அதிகளவிலான தியேட்டர்களை தட்டித்தூக்கிய சர்தார்... தீபாவளி ரேஸில் பின்னுக்கு தள்ளப்பட்ட பிரின்ஸ் - காரணம் என்ன?

தீபாவளி என்றாலே புதுப்படங்கள் ரிலீசாவது வழக்கம். அதிலும் நிச்சயம் அஜித், விஜய், ரஜினி, சூர்யா போன்ற முன்னணி நடிகர்களின் படங்கள் ஏதாவது ஒன்று ரிலீசாகிவிடும். ஆனால் இந்த வருட தீபாவளி சற்று வித்தியாசமானதாக அமைந்துள்ளது. ஏனெனில் மேற்கண்ட முன்னணி நடிகர்களின் படங்கள் ஒன்று கூட இந்த ஆண்டு தீபாவளிக்கு ரிலீசாகவில்லை.

அவர்களுக்கு பதிலாக தற்போது தமிழ் சினிமாவில் வெற்றிநடைபோட்டு கொண்டிருக்கும் நடிகர்களான சிவகார்த்திகேயன் மற்றும் கார்த்தி ஆகியோரின் திரைப்படங்கள் நேருக்கு நேர் மோதிக்கொள்ள உள்ளனர். அதன்படி சிவகார்த்திகேயன் நடித்துள்ள பிரின்ஸ் படமும் கார்த்தி நடித்துள்ள சர்தார் படமும் வருகிற அக்டோபர் 21-ந் தேதி ரிலீசாக உள்ளது.

இவர்கள் இருவரது படங்கள் ஒரே நாளில் மோதிக்கொள்வது இது முதல்முறை அல்ல, இதற்கு முன் கடந்த 2019-ம் ஆண்டு சிவகார்த்திகேயனின் ஹீரோ படமும், கார்த்தி நடித்த தம்பி படமும் கிறிஸ்துமஸ் விடுமுறையில் நேருக்கு நேர் மோதின. ஆனால் இந்த இரண்டு படங்களும் எதிர்பார்த்த வெற்றியைப் பெறவில்லை.

இதையும் படியுங்கள்...  கோலிவுட் டூ பாலிவுட்.. தீபாவளிக்கு திரையரங்குகளில் பட்டாசாய் பட்டைய கிளப்ப காத்திருக்கும் படங்களின் லிஸ்ட் இதோ

ஆனால் இம்முறை இருவரும் வெற்றிபெறும் முனைப்போடு களமிறங்கி உள்ளனர். ஏனெனில் இவர் இருவரும் இதற்கு முன்னர் நடித்த இரண்டு படங்களும் பிளாக்பஸ்டர் ஹிட் ஆகின. அதனால் இந்தமுறையும் வெற்றிகண்டு ஹாட்ரிக் வெற்றியை பெறும் முனைப்பில் இருவரும் களமிறங்கி உள்ளனர்.

இதில் சர்தார் படத்தை உதயநிதியின் ரெட் ஜெயண்ட் மூவீஸ் நிறுவனம் வெளியிடுகிறது. அதேபோல் பிரின்ஸ் படத்தை மதுரை அன்புச்செழியனின் கோபுரம் பிலிம்ஸ் நிறுவனம் வெளியிட உள்ளது. இதில் யார் அதிக தியேட்டர்களை பிடிக்கப்போகிறார்கள் என்கிற எதிர்பார்ப்பு நிலவி வந்த நிலையில், தற்போதைய தகவல்படி சர்தார் படத்துக்கு தான் அதிக அளவிலான தியேட்டர்கள் ஒதுக்கீடு செய்யப்பட்டு உள்ளதாம்.

பிரின்ஸ் படத்திற்கும் 600 தியேட்டர்கள் வரை ஒதுக்கப்பட்டுள்ளதாக தகவல்கள் வந்தாலும், சர்தார் படத்தோடு ஒப்பிடுகையில் இது குறைவான அளவு தான் என கூறப்படுகிறது. சர்தார் படத்திற்கு அதிக அளவிலான தியேட்டர்கள் ஒதுக்கீடு செய்யப்பட்டதற்கு உதயநிதி தான் முக்கிய காரணம் என சொல்கிறார்கள். இதுதவிர பொன்னியின் செல்வன் ஓடி வரும் தியேட்டர்களையும் ஆக்கிரமிக்கும் முயற்சியில் ரெட் ஜெயண்ட் இறங்கி உள்ளதாக ஒரு தகவல் பரவி வருகிறது. இதனால் தீபாவளி ரேஸில் தற்போதைய நிலவரப்படி சர்தார் தான் முன்னிலை வகிக்கிறது.

இதையும் படியுங்கள்... 44 வயதிலும் பிட்னஸில் சூர்யாவுக்கே டஃப் கொடுக்கும் ஜோதிகா... வெறித்தனமாக ஒர்க் அவுட் செய்யும் வீடியோ வைரல்