Samai Kara Kozhukattai : இட்லி, தோசையை மறந்துடுங்க! சாமையில் இப்படி கார கொழுக்கட்டை செய்து பாருங்க..சுவை அள்ளும்!

Samai Kara Kozhukattai : இட்லி, தோசைக்கு மாற்றாக சாமை, பாசிப்பருப்பு, கேரட், தேங்காய், மசாலா பொருட்கள் சேர்த்து சுவையான சாமை கார கொழுக்கட்டை செய்வது எப்படி என்று தெரிந்துகொள்ளுங்கள். ஆவியில் வேகவைக்கும் இந்த ரெசிபியை வீட்டிலேயே செய்து ருசியுங்கள்.

Image Credit : Gemini Ai

சாமை கார கொழுக்கட்டை

காலையில் வழக்கமாக இட்லி, தோசை என்று சாப்பிட்டு சலித்துவிட்டதா? வீட்டில் இருக்கும் சிறுதானியங்களை வைத்து சுவையான, ஆரோக்கியமான காலை உணவைத் தயாரிக்க விரும்புகிறீர்களா? அப்படியானால், உங்களுக்கான சிறந்த தேர்வுதான் சாமை கார கொழுக்கட்டை.

சாமை, பாசிப்பருப்பு, கேரட், தேங்காய், இஞ்சி எனச் சத்தான பொருட்களைச் சேர்த்து ஆவியில் வேகவைத்துச் செய்யப்படும் இந்தக் கொழுக்கட்டை சுவையிலும் , மணத்திலும் அசத்தும்.

அரிசி மாவில் செய்யும் வழக்கமான கொழுக்கட்டையைவிட வித்தியாசமாக, சாமையை ரவை போலக் கொரகொரப்பாக அரைத்துச் செய்யும் இந்த ரெசிபியை வீட்டில் உள்ள பெரியவர்கள் முதல் சிறியவர்கள் வரை அனைவருக்கும் செய்து கொடுக்கலாம்.

காலை உணவாக மட்டுமின்றி, மாலை நேரச் சிற்றுண்டியாகவும் இதைச் சாப்பிடலாம். எண்ணெயில் பொரிக்காமல் ஆவியில் வேகவைப்பதால், எண்ணெய் பயன்பாட்டைக் குறைக்க விரும்புபவர்களுக்கும் இது நல்ல தேர்வாக இருக்கும்.

வாருங்கள், வீட்டிலேயே மணக்க மணக்க சாமை கார கொழுக்கட்டையை எளிமையாக எப்படிச் செய்வது என்று பார்ப்போம்.

Image Credit : Chat Gpt

தேவையான பொருட்கள்

• சாமை - 1 கப்
• பாசிப்பருப்பு - 1\4 கப்
• தண்ணீர் - 11\2 கப் (தேவைக்கேற்ப சிறிது கூடுதலாக)
• உப்பு - தேவையான அளவு
• நல்லெண்ணெய் - 2 டேபிள்ஸ்பூன்

தாளிக்கத் தேவையானவை

• கடுகு - 1\2 டீஸ்பூன்
• உளுத்தம் பருப்பு - 1 டீஸ்பூன்
• கடலைப்பருப்பு - 1 டீஸ்பூன்
• மிளகு - 1\2 டீஸ்பூன்
• சீரகம் - 1\2 டீஸ்பூன்
• முந்திரி - 6 முதல் 8 (விருப்பப்பட்டால்)
• பச்சை மிளகாய் - 2
• இஞ்சி - 1 சிறிய துண்டு
• கறிவேப்பிலை - 1 கொத்து
• தேங்காய் துருவல் - 2 டேபிள்ஸ்பூன்
• பெருங்காயம் - 1\4 டீஸ்பூன்
• கேரட் துருவல் - 1\4 கப்

Image Credit : Gemini Ai

சாமை கார கொழுக்கட்டை செய்முறை - படி 1

சாமையை ஊறவைத்து வறுக்கவும்

சாமையை நன்றாகக் கழுவி 5 மணி நேரம் ஊறவைக்கவும். பின்னர் தண்ணீரை வடிகட்டி, சாமையை உலர வைத்துக்கொள்ளவும். பின்னர் அடிகனமான வாணலியில் சாமையைச் சேர்த்து மிதமான தீயில் சுமார் 2 நிமிடங்கள் வாசனை வரும் வரை வறுத்து எடுக்கவும். அதே வாணலியில் பாசிப்பருப்பையும் லேசாக வறுத்துக்கொள்ளவும்.

Image Credit : Gemini Ai

படி 2

கொரகொரப்பாக அரைக்கவும்

வறுத்த சாமை, பாசிப்பருப்பு இரண்டையும் நன்றாக ஆறவிடவும். பின்னர் மிக்ஸியில் சேர்த்து ரவை பதத்தில் கொரகொரப்பாக அரைத்துக்கொள்ளவும். மிகவும் நைசாக அரைக்க வேண்டாம். அப்போதுதான் கொழுக்கட்டைக்கு நல்ல பதம் கிடைக்கும்.

Image Credit : Gemini Ai

படி 3

தாளித்துப் பொருட்களை வதக்கவும்

வாணலியில் நல்லெண்ணெய் ஊற்றிச் சூடானதும் கடுகு சேர்க்கவும். அது பொரிந்ததும் உளுத்தம் பருப்பு, கடலைப்பருப்பு, மிளகு, சீரகம், முந்திரி ஆகியவற்றைச் சேர்த்துப் பொன்னிறமாக வறுக்கவும்.

பின்னர் நறுக்கிய பச்சை மிளகாய், துருவிய இஞ்சி, கறிவேப்பிலை, தேங்காய் துருவல், பெருங்காயம், கேரட் துருவல் ஆகியவற்றைச் சேர்த்து லேசாக வதக்கவும்.

Image Credit : Gemini Ai

படி 4

சாமைக் கலவையைத் தயாரிக்கவும்

இப்போது வதக்கிய கலவையை அரைத்து வைத்துள்ள சாமை, பாசிப்பருப்புடன் சேர்த்து தேவையான அளவு உப்பு சேர்த்து நன்றாகக் கலக்கவும்.

பின்னர் 1 1\2 கப் சுடுநீரைச் சிறிது சிறிதாக ஊற்றி கிளறவும். பின்னர் பாத்திரத்தை மூடி சுமார் 15 நிமிடங்கள் வைக்கவும். மாவு தண்ணீரை உறிஞ்சி உருண்டை பிடிக்கும் பதத்திற்கு வர வேண்டும்.

Image Credit : Gemini Ai

படி 5

கொழுக்கட்டைகளாகப் பிடிக்கவும்

கலவை கையாளும் அளவுக்குச் சூடு ஆறியதும், கைகளில் சிறிது நல்லெண்ணெய் தடவிக்கொள்ளவும். மாவைச் சிறிய உருண்டைகளாகப் பிடிக்கவும். உருண்டைகள் மிகவும் இறுக்கமாக இல்லாமல், அதே நேரத்தில் உடையாமல் இருக்குமாறு மெதுவாகப் பிடிக்கவும்.

Image Credit : Gemini Ai

படி 7

ஆவியில் வேகவைக்கவும்

இட்லி பாத்திரம் அல்லது ஸ்டீமரில் தண்ணீர் ஊற்றி சூடாக்கவும். இட்லித் தட்டில் கொழுக்கட்டைகளைச் சிறிது இடைவெளிவிட்டு அடுக்கவும். மிதமான தீயில் 10-15 நிமிடங்கள் ஆவியில் வேகவைக்கவும். கொழுக்கட்டைகள் நன்றாக வெந்து உறுதியானதும் எடுத்து சிறிது நேரம் ஆறவிடவும்.

Image Credit : Gemini Ai

படி 8

எதனுடன் பரிமாறலாம்?

காரச் சட்னி, தக்காளிச் சட்னி அல்லது தேங்காய்ச் சட்னியுடன் பரிமாறினால் சுவை அருமையாக இருக்கும். இப்போது உங்கள் வீட்டிலும் இந்தச் சுவையான சாமை கார கொழுக்கட்டையைச் செய்து பாருங்கள்.

வழக்கமான காலை உணவுக்கு மாற்றாகவும், மாலை நேரத்தில் சட்னியுடன் சாப்பிடவும் ஏற்ற இந்த ரெசிபி, சிறுதானியங்களை அன்றாட உணவில் சேர்க்க ஒரு எளிய வழியாக இருக்கும்.

சுவையான சாமை கார கொழுக்கட்டைக்கான குறிப்புகள்

• மாவு மிகவும் கெட்டியாக இருந்தால் சிறிது சுடுநீர் தெளித்துக் கலந்து உருண்டை பிடிக்கும் பதத்திற்குக் கொண்டுவரவும்.
• மாவு மிகவும் தளர்வாக இருந்தால் சில நிமிடங்கள் ஆறவிட்டு மீண்டும் கலக்கவும். தேவையெனில் சிறிதளவு அரைத்த சாமை மாவு சேர்க்கலாம்.
• காரம் அதிகமாக வேண்டுமா? பச்சை மிளகாயின் அளவை அதிகரிக்கலாம் அல்லது மிளகைச் சிறிது கூடுதலாகச் சேர்க்கலாம்.
• குழந்தைகளுக்குச் செய்கிறீர்களா? காரத்தைக் குறைத்து, கேரட் துருவலைச் சேர்க்கலாம்.