Summer Tips: கோடை கால எமனாகும் 'ஹீட் ஸ்ட்ரோக்'.. தப்பிப்பது எப்படி? சிம்பிள் டிப்ஸ் இதோ!

கோடை காலத்தில் மெல்லிய, தளர்வான மற்றும் பருத்தி ஆடைகளை அணிவது நல்லது. அடர் நிற ஆடைகளைத் தவிர்த்து, வெளிர் நிற ஆடைகளை அணியுங்கள். உணவில், எளிதில் ஜீரணமாகக்கூடிய மற்றும் அதிக நீர்ச்சத்து உள்ள உணவுகளைச் சேர்த்துக்கொள்ள வேண்டும். 

Image Credit : Asianet News

வாட்டி வதைக்கும் வெயில்

தமிழகத்தில் கோடை வெயில் வாட்டி வதைத்து வருகிறது. தலைநகர் சென்னை முதல் கடைக்கோடி கன்னியாகுமரி வரை பல்வேறு இடங்களில் 35 டிகிரி செல்சியஸ்க்கு மேல் வெயில் கொளுத்தி வருகிறது. மக்கள் வீட்டை விட்டு வெளியில் செல்ல முடியாத அளவுக்கு அனல் தகிக்கிறது. கடுமையான வெயிலை தாக்குப்பிடிக்க முடியாமல் கோடை காலத்தில் உடலில் பல்வேறு பாதிப்புகள் ஏற்படும்.

ஹீட் ஸ்ட்ரோக் அபாயம்

கோடை வெயிலால் 'ஹீட் ஸ்ட்ரோக்' (Heatstroke) எனப்படும் வெப்ப பக்கவாத பாதிப்பு ஏற்படும் அபாயமும் அதிகரிக்கிறது. குறிப்பாக, நண்பகல் நேரத்தில் கடுமையான வெயிலில் வெளியே செல்பவர்களுக்கு இந்த பாதிப்பு ஏற்பட அதிக வாய்ப்புள்ளது. உடலில் நீர்ச்சத்து குறைவது, அதிக வெப்பநிலை மற்றும் சரியான கவனிப்பு இல்லாதது போன்றவை ஹீட் ஸ்ட்ரோக்கிற்கு வழிவகுக்கும். எனவே, கோடை காலத்தில் நம்மைப் பாதுகாத்துக் கொள்வது மிகவும் அவசியம்.

Image Credit : Freepik

ஹீட் ஸ்ட்ரோக்கை தவிர்ப்பது எப்படி?

ஹீட் ஸ்ட்ரோக்கை தவிர்க்க மிக முக்கியமான வழி, நண்பகல் நேரத்து கடுமையான வெயிலில் வெளியே செல்வதைத் தவிர்ப்பதுதான். காலை 11 மணி முதல் மாலை 4 மணி வரை சூரியக் கதிர்களின் தாக்கம் மிகவும் தீவிரமாக இருக்கும். இந்த நேரத்தில் வெளியே செல்ல வேண்டிய கட்டாயம் ஏற்பட்டால், தொப்பி, கூலிங் கிளாஸ், ஸ்கார்ஃப் அல்லது குடை போன்றவற்றைப் பயன்படுத்த வேண்டும். இது நேரடி சூரிய ஒளியில் இருந்து உங்களைப் பாதுகாத்து, உடல் வெப்பநிலையை சீராக வைத்திருக்க உதவும். முடிந்தவரை நிழலில் இருக்க முயற்சி செய்யுங்கள்.

Image Credit : our own

எலுமிச்சை ஜூஸ், மோர், இளநீர்

கோடை காலத்தில் வியர்வை மூலம் உடலில் இருந்து அதிகப்படியான நீர் வெளியேறும். இதனால், நீர்ச்சத்து குறைபாடு (Dehydration) ஏற்படலாம். இதைத் தவிர்க்க, நாள் முழுவதும் போதுமான அளவு தண்ணீர் குடிப்பது அவசியம். எலுமிச்சை ஜூஸ், மோர், இளநீர், பழச்சாறுகள் போன்ற திரவ ஆகாரங்கள் உடலுக்குக் குளிர்ச்சியைத் தரும். காஃபின் மற்றும் அதிக சர்க்கரை கொண்ட பானங்களைத் தவிர்ப்பது நல்லது. உடலை எப்போதும் நீரேற்றமாக வைத்திருப்பது, ஹீட் ஸ்ட்ரோக்கைத் தடுப்பதற்கான முக்கிய கவசமாகும்.

பருத்தி ஆடைகளை அணிவது நல்லது

கோடை காலத்தில் மெல்லிய, தளர்வான மற்றும் பருத்தி ஆடைகளை அணிவது நல்லது. அடர் நிற ஆடைகளைத் தவிர்த்து, வெளிர் நிற ஆடைகளை அணியுங்கள். உணவில், எளிதில் ஜீரணமாகக்கூடிய மற்றும் அதிக நீர்ச்சத்து உள்ள உணவுகளைச் சேர்த்துக்கொள்ள வேண்டும். தர்பூசணி, வெள்ளரிக்காய், ஆரஞ்சு போன்ற பழங்கள் உடலுக்குக் குளிர்ச்சியைத் தரும். காரமான மற்றும் எண்ணெய் நிறைந்த உணவுகளைத் தவிர்த்தால், உடல் வெப்பநிலை கட்டுப்பாட்டில் இருக்கும்.

Image Credit : gemini

ஹீட் ஸ்ட்ரோக் ஏற்பட்டால் என்னென்ன அறிகுறிகள்?

ஒருவருக்கு ஹீட் ஸ்ட்ரோக் ஏற்பட்டால், தலைச்சுற்றல், தலைவலி, குமட்டல், சருமம் சூடாக மாறுவது, சோர்வு போன்ற அறிகுறிகள் ஏற்படலாம். இதுபோன்ற அறிகுறிகள் தெரிந்தால், உடனடியாக அந்த நபரை நிழலான அல்லது குளிர்ச்சியான இடத்திற்குக் கொண்டு செல்ல வேண்டும். அவருக்குத் தண்ணீர் அல்லது எலக்ட்ரோலைட் பானங்களைக் கொடுக்க வேண்டும். தேவைப்பட்டால், தாமதிக்காமல் மருத்துவரை அணுகுவது அவசியம். இந்த அறிகுறிகளைப் புறக்கணித்தால், நிலைமை மோசமாகக்கூடும். எனவே, சரியான நேரத்தில் நடவடிக்கை எடுப்பது மிகவும் முக்கியம்.