- Home
- உடல்நலம்
- உணவு
- Famous bread sweet: சாதாரண பிரெட் இவ்வளவு ருசியான இனிப்பாக மாறுமா? ஹைதராபாத்தின் புகழ்பெற்ற டபுள் கா மீத்தா!
Famous bread sweet: சாதாரண பிரெட் இவ்வளவு ருசியான இனிப்பாக மாறுமா? ஹைதராபாத்தின் புகழ்பெற்ற டபுள் கா மீத்தா!
Famous bread sweet: வீட்டில் காலை உணவுக்காக வாங்கும் சாதாரண பிரெட் மூலம் இவ்வளவு சுவையான இனிப்பு தயாரிக்க முடியுமா? ஆம்! பிரெட், நெய் கொண்டு தயாரிக்கப்படும் ஹைதராபாத் ‘டபுள் கா மீத்தா’ உணவுப் பிரியர்களைக் கவர்ந்து வருகிறது.

என்ன இந்த டபுள் கா மீத்தா?
டபுள் கா மீத்தா என்பது பிரெட் துண்டுகளைக் கொண்டு தயாரிக்கப்படும் ஒரு வகையான இனிப்பு. பார்ப்பதற்கு பிரெட் புட்டிங் அல்லது ஷாஹி துக்டா போன்ற தோற்றத்தில் இருக்கும் இந்த உணவு, ஹைதராபாத் சமையல் கலாசாரத்தில் தனித்துவமான இடத்தைப் பெற்றுள்ளது. இதன் முக்கிய மூலப்பொருளான பிரெட், ஹைதராபாத்தில் ‘டபுள் ரொட்டி’ என்று அழைக்கப்படுகிறது. அந்த டபுள் ரொட்டியைக் கொண்டு தயாரிக்கப்படும் இனிப்பு என்பதால் இதற்கு ‘டபுள் கா மீத்தா’ என்ற பெயர் வந்ததாகக் கூறப்படுகிறது.
செய்முறை
முதலில் பிரெட் துண்டுகளைச் சிறிய துண்டுகளாக வெட்டி, நெய்யில் பொன்னிறமாக மொறுமொறுப்பாக வறுத்து எடுத்துக் கொள்கிறார்கள். பின்னர் பால், சர்க்கரை, ஏலக்காய், குங்குமப்பூ ஆகியவற்றைச் சேர்த்து இனிப்பான பால் கலவை தயாரிக்கவும். வறுத்த பிரெட் துண்டுகள் இந்த இனிப்பான கலவையில் ஊறவைக்கவும். சில தயாரிப்பு முறைகளில் சர்க்கரைப் பாகும் பயன்படுத்தப்படுகிறது. இறுதியாக முந்திரி, பாதாம், பிஸ்தா, உலர் திராட்சை போன்ற உலர் பழங்கள் தூவப்பட்டு பரிமாறப்படுகிறது. சில இடங்களில் இதனுடன் ரப்ரி அல்லது கெட்டியான பாலையும் சேர்த்து மேலும் செறிவான சுவையுடன் தயாரிக்கிறார்கள். இதனால் மொறுமொறுப்பான பிரெட் துண்டுகள் பாலின் இனிப்பையும் நெய்யின் மணத்தையும் உறிஞ்சி மென்மையான இனிப்பாக மாறுகின்றன.
ஷாஹி துக்டாவுக்கும் டபுள் கா மீத்தாவுக்கும் என்ன வித்தியாசம்?
வட இந்தியாவில் பிரபலமான ஷாஹி துக்டாவும் டபுள் கா மீத்தாவும் தயாரிப்பு முறையில் பல ஒற்றுமைகளைக் கொண்டுள்ளன. இரண்டிலும் பிரெட் துண்டுகள் வறுக்கப்பட்டு இனிப்பான பால் அல்லது சர்க்கரைப் பாகுடன் சேர்க்கப்படுகின்றன. இருப்பினும், பிரெட்டின் தடிமன், பால் கலவையின் அளவு மற்றும் தயாரிக்கும் முறையில் வேறுபாடுகள் இருக்கலாம். எனவே இரண்டையும் ஒரே உணவு என்று கூறுவதைவிட, நெருங்கிய தொடர்புடைய இரண்டு இனிப்பு வகைகள் என்று குறிப்பிடுவது பொருத்தமானது.
நிஜாம் காலத்து விருந்துகளில் இடம்பெற்ற இனிப்பு!
ஹைதராபாத்தின் உணவுக் கலாசாரத்தில் நிஜாம் ஆட்சிக்கால அரசவை சமையல் மரபுகளுக்கு முக்கிய இடமுண்டு. டபுள் கா மீத்தா, நிஜாம்களின் அரசவை விருந்துகளுடன் தொடர்புடைய பாரம்பரிய இனிப்பாகக் குறிப்பிடப்படுகிறது. திருமணங்கள், விருந்து நிகழ்ச்சிகள் மற்றும் பண்டிகைக் கொண்டாட்டங்களில் இந்த இனிப்பு பரிமாறப்படும் வழக்கம் உள்ளது. குறிப்பாக ரம்ஜான் மற்றும் ஈத் கொண்டாட்டங்களிலும் இது பிரபலமான இனிப்புகளில் ஒன்றாகத் திகழ்கிறது.
சாதாரண பிரெட்டில் இவ்வளவு சிறப்பா?
குறைந்த அளவிலான அடிப்படைப் பொருட்களைக் கொண்டு தயாரிக்கப்படும் டபுள் கா மீத்தா, ஹைதராபாத்தின் பாரம்பரிய இனிப்பு வகைகளில் ஒன்றாகத் தொடர்ந்து வரவேற்பைப் பெற்று வருகிறது. சாதாரண பிரெட்டுக்கு நெய், பால், சர்க்கரை மற்றும் உலர் பழங்கள் சேரும்போது அது எவ்வாறு ஒரு செறிவான இனிப்பாக மாறுகிறது என்பதற்கு இந்த உணவு சிறந்த உதாரணம். ஹைதராபாத் செல்லும் உணவுப் பிரியர்கள் பிரியாணி, ஹலீம் போன்ற உணவுகளுடன் இந்த டபுள் கா மீத்தாவையும் சுவைத்துப் பார்க்கலாம்.















