- Home
- உடல்நலம்
- உணவு
- 5 Different Buttermilk : சுவையான 5 வகை மோர் ரெசிபி..மாங்காய் முதல் கேரட் வரை - ஒவ்வொன்றும் ஒவ்வொரு ருசி!
5 Different Buttermilk : சுவையான 5 வகை மோர் ரெசிபி..மாங்காய் முதல் கேரட் வரை - ஒவ்வொன்றும் ஒவ்வொரு ருசி!
5 Different Buttermilk : வழக்கமான மோருக்குப் பதிலாக மாங்காய், பீட்ரூட், நெல்லிக்காய், சின்ன வெங்காயம், கேரட் என 5 வகையான சுவையான மோர் தயாரிக்கலாம். குறைந்த நேரத்தில் வீட்டிலேயே இந்த வித்தியாசமான மோர் ரெசிபிகளை செய்வது எப்படி என தெரிந்துகொள்ளுங்கள்.

சுவையான 5 வகை மோர் ரெசிபி
கோடை வெயிலாக இருந்தாலும் சரி, மதிய உணவுக்குப் பிறகு உடலை இதமாக்க வேண்டும் என்றாலும் சரி, ஒரு டம்ளர் குளிர்ச்சியான மோருக்கு ஈடு இணையே கிடையாது. வழக்கமாக தயிரில் தண்ணீர் கலந்து உப்பு சேர்த்து மோர் தயாரித்து குடிப்பதற்குப் பதிலாக, வீட்டில் கிடைக்கும் காய்கறிகள், பழங்கள் மற்றும் மூலிகைகளைக் கொண்டே வித்தியாசமான சுவையில் மோர் தயாரிக்கலாம்.
மாங்காய், பீட்ரூட், நெல்லிக்காய், சின்ன வெங்காயம், கேரட் என ஐந்து விதமான பொருட்களைப் பயன்படுத்தி ஐந்து வகையான சுவையான மோர் தயாரிக்கலாம். இவை செய்வதற்கும் மிகவும் எளிது. அதிக நேரம் செலவிட வேண்டிய அவசியமும் இல்லை. மிக்சி இருந்தால் போதும், சில நிமிடங்களிலேயே சுவையான மோர் தயார்.
குறிப்பாக, மோர் குடிக்க விரும்பாத குழந்தைகள் முதல் பெரியவர்கள் வரை அனைவருக்கும் வித்தியாசமான சுவையில் இந்த மோர்களை செய்து கொடுக்கலாம். சரி, இப்போது இந்த 5 வகை மோர் தயாரிக்கத் தேவையான பொருட்கள் என்னென்ன, அவற்றை எப்படிச் செய்வது என்று பார்க்கலாம்.
மோர் வகை 1
மாங்காய் மோர்
புளிப்பு மற்றும் காரம் கலந்த சுவையில் மாங்காய் மோர் அருமையாக இருக்கும். மாங்காயின் தனித்துவமான சுவையுடன் புதினா, கொத்தமல்லி சேரும்போது புத்துணர்ச்சியான பானமாக மாறிவிடும்.
தேவையான பொருட்கள்
- மாங்காய் துண்டுகள் - 1\2 கப்
- கொத்தமல்லித் தழை - ஒரு கைப்பிடி
- புதினா இலைகள் - சிறிதளவு
- சீரகம் - 1\2 டீஸ்பூன்
- மிளகு - 1\4 டீஸ்பூன்
- தயிர் - 1\2 கப்
- தண்ணீர் - 1 கப்
- உப்பு - தேவையான அளவு
செய்முறை
- முதலில் மாங்காயை தோல் நீக்கி சிறிய துண்டுகளாக நறுக்கிக் கொள்ளவும்.
- மிக்சி ஜாரில் மாங்காய் துண்டுகள், கொத்தமல்லித் தழை, புதினா இலைகள் சேர்க்கவும்.
- அதனுடன் சீரகம், மிளகு, உப்பு சேர்க்கவும்.
- இப்போது தயிர் மற்றும் தண்ணீர் ஊற்றி நன்றாக அரைத்துக் கொள்ளவும்.
- தேவைக்கேற்ப தண்ணீர் சேர்த்து பதத்தைச் சரிசெய்து கொள்ளவும்.
- ஒரு டம்ளரில் ஊற்றி குளிர்ச்சியாகப் பரிமாறவும்.
மோர் வகை 2
பீட்ரூட் மோர்
பார்ப்பதற்கே அழகான இளஞ்சிவப்பு நிறத்தில் இருக்கும் பீட்ரூட் மோர், வழக்கமான மோரிலிருந்து முற்றிலும் வித்தியாசமானது. பீட்ரூட்டின் இயல்பான நிறமும் சுவையும் இந்த மோருக்கு கூடுதல் சிறப்பு சேர்க்கும்.
தேவையான பொருட்கள்
- பீட்ரூட் - சிறிய துண்டுகள் 1\2 கப்
- பச்சை மிளகாய் - 1
- சீரகம் - 1\2 டீஸ்பூன்
- தயிர் - 1\2 கப்
- தண்ணீர் - 1 கப்
- உப்பு - தேவையான அளவு
செய்முறை
- முதலில் பீட்ரூட்டை தோல் நீக்கி சிறிய துண்டுகளாக நறுக்கிக் கொள்ளவும்.
- மிக்சி ஜாரில் பீட்ரூட் துண்டுகள், பச்சை மிளகாய், சீரகம் சேர்க்கவும்.
- அதனுடன் தேவையான அளவு உப்பு சேர்க்கவும்.
- இப்போது தயிர் மற்றும் தண்ணீர் ஊற்றி நன்றாக அரைக்கவும்.
- பீட்ரூட் நன்கு அரைபட்டு மோருடன் கலந்ததும் ஒரு டம்ளரில் ஊற்றி பரிமாறவும்.
மோர் வகை 3
நெல்லிக்காய் மோர்
புளிப்பு சுவை பிடிக்கும் என்றால் நெல்லிக்காய் மோர் உங்களுக்கான சிறந்த தேர்வு. நெல்லிக்காயுடன் கருவேப்பிலை, சீரகம், மிளகு சேர்த்து தயாரிக்கும்போது நல்ல மணத்துடன் வித்தியாசமான சுவை கிடைக்கும்
தேவையான பொருட்கள்
- நாட்டு நெல்லிக்காய் - 2
- கருவேப்பிலை - ஒரு கொத்து
- சீரகம் - 1\2 டீஸ்பூன்
- மிளகு - 1\4 டீஸ்பூன்
- தயிர் - 1\2 கப்
- தண்ணீர் - 1 கப்
- உப்பு - தேவையான அளவு
செய்முறை
- முதலில் நெல்லிக்காயை நன்றாகக் கழுவி, அதிலுள்ள கொட்டைகளை நீக்கி சிறிய துண்டுகளாக வெட்டிக் கொள்ளவும்.
- மிக்சி ஜாரில் நெல்லிக்காய் துண்டுகள், கருவேப்பிலை, சீரகம், மிளகு சேர்க்கவும். அதனுடன் தேவையான அளவு உப்பு சேர்க்கவும்.
- இப்போது தயிர் மற்றும் தண்ணீர் ஊற்றி நன்றாக அரைக்கவும். அனைத்தும் நன்றாகக் கலந்ததும் டம்ளரில் ஊற்றி பரிமாறவும்.
மோர் வகை 4
சின்ன வெங்காயம் மோர்
காரசாரமான சுவையில் மோர் குடிக்க விரும்புபவர்களுக்கு சின்ன வெங்காயம் மோர் மிகவும் பிடிக்கும். சின்ன வெங்காயத்தின் தனித்துவமான சுவையுடன் இஞ்சி, கொத்தமல்லி சேரும்போது நல்ல மணத்துடன் அருமையாக இருக்கும்.
தேவையான பொருட்கள்
- சின்ன வெங்காயம் - 5 முதல் 6
- இஞ்சி - ஒரு சிறிய துண்டு
- கொத்தமல்லித் தழை - ஒரு கைப்பிடி
- தயிர் - 1\2 கப்
- தண்ணீர் - 1 கப்
- உப்பு - தேவையான அளவு
செய்முறை
- முதலில் சின்ன வெங்காயத்தைத் தோல் நீக்கி சுத்தம் செய்து கொள்ளவும். இஞ்சியைச் சிறிய துண்டுகளாக நறுக்கிக் கொள்ளவும்.
- மிக்சி ஜாரில் சின்ன வெங்காயம், இஞ்சி, கொத்தமல்லித் தழை சேர்க்கவும். அதனுடன் தேவையான அளவு உப்பு சேர்க்கவும்.
- இப்போது தயிர் மற்றும் தண்ணீர் ஊற்றி நன்றாக அரைக்கவும். அரைத்த மோரைக் குடிக்கும் பாத்திரத்தில் ஊற்றி உடனே பரிமாறவும்
மோர் வகை 5
கேரட் மோர்
கேரட்டின் லேசான இனிப்புச் சுவையுடன் மிளகு, சீரகம் சேரும்போது இந்த மோர் வித்தியாசமான சுவையைக் கொடுக்கும். வழக்கமான மோருக்குப் பதிலாக புதிதாக ஏதாவது முயற்சி செய்ய நினைப்பவர்கள் இதைத் தாராளமாகச் செய்து பார்க்கலாம்.
தேவையான பொருட்கள்
- கேரட் - 1 சிறியது
- கருவேப்பிலை - சிறிதளவு
- மிளகு - 1\4 டீஸ்பூன்
- சீரகம் - 1\2 டீஸ்பூன்
- தயிர் - 1\2 கப்
- தண்ணீர் - 1 கப்
- உப்பு - தேவையான அளவு
செய்முறை
- முதலில் கேரட்டை நன்றாகக் கழுவி தோல் நீக்கிக் கொள்ளவும். கேரட்டை சிறிய துண்டுகளாக நறுக்கிக் கொள்ளவும்.
- மிக்சி ஜாரில் கேரட் துண்டுகள், கருவேப்பிலை, மிளகு, சீரகம் சேர்க்கவும். அதனுடன் தேவையான அளவு உப்பு சேர்க்கவும்.
- இப்போது தயிர் மற்றும் தண்ணீர் ஊற்றி நன்றாக அரைக்கவும். கேரட் நன்றாக அரைபட்டு மோருடன் கலந்ததும் டம்ளரில் ஊற்றிப் பரிமாறவும்.
ஒரே மாதிரியான மோர் குடித்துப் போரடித்துவிட்டதா? அப்படியானால் இந்த ஐந்து வகைகளில் உங்களுக்குப் பிடித்ததைத் தேர்வு செய்து வீட்டிலேயே செய்து பாருங்கள். சுவையிலும் நிறத்திலும் வித்தியாசமான இந்த மோர் வகைகள் மதிய உணவுடன் பரிமாறவும் ஏற்றவை.















