதல் குடியரசு தின அணிவகுப்பு ராஜ்பத்தில் (கர்தவ்யா பாதை) நடக்கவில்லை. அது இர்வின் ஸ்டேடியத்தில் நடந்தது. 1955-க்குப் பிறகுதான் ராஜ்பத் நிரந்தர இடமானது. இன்று இந்த அணிவகுப்பு நாட்டின் சக்தி மற்றும் கலாச்சாரத்தின் சின்னமாக விளங்குகிறது. இந்தியர்கள் தங்களுக்குத் தாங்களே அரசியலமைப்பை வழங்கிய நாள் இது. ஒவ்வொரு குடிமகனுக்கும் உரிமைகளை வழங்கிய நாள். அதே சமயம், கடமைகளையும் நினைவூட்டும் நாள். மக்கள் விழிப்புடன் இருந்தால் மட்டுமே ஜனநாயகம் வலுப்பெறும் என்பதே இதன் செய்தி.
