இனி பிஸ்கட், ஸ்நாக்ஸ் வாங்குவதற்கு முன் இதை பாருங்க... INS 330, 551 எண்களுக்குப் பின்னால் உள்ள விஷயம்!

பாக்கெட் உணவுகளில் அச்சிடப்படும் INS 330, INS 322, INS 551 போன்ற குறியீடுகள் ரகசிய எண்கள் அல்ல; அவை உணவில் சேர்க்கப்படும் உணவு சேர்க்கைப் பொருட்களைக் குறிக்கும் 'சர்வதேச எண் முறைமை' (INS) ஆகும். ஊட்டச்சத்து நிபுணரின் எளிய விளக்கம் இதோ!

Image Credit : x

பாக்கெட் உணவுகளில் உள்ள INS 330, INS 322, INS 551 ஏன்?

நாம் வாங்கும் தின்பண்டங்கள் மற்றும் பாக்கெட் உணவுகளின் (Packaged foods) பின்புறம் INS 330, INS 322, INS 551 போன்ற குறியீடுகள் அச்சிடப்பட்டிருப்பதை எப்போதாவது கவனித்திருக்கிறீர்களா? சிக்கலான ரகசியக் குறியீடுகள் போலத் தோன்றும் இந்த எண்கள், உண்மையில் உணவில் சேர்க்கப்படும் உணவு சேர்க்கைப் பொருட்களைக் (Food Additives) குறிக்கும் எளிய அடையாளங்களே ஆகும்.

Image Credit : x

INS என்றால் என்ன?

உணவுப் பாக்கெட்டுகளில் உள்ள INS என்பது 'International Numbering System for Food Additives' (உணவு சேர்க்கைப் பொருட்களுக்கான சர்வதேச எண் முறைமை) என்பதைக் குறிக்கிறது. உலகளவில் உணவுப் பொருட்களில் சேர்க்கப்படும் உட்பொருட்களைத் தரப்படுத்துவதற்கும், நுகர்வோரும் ஒழுங்குமுறை அதிகாரிகளும் அவற்றை எளிதாக அடையாளம் கண்டு புரிந்துகொள்வதற்கும் இந்த முறை பயன்படுகிறது.

இது குறித்துக் கைலாஷ் தீபக் மருத்துவமனையின் ஊட்டச்சத்து ஆலோசகர் ரிச்சா சர்மா (Richa Sharma) விளக்குகையில், "பாக்கெட் உணவுகளில் சேர்க்கப்படும் பல்வேறு உணவு சேர்க்கைப் பொருட்களைத் துல்லியமாக அடையாளம் காணப் பயன்படும் ஒரு எண் முறைமையே இது" என்று தெரிவிக்கிறார்.

உணவு மற்றும் வேளாண்மை அமைப்பு (FAO) மற்றும் உலக சுகாதார நிறுவனம் (WHO) இணைந்து சர்வதேச உணவுத் தரங்களை வகுப்பதற்காக உருவாக்கிய 'கோடெக்ஸ் அலிமென்டேரியஸ் கமிஷன்' (Codex Alimentarius Commission) மூலமாக இந்த அமைப்பு உருவாக்கப்பட்டது. உதாரணமாக, மோனோசோடியம் குளுட்டமேட் (Monosodium glutamate) என்று முழுப் பெயரை அச்சிடுவதற்குப் பதிலாக, உற்பத்தியாளர்கள் 'INS 621' என்ற சுருக்கக் குறியீட்டைப் பயன்படுத்துகின்றனர்.

Image Credit : x

INS 330, INS 322, INS 551 – இதன் உண்மையான பொருள் என்ன?

INS 330 (சிட்ரிக் அமிலம் - Citric Acid):

இது எலுமிச்சை போன்ற பழங்களில் இயற்கையாகக் காணப்படும் சிட்ரிக் அமிலத்தைக் குறிக்கிறது. உணவின் புளிப்புத் தன்மை மற்றும் அமிலத்தன்மையைக் கட்டுப்படுத்தவும், உணவின் சுவை மாறாமல் பராமரிக்கவும் இது சேர்க்கப்படுகிறது.

INS 322 (லெசித்தின் - Lecithins):

எண்ணெய் மற்றும் தண்ணீர் போன்ற ஒன்றோடொன்று எளிதில் கலக்காத பொருட்களைச் சீராகக் கலக்க வைக்க (Emulsifier) இது பயன்படுகிறது. சோயா மற்றும் முட்டை போன்ற இயற்கை உணவுகளிலும் லெசித்தின் இயற்கையாகவே காணப்படுகிறது.

INS 551 (சிலிக்கான் டை ஆக்சைடு - Silicon Dioxide):

இது பெரும்பாலும் பொடி (powder) வடிவிலான உணவுகளில் பயன்படுத்தப்படுகிறது. அந்தப் பொடிகள் ஈரப்பதத்தால் ஒன்றுடன் ஒன்று ஒட்டிக்கொண்டு கட்டியாக மாறாமல், தூளாகத் தனித்தனியாக உதிர்ந்து இருப்பதற்கு இது உதவுகிறது.

Image Credit : x

INS எண்கள் உணவுகள் உடலுக்கு ஆபத்தானவையா?

ஒரு உணவுப் பாக்கெட்டில் INS எண் குறிப்பிடப்பட்டிருப்பதாலேயே அந்த உணவு ஆரோக்கியமற்றது அல்லது பாதுகாப்பற்றது என்று அர்த்தம் கிடையாது. இந்த எண், உணவில் என்ன சேர்க்கைப் பொருள் பயன்படுத்தப்பட்டுள்ளது மற்றும் எதற்காகப் பயன்படுத்தப்பட்டு உள்ளது என்பதை மட்டுமே வெளிப்படையாகத் தெரிவிக்கிறது. அதேசமயம், பாக்கெட் உணவுகளைத் தேர்ந்தெடுக்கும்போது இந்த எண்களை மட்டுமே பார்த்துக் கொண்டிருக்கக் கூடாது என்றும் அவர் அறிவுறுத்துகிறார்.

பாக்கெட்டில் உள்ள ஒட்டுமொத்தப் பொருட்கள் பட்டியல் (Ingredient list) மற்றும் ஊட்டச்சத்து தகவல்களைப் (Nutrition information) பாருங்கள். குறிப்பாக சர்க்கரை, உப்பு, கொழுப்பு மற்றும் நார்ச்சத்து ஆகியவற்றின் அளவைச் சரிபார்க்க வேண்டும். அதுவே அந்த உணவுப் பொருள் உடலுக்கு எந்த அளவிற்கு ஆரோக்கியமானது என்பதை உங்களுக்குத் தெளிவாகக் காட்டும்.