டாப் 4 கோலிவுட் இயக்குனர்கள்.. 2ம் படத்திலேயே ஓஹோவென ஏற்றிவிட்ட கார்த்தி - மாஸ் ப்ரோ!

Actor Karthi : தமிழ் சினிமாவின் டாப் இயக்குனர்களின் வளர்ச்சியில் துணை நின்றவர் நடிகர் கார்த்தி என்றால் அது நிச்சயம் மிகையல்ல.

Pa Ranjith

தமிழில் கடந்த 2012ம் ஆண்டு வெளியான "அட்டகத்தி" என்கின்ற திரைப்படத்தின் மூலம் தமிழ் திரை உலகில் இயக்குனராக உருவெடுத்தவர் தான் பா. ரஞ்சித். தன்னுடைய முதல் திரைப்படத்திலேயே தமிழ் ரசிகர்கள் மத்தியில் மிகப்பெரிய வரவேற்பை பெற்ற ரஞ்சித் இன்று, தமிழ் சினிமாவின் மிகச்சிறந்த இயக்குனராக திகழ்ந்து வருகின்றார். சூப்பர் ஸ்டார் ரஜினிகாந்தை வைத்து அடுத்தடுத்து "கபாலி" மற்றும் "காலா" என்று இரண்டு வெற்றி திரைப்படங்களை கொடுத்தவர் அவர் என்பது குறிப்பிடத்தக்கது. இந்நிலையில் அட்டக்கத்தி திரைப்படத்தின் வெற்றிக்கு பிறகு ரஞ்சித்திற்கு மிகப்பெரிய பிரேக்கிங் பாய்ண்டாக அமைந்த திரைப்படம் தான் "மெட்ராஸ்". இந்த திரைப்படத்தில் நடிகர் கார்த்தி மிக நேர்த்தியாக நடித்து அசத்தியிருப்பார்.

H Vinoth

இயக்குனர் எச். வினோத் என்றாலே இனி நம் ஞாபகத்தில் வரப்போவது, தளபதி விஜயை திரை உலகில் இறுதியாக இயக்கிய இயக்குனர் என்ற பெருமைக்கு உரித்தானவர் என்பது தான். கடந்த 2014 ஆம் ஆண்டு தமிழில் வெளியாகி மிகப்பெரிய அளவில் வரவேற்பை பெற்ற "சதுரங்க வேட்டை" என்ற திரைப்படத்தின் மூலம் தான் இவர் இயக்குனராக அறிமுகமானார். சுமார் மூன்று ஆண்டுகள் கழித்து 2017 ஆம் ஆண்டு தமிழக போலீசார் நடத்திய "ஆபரேஷன் பவாரியா" என்ற உண்மை கதையை தழுவி, "தீரன் அதிகாரம் ஒன்று" என்ற திரைப்படத்தை இயக்கினார். 

கார்த்தி மிக நேர்த்தியான போலீஸ் அதிகாரியாக இந்த திரைப்படத்தில் நடித்து அசத்தியிருந்தார். விரைவில் அந்த திரைப்படத்தின் இரண்டாம் பாகமும் உருவாக உள்ளது குறிப்பிடத்தக்கது.

Suseenthiran

தனது திரைப்படத்திற்காக தேசிய விருது வென்ற பல இயக்குனர்களில் ஒருவர் தான் சுசீந்திரன். கடந்த 2009 ஆம் ஆண்டு தமிழில் வெளியாகி, சூரி என்கின்ற மாபெரும் நடிகரை தமிழ் திரையுலகத்திற்கு கொடுத்த திரைப்படம் தான் "வெண்ணிலா கபடி குழு". இந்த படத்தில் நடித்த அனைத்து கதாபாத்திரங்களும் அவ்வளவு இயல்பாக உருவாக்கப்பட்டிருக்கும். அந்த திரைப்படத்தின் மூலம் புகழ்பெற்ற சுசீந்திரனுக்கு அடுத்த ஆண்டே கிடைத்த மாபெரும் வெற்றி தான் "நான் மகான் அல்ல" என்ற திரைப்படம். நடிகர் கார்த்தி நடிப்பில் வெளியான இந்த திரைப்படம் தமிழ் திரையுலகில் இன்றளவும் பலருக்கு பேவரட் திரைப்படமாக இருந்து வருகிறது.

Lokesh Kanagaraj

தமிழ் சினிமாவின் சென்சேஷனல் இயக்குனராக மாறி இருப்பவர் தான் லோகேஷ் கனகராஜ். ஏற்கனவே தளபதி விஜய் மற்றும் உலக நாயகன் கமலஹாசன் உள்ளிட்ட ஜாம்பவான்களை இயக்கிய அவர், தற்பொழுது சூப்பர் ஸ்டார் ரஜினிகாந்தை அவருடைய 171வது திரைப்படத்தில் இயக்கி வருவது குறிப்பிடத்தக்கது. குறும்படங்கள் மூலம் தனது கலை உலக பயணத்தை தொடங்கிய லோகேஷ் கனகராஜ், 2017 ஆம் ஆண்டு வெளியான "மாநகரம்" என்கின்ற திரைப்படத்தின் மூலம் தான் தமிழ் திரை உலகில் அறிமுகமானார். அதன் பிறகு கடந்த 2019 ஆம் ஆண்டு பிரபல நடிகர் கார்த்தி நடிப்பில் வெளியான "கைதி" என்கின்ற திரைப்படம் லோகேஷ் கனகராஜன் புகழை வேறொரு பரிமாணத்திற்கு எடுத்துச் சென்றது.