- Home
- உடல்நலம்
- உணவு
- Homemade Cheese : வீட்டிலேயே சுவையான சீஸ் செய்யலாம்! பால் இருந்தால் போதும்..ஈஸியான 2 செய்முறைகள்
Homemade Cheese : வீட்டிலேயே சுவையான சீஸ் செய்யலாம்! பால் இருந்தால் போதும்..ஈஸியான 2 செய்முறைகள்
Homemade Cheese : கடைகளில் வாங்கும் சீஸை வீட்டிலேயே எளிதாகத் தயாரிக்கலாம். பால், எலுமிச்சைச் சாறு போன்ற எளிய பொருட்களை வைத்து ஃபிரெஷ் சீஸ் செய்வது எப்படி? கட்டியாக வெட்டக்கூடிய சீஸ் தயாரிக்கும் மற்றொரு முறையையும் தெரிந்துகொள்ளுங்கள்.
வீட்டிலேயே சீஸ் செய்வது எப்படி
பீட்சா, சாண்ட்விச், பாஸ்தா எனப் பல உணவுகளிலும் பயன்படுத்தப்படும் சீஸை இனி கடைகளில் மட்டுமே வாங்க வேண்டிய அவசியமில்லை. உங்கள் வீட்டில் இருக்கும் பால், எலுமிச்சைச் சாறு போன்ற எளிய பொருள்களை வைத்தே சுவையான ஃபிரெஷ் சீஸைத் தயாரிக்கலாம்.
அதிலும், சமையலுக்குப் புதிதாக இருப்பவர்கள்கூட எளிதாகச் செய்யக்கூடிய இந்தச் செய்முறையில், பால் எப்படிச் சீஸாக மாறுகிறது, எந்தப் பதத்தில் இறக்க வேண்டும், எவ்வளவு நேரம் வடிகட்ட வேண்டும் என்பதையெல்லாம் தெரிந்துகொண்டால் போதும். வாருங்கள், வீட்டிலேயே ஃபிரெஷ் சீஸ் தயாரிப்பது எப்படி என்று விரிவாகப் பார்ப்போம்.
சீஸ் தயாரிக்கத் தேவையான பொருள்கள்
பால் - 1 லிட்டர்
எலுமிச்சைச் சாறு - 2 முதல் 3 டேபிள்ஸ்பூன்
வீட்டிலேயே சீஸ் தயாரிப்பது எப்படி?
செய்முறை விளக்கம்
பாலை சூடாக்குதல்
ஒரு அகலமான பாத்திரத்தில் பாலை ஊற்றி மிதமான தீயில் சூடாக்கவும். பால் கொதித்துவிடக் கூடாது, லேசாக வெதுவெதுப்பான சூடு வர வேண்டும். பின்னர் அடுப்பை அணைத்துவிடவும்.
படி 1
எலுமிச்சைச் சாறு சேர்க்கவும்
சூடான பாலில் வினிகர் அல்லது எலுமிச்சை சாறை கொஞ்சம் கொஞ்சமாகச் சேர்த்து, கரண்டியால் மெதுவாகக் கிளறவும். சில நிமிடங்களில் பால் வெள்ளைத் திரள்களாகத் திரிந்து, திண்மையான சீஸ் கட்டிகளும், மஞ்சள் நிற நீரும் தனியாகப் பிரியும்.
பால் முழுமையாகத் திரண்டு பிரிவதற்கு 5 - 10 நிமிடங்கள் வரை விடவும். திரள்கள் தனியாகவும், நீர் தனியாகவும் பிரிந்திருக்கிறதா என்பதைப் பார்க்கவும்.
படி 2
துணியில் வடிகட்டவும்
ஒரு வடிகட்டியின் மேல் சுத்தமான மெல்லிய துணியை விரித்து, பால் திரள்களைக் கொட்டவும். நீரை முழுமையாக அகற்றவும்.
படி 3
சீஸ் வடிவம் கொடுத்தல்
கெட்டியான சீஸ் பகுதியை ஒன்றாகச் சேர்த்து, உருண்டையாகவோ அல்லது கட்டியாகவோ அழுத்தி வடிவமைத்துக் கொள்ளவும்.
படி 4
பின்னர் அதைச் சுத்தமான மூடியுள்ள பாத்திரத்தில் வைத்து அல்லது ஃபாயில் பேப்பரால் சுற்றி, 1 முதல் 2 மணி நேரம் ஃபிரிட்ஜில் வைக்கவும்.
சுவையான சீஸ் தயார்
அவ்வளவுதான். சுவையான வீட்டுத் தயாரிப்பு ஃபிரெஷ் சீஸ் தயார்.
இந்தச் சீஸை எந்த உணவுகளில் பயன்படுத்தலாம்?
சீஸ் சாண்ட்விச் - காய்கறிகளுடன் சேர்த்துச் செய்யலாம்.
பாஸ்தா- சாஸ் மற்றும் மசாலாவுடன் சேர்க்கலாம்.
சீஸ் எத்தனை நாட்கள் வைத்திருக்கலாம்?
வீட்டில் தயாரிக்கும் ஃபிரெஷ் சீஸில் ஈரப்பதம் அதிகமாக இருக்கும். எனவே, அதைச் சுத்தமான மூடியுள்ள பாத்திரத்தில் வைத்துப் பயன்படுத்துவது நல்லது. பாதுகாப்பான அணுகுமுறையாக 2–3 நாட்களுக்குள் பயன்படுத்தவும். துர்நாற்றம், வழவழப்பு அல்லது பூஞ்சை ஏற்பட்டால் சாப்பிட வேண்டாம்.
மற்றொரு முறை - படி 1
மற்றொரு முறையில் சீஸ் தயாரிப்பது எப்படி?
வடிகட்டி எடுத்த சீஸை மிக்ஸி ஜாரில் போட்டு, சுவைக்கேற்ப சிறிதளவு உப்பு சேர்த்து நன்றாக அரைத்துக் கொள்ளவும்.
படி 2
பின்னர், ஒரு பாத்திரத்தில் சீஸ் வடிகட்டிய நீரை ஊற்றி, அதனுடன் சிறிதளவு அகர் அகர் (கடல்பாசி) சேர்த்துக் கொதிக்கவிடவும்.
படி 3
கலவை நன்றாகக் கொதித்ததும், அரைத்து வைத்துள்ள சீஸைச் சேர்த்து, கட்டிகள் இல்லாமல் தொடர்ந்து கிளறவும். கலவை கெட்டியாகி, கொழுகொழுப்பான பதத்திற்கு வந்ததும் அடுப்பை அணைக்கவும்.
படி 4
உடனே இதனை ஒரு தட்டில் ஊற்றி ஆறவிடவும். நன்றாக ஆறியதும் ஃபிரிட்ஜில் வைத்து கெட்டியாக்கி, பின்னர் விரும்பிய வடிவில் துண்டுகளாக வெட்டிக் கொள்ளலாம். இவ்வாறு வீட்டிலேயே கட்டியாக வெட்டக்கூடிய சீஸைத் தயாரிக்கலாம்.
