2022 கூகுளில் அதிகம் தேடப்பட்ட ஒரே தமிழ் படம் எது தெரியுமா? டாப் 10 லிஸ்ட் இதோ..!

2022 ஆம் ஆண்டு கூகுளில் இந்தியாவில் அதிகம் தேடப்பட்ட படங்கள் குறித்த டாப் 10 பட்டியல் தற்போது வெளியாகியுள்ளது.  இந்த லிஸ்டில் ஒரே ஒரு தமிழ் படம் மட்டுமே இடம்பெற்றுள்ளது குறிப்பிடத்தக்கது.  

கடந்த இரண்டு வருடங்களாக, கொரோனாவின் கோர பிடியில் சிக்கியதால் திரையரங்குகளில் எந்த படங்களும் வெளியாகாத நிலையில், 2022 ஆம் ஆண்டு திரையரங்க உரிமையாளர்கள் வாழ்க்கையில் மீண்டும் வசந்த காலத்தை துவக்கி வைத்த ஆண்டு என்று சொன்னால் அது மிகையல்ல.

காரணம், திரையரங்குகள் கடந்த 2 வருடங்களாக செயல்படாமல் போனதால்... திரையரங்க உரிமையாளர்கள் தொழில் ரீதியாகவும், மன ரீதியாகவும் மிகவும் பாதிக்க பட்டனர். அதே போல், திரையரங்கங்களில் வேலை செய்த தொழிலாளர்களும் வேலையின்றி சாப்பாட்டிற்கே கஷ்டப்படும் சூழ்நிலை உருவானது. ஆனால் இந்த ஆண்டு கொரோனா அச்சம் குறைந்ததால் மீண்டும் திரையரங்குகள் முழு வீச்சின் செயல்பட்டு வருகிறது.

இந்நிலையில் 2022 ஆம் ஆண்டு முடிவடைய உள்ள நிலையில், இந்தியாவில்... அதிகம் தேடப்பட்ட டாப் 10 படங்களின் பட்டியலை தற்போது கூகுள் நிறுவனம் வெளியிட்டுள்ளது. இதில் இந்தி, கன்னடம், தெலுங்கு, தமிழ் போன்ற பல மொழிகளின் படங்களும் இடம்பெற்றுள்ளது. குறிப்பாக தமிழில் கமல்ஹாசன் நடிப்பில் வெளியான 'விக்ரம்' படத்தை தான் பலர் அதிகம் தேடி உள்ளனர் என கூகுள் அறிவித்துள்ளது.

இந்த லிஸ்டில், ரன்பீர் கபூர் - ஆலியாபட் ஜோடி நடித்த பிரம்மாஸ்திரா: பார்ட் 1 திரைப்படம் முதல் இடத்தை பிடித்துள்ளது. இரண்டாவது இடத்தில் யாஷ் நடிப்பில் வெளியாகி சூப்பர் டூப்பர் ஹிட் அடித்த  K.G.F: சேப்டர் 2 திரைப்படம் உள்ளது. மூன்றாவது இடத்தை பல்வேறு சர்ச்சைகளுக்கு வித்திட்ட காஷ்மீர் பைல்ஸ் திரைப்படம் பிடித்துள்ளது.

நான்காவது இடத்தில் ராஜமௌலி இயக்கிய RRR படமும், ஐந்தாவது இடத்தில் ரிஷப் ஷெட்டி இயக்கி நடித்த காந்தாரா திரைப்படம் உள்ளது. ஆறாவது இடத்தில் கடந்த ஆண்டு வெளியான புஷ்பா: தி ரைஸ் திரைப்படமும், ஏழாவது இடத்தில் இயக்குனர் லோகேஷ் கனகராஜ் இயக்கத்தில், கமல் நடிப்பில் வெளியான விக்ரம் படமும் உள்ளது. 

அதே போல் எட்டாவது இடத்தில், நடிகர் அமீர் கான் நடிப்பில் வெளியாகி படுதோல்வியை சந்தித்த பாலிவுட் திரைப்படமான  லால் சிங் சத்தா உள்ளது. ஒன்பதாவது இடத்தில் அஜய் தேவ்கன் நடிப்பில் வெளியான  த்ரிஷ்யம் 2 படமும், 10 ஆவது இடத்தில தோர்: லவ் அண்ட் தண்டெர் ஆகிய படங்கள் உள்ளது குறிப்பிடத்தக்கது.