தனுஷ், சூர்யா, நயன்தாராவுக்கு தமிழக அரசு விருது.. அசுரன் முதல் கார்கி வரை.. விருதுகளை அள்ளிய படங்கள்! முழு லிஸ்ட்!

தமிழக அரசு 2016-ஆம் ஆண்டு முதல் 2022-ஆம் ஆண்டு வரையிலான திரைப்பட விருதுகளை அறிவித்துள்ளது. சிறந்த நடிகர்கள், சிறந்த நடிகைகள் மற்றும் சிறந்த படங்கள் குறித்து பார்க்கலாம்.

Image Credit : Asianet News

தனுஷ், சூர்யா, விஜய் சேதுபதிக்கு விருது

தமிழக அரசு 2016-ஆம் ஆண்டு முதல் 2022-ஆம் ஆண்டு வரையிலான திரைப்பட விருதுகள், 2014-ஆம் ஆண்டு முதல் 2022-ஆம் ஆண்டுகளுக்கான சின்னத்திரை விருதுகளை அறிவித்துள்ளது. 

அதனடிப்படையில் வடசென்னை படத்துக்காக தனுஷும், சூரரை போற்று படத்துக்காக சூர்யாவும், புரியாத புதிர் படத்துக்காக விஜய் சேதுபதியும், தீரன் அதிகாரம் ஒன்று படத்துக்காக கார்த்தியும், சார்பட்டா பரம்பரை படத்துக்காக ஆர்யாவும், டாணாக்காரன் படத்துக்காக விக்ரம் பிரபுவும், ஒத்த செருப்பு படத்துக்காக பார்த்திபனும் சிறந்த நடிகர்களாக தேர்வு செய்யப்பட்டுள்ளனர்.

Image Credit : facebook/manju warrier

ஜோதிகா, மஞ்சு வாரியர்

இதேபோல் பாம்பு சட்டை படத்துக்காக கீர்த்தி சுரேஷும், அறம் படத்துக்காக நயன்தாராவும், செக்கச் சிவந்த வானம் படத்துக்காக ஜோதிகாவும், அசுரன் படத்துக்காக மஞ்சு வாரியரும், சூரரை போற்று படத்துக்காக அபர்ணா பாலமுரளியும், ஜெய் பீம் படத்துக்காக லிஜோ மோல் ஜோசும், கார்கி படத்துக்காக சாய் பல்லவியும் சிறந்த நடிகைகளாக தேர்வு செய்யப்பட்டுள்ளனர்.

Image Credit : Google

சிறந்த படங்கள், சிறந்த இயக்குநர்கள்

மாநகரம் (206), அறம் (2017), பரியேறும் பெருமாள் (2018), அசுரன் (2019), கூழாங்கல் (2020), ஜெய்பீம் (2021), கார்கி (2022) ஆகிய திரைப்படங்கள் சிறந்த படங்களாகவும் தேர்வு செய்யப்பட்டுள்ளன. 

சிறந்த இயக்குநர்களுக்கான விருதை லோகேஷ் கனகராஜ் (மாநகரம்), புஷ்கர் காயத்ரி (விக்ரம் வேதா), மாரி செல்வராஜ் (பரியேறும் பெருமாள்), ஆர்.பார்த்திபன் (ஒத்த செருப்பு), சுதா கொங்கரா (சூரரைப் போற்று), செ.ஞானவேல் (ஜெய்பீம்), கெளதம் ராமச்சந்திரன் (கார்கி) ஆகியோர் வென்றுள்ளனர்.

Image Credit : Google

பரிசுத்தொகை எவ்வளவு?

இந்த விருதுகளை பிப்ரவரி 13ம் தேதி (வெள்ளிக்கிழமை) மாலை 4.30 மணிக்கு சென்னை கலைவாணர் அரங்கில் நடைபெறும் விழாவில் துணை முதல்வர் உதயநிதி ஸ்டாலின் வழங்க உள்ளார். தமிழ்நாடு அரசால் தேர்ந்தெடுக்கப்பட்டுள்ள சிறந்த திரைப்படங்களுக்கு முதல் பரிசாக ரூ.2 இலட்சமும், இரண்டாம் பரிசாக ரூ.1 இலட்சமும், மூன்றாம் பரிசாக ரூ.75 ஆயிரமும், சிறப்புப் பரிசாக ரூ.75 ஆயிரமும், பெண்களைப்பற்றி உயர்வாகச் சித்தரிக்கும் படத்திற்குச் சிறப்புப் பரிசு ரூ.1.25 இலட்சமும் வழங்கப்படுத்துடன், சிறந்த நடிகர்/நடிகையர் சிறந்த தொழில்நுட்பக் கலைஞர்களுக்கு தலா 1 பவுன் தங்கப்பதக்கம், நினைவுப் பரிசு மற்றும் சான்றிதழும் வழங்கப்படுகின்றன.

இதேபோல் தமிழ்நாடு அரசால் தேர்ந்தெடுக்கப்பட்டுள்ள சின்னத்திரை சிறந்த நெடுந்தொடர்களுக்கு முதல் பரிசாக ரூ.2 இலட்சமும், இரண்டாம் பரிசாக ரூ.1 இலட்சமும், ஆண்டின் சிறந்த சாதனையாளர் பரிசாக ரூ.1 இலட்சமும், ஆண்டின் வாழ்நாள் சாதனையாளர் பரிசாக ரூ.1 இலட்சமும் வழங்கப்படுத்துடன், சிறந்த கதாநாயகன்/ கதாநாயகி, சிறந்த தொழில்நுட்பக் கலைஞர்களுக்கு தலா 1 பவுன் தங்கப்பதக்கம், நினைவுப்பரிசு மற்றும் சான்றிதழும் வழங்கப்படுகின்றன.