Foot Cracks: பாதவெடிப்பா?! பாத எரிச்சலா?! 7 நாட்களில் மாற்றம் தரும் சூப்பர் டிப்ஸ்!
பாதவெடிப்பு என்பது ஒரு சாதாரண பாதிப்பு அல்ல, அதை அலட்சியப்படுத்தினால் வலி, ரத்தக்கசிவு, தொற்று போன்ற தீவிரமான பிரச்சனைகளை ஏற்படுத்தும். தினசரி பராமரிப்பு, வீட்டு வைத்தியம் மற்றும் தேவைப்பட்டால் மருத்துவ ஆலோசனையின் மூலம் இதை சரிசெய்யலாம்.
பாதத்தை பாதுகாப்பது மிகவும் முக்கியம் ஏன் தெரியுமா?
பாதவெடிப்பு என்பது பலரும் சாதாரண பிரச்சினையாக நினைத்து அலட்சியப்படுத்தும் ஒரு பாதிப்பு. ஆனால், சரியான நேரத்தில் கவனிக்காமல் விட்டால், அது ஆழமான பிளவுகள், ரத்தக்கசிவு, கடுமையான வலி, நடப்பதில் சிரமம், சில நேரங்களில் தொற்றுநோய் போன்ற சிக்கல்களையும் ஏற்படுத்தக்கூடும். குறிப்பாக நீரிழிவு நோயாளிகள் மற்றும் அதிக உடல் எடை கொண்டவர்களுக்கு இந்த பாதிப்பு தீவிரமாக இருக்கும்.
எப்போது துவங்கும் குதிகால் பிரச்சினை
பாதங்களில் இயற்கையாக இருக்கும் ஈரப்பதம் குறையும்போது, குதிகால் பகுதி வறண்டு கடினமாக மாறுகிறது. அந்த தோல் அழுத்தத்தைத் தாங்க முடியாமல் வெடிக்கத் தொடங்குகிறது. நீண்ட நேரம் நின்று வேலை செய்வது, திறந்த குதிகால் கொண்ட காலணிகளை அணிவது, கால்களை சரியாக சுத்தம் செய்யாமல் இருப்பது, தண்ணீரில் அதிக நேரம் வேலை செய்வது போன்ற பழக்கங்களும் பாதவெடிப்பை அதிகரிக்கின்றன.
பாதவெடிப்புக்கான காரணங்கள் இதுதான்.!
சிலருக்கு பாதவெடிப்பு என்பது ஒரு உடல்நலக் குறைபாட்டின் அறிகுறியாகவும் இருக்கலாம். நீரிழிவு, தைராய்டு பிரச்னை, எக்ஸிமா, சொரியாசிஸ், உடல் பருமன் போன்றவை இருந்தால் இந்த பாதிப்பு அடிக்கடி ஏற்படலாம். அதனால், பல ஆண்டுகளாக பாதவெடிப்பு தொடர்ந்தால் அதன் அடிப்படை காரணத்தை கண்டறிவது மிகவும் முக்கியம்.
தினசரி பராமரிப்பு அவசியம்.!
பாதங்களை ஆரோக்கியமாக வைத்திருக்க தினசரி பராமரிப்பு அவசியம். குளித்த பிறகு பாதங்களை நன்றாகத் துடைத்து, மாய்ஸ்சரைசர் அல்லது பெட்ரோலியம் ஜெல்லி தடவுவது நல்ல பலன் தரும். இரவில் ஜெல்லி தடவிய பிறகு காட்டன் சாக்ஸ் அணிந்து தூங்கினால் தோலின் ஈரப்பதம் நீண்ட நேரம் பாதுகாக்கப்படும்.
அதிகமாக தேய்ப்பதைத் தவிர்க்க வேண்டும்.!
வாரத்திற்கு இரண்டு அல்லது மூன்று முறை வெதுவெதுப்பான நீரில் சிறிதளவு கல் உப்பு அல்லது எப்சம் உப்பு சேர்த்து 10 முதல் 15 நிமிடங்கள் பாதங்களை ஊறவைக்கலாம். அதன் பிறகு மென்மையான பியூமிக் ஸ்டோன் கொண்டு இறந்த தோல் செல்களை மெதுவாக நீக்கலாம். மிக அதிகமாக தேய்ப்பதைத் தவிர்க்க வேண்டும்.
அரிசி மாவு வைத்தியம் தெரியுமா?
வீட்டிலேயே செய்யக்கூடிய ஒரு எளிய ஸ்க்ரப்பாக, மூன்று டீஸ்பூன் அரிசி மாவுடன் ஒரு டீஸ்பூன் தேன் மற்றும் சில துளிகள் ஆப்பிள் சிடர் வினிகர் சேர்த்து கலக்கலாம். இதை பாதங்களில் மெதுவாக தேய்த்து கழுவிய பிறகு மாய்ஸ்சரைசர் பயன்படுத்தினால், வறண்ட தோல் மென்மையடைய உதவும்.
சரும மருத்துவரை அணுக வேண்டும்.!
பாதவெடிப்பு காரணமாக ரத்தம் வருதல், அதிக வலி, சிவப்பு, வீக்கம் அல்லது சீழ் போன்ற அறிகுறிகள் இருந்தால் வீட்டுவைத்தியத்தை மட்டும் நம்பாமல் உடனடியாக சரும மருத்துவரை அணுக வேண்டும். குறிப்பாக நீரிழிவு நோயாளிகள் தாமதிக்காமல் சிகிச்சை பெறுவது மிகவும் அவசியம்.
சரியான காலணி, தினசரி பராமரிப்பு அவசியம்
பாதவெடிப்புக்கு ஒரே நாளில் நிரந்தர தீர்வு கிடையாது. ஆனால் சரியான காலணி, தினசரி பராமரிப்பு, போதுமான ஈரப்பதம், சமச்சீர் உணவு மற்றும் தேவையான மருத்துவ சிகிச்சை ஆகியவற்றை தொடர்ந்து பின்பற்றினால், இந்த பிரச்னையை கட்டுப்படுத்தி ஆரோக்கியமான, மென்மையான பாதங்களைப் பெற முடியும்.
