பேரழகி உடன் நான்... கீர்த்தி பாண்டியனை கிண்டலடித்தவர்களுக்கு அசோக் செல்வன் கொடுத்த செருப்படி ரிப்ளை

தமிழ் திரையுலகில் தெகிடி, ஓ மை கடவுளே, போர்தொழில் என பல்வேறு சூப்பர்ஹிட் படங்களில் நடித்து வெற்றி நாயகனாக வலம் வருபவர் அசோக் செல்வன். இவர் நடிப்பில் அடுத்ததாக உருவாகி இருக்கும் திரைப்படம் ப்ளூ ஸ்டார். பா.இரஞ்சித் தயாரிப்பில் உருவாகி உள்ள இப்படம் அசோக் செல்வனின் வாழ்க்கையில் மறக்க முடியாத படமாக மாறி உள்ளது.

ஏனெனில் இப்படத்தில் நடித்தபோது தான் அவருக்கு காதல் மலர்ந்துள்ளது. ப்ளூ ஸ்டார் படத்தில் தனக்கு ஜோடியாக நடித்த நடிகை கீர்த்தி பாண்டியனை தான் காதலித்து கரம்பிடித்துள்ளார் அசோக் செல்வன். இந்த ஜோடியின் திருமணம் கடந்த சில தினங்களுக்கு முன்னர் குடும்பத்தினர் முன்னிலையில் சிம்பிளாக நடைபெற்றது.

திருநெல்வேலியில் உள்ள இட்டேரி என்கிற கிராமத்தில் நடிகர் அருண் பாண்டியனுக்கு சொந்தமான பண்ணைவீட்டில் வைத்து தான் அசோக் செல்வன் - கீர்த்தி பாண்டியன் ஜோடியின் திருமணம் நடைபெற்று உள்ளது. தமிழ் முறைப்படி நடந்த இந்த திருமணத்தில் கலந்துகொண்டவர்களுக்கு பசுமை விருந்து பரிமாறப்பட்டது.

இதையும் படியுங்கள்... பண்ணை வீட்டில் காதல் திருமணம்... நடிகை கீர்த்தி பாண்டியனை கரம்பிடித்தார் அசோக் செல்வன் - வைரலாகும் போட்டோஸ்

திருமணம் முடிந்த கையோடு, அசோக் செல்வன் - கீர்த்தி பாண்டியன் இருவரும் தங்களது திருமண புகைப்படங்களை இன்ஸ்டாகிராமில் பதிவிட்டனர். அந்த புகைப்படத்தை பார்த்து அந்த ஜோடிக்கு வாழ்த்துக்கள் ஒரு பக்கம் குவிந்த வண்ணம் இருந்தாலும், மறுபுறம் கீர்த்தி பாண்டியனை ஏராளமானோர் உருவ கேலி செய்து வந்தனர்.

சிலர் காசுக்கு ஆசைப்பட்டு தான் அசோக் செல்வன் கீர்த்தி பாண்டியனை திருமணம் செய்துகொண்டதாக கூற, ஒரு சிலரோ ஊர் உலகத்துல வேற பொண்ணே கிடைக்காத மாதிரி இவள போய் கல்யாணம் பண்ணிருக்கீங்க என வன்மத்தை கக்கினர். இதில் அதிர்ச்சியான விஷயம் என்னவென்றால் கீர்த்தி பாண்டியனை உருவ கேலி செய்ததில் ஏராளமானோர் பெண்கள் தான்.

இப்படி தன் மனைவியை உருவ கேலி செய்தவர்களை சும்மா விடக்கூடாது என முடிவெடுத்த அசோக் செல்வன், அவருடன் நடத்திய போட்டோஷூட் புகைப்படங்களை பதிவிட்டு, ‘உலகிலேயே மிகவும் அழகான பெண்ணுடன் நான்’ என்கிற கேப்ஷனும் கொடுத்துள்ளார். கீர்த்தி பாண்டியனை உருவ கேலி செய்தவர்களுக்கு செருப்படி கொடுக்கும் விதமாக அசோக் செல்வனின் இந்த பதிவு அமைந்துள்ளது.

இதையும் படியுங்கள்... அஜித் - ஷாலினி போல் ஒரே படத்தில் ஒர்க் அவுட் ஆன காதல்.. அசோக் செல்வன் - கீர்த்தி பாண்டியன் லவ் ஸ்டோரி தெரியுமா