ரூ.200 கோடி சென்னை பங்களா டூ மும்பையில் 1,700 சதுர அடி வீடு: சூர்யா - ஜோதிகா எடுத்த திடீர் முடிவின் பின்னணி என்ன?

ஸ்காட்லாந்தில் திருமண உறுதிமொழிகளைப் புதுப்பித்துக்கொண்ட சூர்யா – ஜோதிகா தம்பதி, ரூ.200 கோடி சென்னை பங்களாவை விட்டுவிட்டு மும்பையில் 1,700 சதுர அடி வீட்டில் குடியேறியதன் பின்னணி குறித்த தகவல் மீண்டும் கவனத்தைப் பெற்றுள்ளது.

Image Credit : x

ரூ.200 கோடி சென்னை பங்களா டூ 1,700 சதுர அடி மும்பை பிளாட்

ஸ்காட்லாந்தில் உள்ள 200 ஏக்கர் பரப்பளவிலான பிளேயர்குவான் (Blairquhan) கோட்டையில் நடிகர் சூர்யாவும் ஜோதிகாவும் அண்மையில் தங்களது 20-வது திருமண உறுதிமொழிகளைப் புதுப்பித்துக் கொண்டனர் (Renewed their vows). கிறித்துவ முறைப்படி நடைபெற்ற இந்த நிகழ்வின் புகைப்படங்கள் சமூக வலைதளங்களில் வெளியாகி வைரலான நிலையில், பலரும் இந்த நட்சத்திர தம்பதியின் அன்பைப் பாராட்டி வருகின்றனர்.

தற்காலத்தின் தற்காலிக மற்றும் நிலைத்தன்மையற்ற உறவுகளுக்கு மத்தியில், இவர்களது 20 ஆண்டுகால திருமண பந்தமும், தற்போது உறுதிமொழியைப் புதுப்பித்த தருணமும், உண்மையான அர்ப்பணிப்பு எப்போதுமே காலாவதியாகாது என்பதை மீண்டும் உணர்த்தி உள்ளது. இவர்களது திருமணப் புகைப்படங்கள் ஒருபுறம் பேசப்பட்டு வரும் நிலையில், ரூ.200 கோடி மதிப்புள்ள தங்களது சென்னை பங்களாவை விட்டுவிட்டு, மும்பையில் வெறும் 1,700 சதுர அடி கொண்ட அடுக்குமாடி குடியிருப்பில் குடியேறியது ஏன் என்பது குறித்து சூர்யா பகிர்ந்த பழைய நேர்காணல் ஒன்று தற்போது மீண்டும் கவனத்தைப் பெற்றுள்ளது.

Image Credit : x

சென்னை பங்களாவை விட்டு மும்பைக்கு மாறியது ஏன்?

சுமார் ஒரு வருடத்திற்கு முன்பு 'தி ஹாலிவுட் ரிப்போர்ட்டர்' (The Hollywood Reporter) தளத்திற்கு அளித்த பேட்டியில், கொரோனா காலகட்டத்தில் சென்னையை விட்டு மும்பைக்குக் குடிபெயர முடிவெடுத்ததற்கான காரணத்தை சூர்யா வெளிப்படையாகப் பகிர்ந்திருந்தார்.

ஜோதிகா குறித்து பேசிய சூர்யா, நான் மிகவும் வெளிப்படையாகவே பேசுகிறேன். தனது 18–19 வயதில் அவர் சென்னைக்கு வந்தார். 27 ஆண்டுகள் சென்னையில் வாழ்ந்த அவர், தனது வாழ்க்கையில் 18 ஆண்டுகள் மட்டுமே மும்பையில் கழித்திருந்தார். எனக்காகவும், எனது குடும்பத்துக்காகவும் அவர் என்னோடு சென்னையில் இருந்தார். தனது திரையுலக வாழ்க்கை, நண்பர்கள், உறவினர்கள் மற்றும் பாந்த்ரா வாழ்க்கை முறை என அனைத்தையும் விட்டுவிட்டு அவர் சென்னை வந்தார். மும்பைக்குக் குடிபெயர்ந்த பிறகு, 27 ஆண்டுகளுக்குப் பின் தனது பெற்றோருடன் அதிக நேரம் செலவிடும் வாய்ப்பு ஜோதிகாவுக்குக் கிடைத்துள்ளதாகவும் சூர்யா நெகிழ்ச்சியுடன் குறிப்பிட்டார்.

Image Credit : x

"ஆண்களுக்குத் தேவையான அனைத்தும் பெண்களுக்கும் தேவை"

தொடர்ந்து பேசிய சூர்யா, இந்த முடிவின் பின்னணியில் இருந்த சிந்தனையைப் பற்றிப் பகிர்ந்தார். ஒரு ஆணுக்கு என்னவெல்லாம் தேவையோ, அது எல்லாமே ஒரு பெண்ணுக்கும் தேவை. இதைப் புரிந்துகொள்ள எனக்குச் சற்று காலம் எடுத்திருக்கலாம். அவருக்கும் விடுமுறைகள், நண்பர்கள் வட்டம் மற்றும் பொருளாதார ரீதியான சுதந்திரம் தேவைப்படுகிறது. சுயமரியாதை, ஜிம் பயிற்சி, உடல் நலம் மற்றும் அவருக்கான தனிப்பட்ட நேரம் (Me time) ஆகியவை அவசியமானவை.

ஆண்களாகிய நாம் எவற்றையெல்லாம் விரும்புகிறோமோ, அவையெல்லாம் பெண்களுக்கும் தேவை. அவரது பெற்றோருடன் செலவிடும் நேரம், அவரது வாழ்க்கை முறை மற்றும் அவருக்குப் பிடித்த விஷயங்களை நாம் ஏன் பறிக்க வேண்டும்? அந்த மாற்றத்தை நாம் எப்போது செய்யப் போகிறோம்? எப்போதும் எனக்கானதாக மட்டுமே ஏன் இருக்க வேண்டும்? இந்தச் சிந்தனைதான் நாங்கள் மும்பை செல்வதற்குக் காரணமாக அமைந்தது. இப்போது ஒரு நடிகையாக அவரது வளர்ச்சியைப் பார்ப்பதில் எனக்கு மிக்க மகிழ்ச்சி என்றார்.

Image Credit : x

மும்பை வாழ்க்கை சூர்யாவுக்குப் பிடித்திருப்பது ஏன்?

சென்னையில் வெளியில் சென்றால் ரசிகர்கள் அடையாளம் கண்டு சூழ்ந்து கொள்வார்கள்; ஆனால், மும்பையில் சுதந்திரமாக வலம் வர முடிகிறது என்பதால் சூர்யாவும் அங்கு வாழ்வதை விரும்புகிறார். நடிகையும், சூர்யாவின் நெருங்கிய தோழியுமான ராதிகா சரத்குமார், விளம்பர நிகழ்வின்போது, மும்பை நகரம் சூர்யாவுக்கு மிகவும் பிடித்திருப்பதாக ஜோதிகா என்னிடம் கூறினார் எனக் குறிப்பிட்டிருந்தார்.

அதற்குப் பதிலளித்துப் பேசிய சூர்யா, சென்னையில் உள்ள ரூ.200 கோடி பங்களாவை விட மும்பையின் 1,700 சதுர அடி வீடு தனக்கு ஏன் அதிகம் பிடிக்கும் என்பதை விளக்கினார். மும்பை எனக்கு ஒரு விடுமுறைக் களம் போன்றது. நான் இங்கு (சென்னையில்) வேலை செய்கிறேன், ஓய்வுக்காக அங்கு (மும்பைக்கு) செல்கிறேன். அது ஒரு சிறிய வீடு; நாங்கள் 1,700 சதுர அடி வீட்டில்தான் வசிக்கிறோம்.

Image Credit : x

சூர்யா – ஜோதிகா எடுத்த நெகிழ்ச்சியான முடிவின் பின்னணி!

படுக்கையறைக்கு 2 அடிகள், வரவேற்பறைக்கு 2 அடிகள், சமையலறைக்கு 2 அடிகள், டைனிங் பகுதிக்கு 2 அடிகள்... எல்லாமே மிக அருகில் இருக்கும் ஓர் அழகான, கதகதப்பான வீடு அது. அந்த வீடு எங்களுக்கு மிகுந்த மன அமைதியையும், ஏராளமான நினைவுகளையும், அளவற்ற அன்பையும் தருகிறது. தியா அல்லது தேவை உடனடியாக அழைக்க முடியும்; அவர்கள் ஒரு அடி தூரத்தில்தான் இருக்கிறார்கள்.

நாங்கள் அங்கு என்ன செய்கிறோம் என்பது பலருக்குத் தெரியாது என்பதால், அது மிகவும் நிம்மதியாக இருக்கிறது. மும்பைக்குக் குடிபெயர்ந்த பிறகு சூர்யாவும் ஜோதிகாவும் மிகுந்த மகிழ்ச்சியுடன் இருப்பதாக ராதிகாவும் தெரிவித்தார். தங்களின் இந்த இடமாற்றம் குறித்து மேலும் பேசிய சூர்யா, முதன்மை நோக்கம் ஜோதிகாவின் பெற்றோருடன் நேரம் செலவழிப்பது தான். அதே நேரத்தில் அங்கு சினிமா தொடர்பான பணிகளும் தொடர்ந்து நடைபெற்று வருகின்றன என்று தெரிவித்தார்.