Honey Amla: வீட்டிலேயே தேன் நெல்லிக்காய் செய்வது எப்படி? எத்தனை நாள் வைத்திருக்கலாம்?

Honey Amla: வீட்டிலேயே தேன் நெல்லிக்காய் செய்வது எப்படி? தேவையான பொருட்கள், தேனில் ஊறவைக்கும் முறை மற்றும் எத்தனை நாட்கள் சேமிக்கலாம் என்பதற்கான முழு விவரத்தை இந்த தொகுப்பில் பார்க்கலாம்.

Image Credit : pinterest

தேன் நெல்லிக்காய் செய்வது எப்படி?

வீட்டிலேயே தேன் நெல்லிக்காய் செய்வது மிகவும் எளிது. நெல்லிக்காயின் துவர்ப்பும், தேனின் இனிப்பும் சேர்ந்து சுவையாக இருக்கும். நெல்லிக்காயில் வைட்டமின் C உள்ளன. இதை தேனுடன் சேர்த்து, சுத்தமான கண்ணாடி பாட்டிலில் சேமித்தால் சில நாட்கள் முதல் சில வாரங்கள் வரை பயன்படுத்தலாம்.

Image Credit : pinterest

தேவையான பொருட்கள்

நாட்டு நெல்லிக்காய் - 500 கிராம்

தேன் - தேவையான அளவு

விருப்பப்பட்டால் – சிறிதளவு இலவங்கப்பட்டை அல்லது ஏலக்காய், வெல்லம் சேர்த்துக்கொள்ளலாம்.

Image Credit : pinterest

செய்முறை

• நல்ல தரமான, கெட்டுப்போகாத நாட்டு நெல்லிக்காய்களைத் தேர்ந்தெடுத்து தண்ணீரில் நன்றாகக் கழுவவும்.
• ஒரு பாத்திரத்தில் தண்ணீர் ஊற்றி நெல்லிக்காயை 5–7 நிமிடங்கள் ஆவியில் வேகவைக்கவும். இதனால் நெல்லிக்காய் சற்று மென்மையாகும். அதிகமாக வேகவைக்க வேண்டாம்.
• ஆறியதும் நெல்லிக்காயைச் சிறிய துண்டுகளாகவும் வெட்டி அதற்குள் இருக்கும் கொட்டையை அகற்றவும். விருப்பட்டால் முழு நெல்லிக்காயையும் பயன்படுத்தலாம்.
• வேகவைத்த நெல்லிக்காயில் தண்ணீர் இருக்கக்கூடாது என்பதால், சுத்தமானதுணியால் துடைத்து, முழுமையாக ஈரம் இல்லாமல் உலர்த்தவும்.
• இதற்கு பிறகு சுத்தமான, முற்றிலும் உலர்ந்த கண்ணாடி ஜாடியில் நெல்லிக்காய் துண்டுகளைப் போட்டு, அவை முழுவதும் மூழ்கும் அளவுக்கு தேன் ஊற்றவும்.
• ஜாடியை இறுக்கமாக மூடி, குளிர்ச்சியான இடத்தில் வைக்கவும். தினமும் ஒருமுறை ஜாடியை மெதுவாகக் குலுக்கலாம். 2–3 நாட்களுக்குப் பிறகு சாப்பிடலாம். ஒரு வாரம் ஊறிய பிறகு சுவை இன்னும் நன்றாக இருக்கும்.

Image Credit : pinterest

எத்தனை நாள் வைத்திருக்கலாம்?

வீட்டில் தயாரிக்கும் தேன் நெல்லிக்காயை அவற்றை தயாரிக்கும் முறை, ஈரப்பதம், பயன்படுத்தும் கரண்டி ஆகியவற்றை பொறுத்து எத்தனை நாள் வைத்திருக்கலாம் என்பதை சொல்ல முடியும்.

• அறை வெப்பநிலையில் நீண்ட நாட்கள் வைத்திருப்பதைத் தவிர்ப்பது நல்லது.
• சுத்தமாகவும் ஈரமில்லாமலும் தயாரித்திருந்தால் பொதுவாக சில வாரங்களுக்குள் பயன்படுத்துவது பாதுகாப்பான நடைமுறை.
• ஒவ்வொரு முறையும் சுத்தமான, உலர்ந்த கரண்டியை மட்டுமே பயன்படுத்தவும்.
• ஜாடிக்குள் தண்ணீர் செல்லாதவாறு பார்த்துக்கொள்ளவும்.

குறிப்பு: துர்நாற்றம், பூஞ்சை, அதிகமாக நொதித்தல், நிறம் அல்லது சுவையில் அசாதாரண மாற்றம் தெரிந்தால் சாப்பிடாமல் தூக்கி எறியவும். குழந்தைகளுக்கு கொடுக்க வேண்டாம். நல்ல நாட்டு தேன் மற்றும் நெல்லிக்காயை பயன்படுத்தவும்.