கைமாறும் எஸ்.டி.ஆர் 49? வம்பில் சிக்கிய ஆகாஷ் பாஸ்கரன்; நைசாக எஸ்கேப் ஆனாரா சிம்பு?
சிம்புவின் 49வது படத்தை ஆகாஷ் பாஸ்கரன் தயாரிக்க உள்ளதாக அறிவிப்பு வெளியாகி இருந்த நிலையில், தற்போது அதில் திடீர் மாற்றம் ஏற்பட்டுள்ளதாக தகவல் பரவி வருகிறது.
Simbu's STR 49 Movie Update :
தமிழ் திரையுலகில் பிசியான நடிகராக வலம் வருபவர் சிம்பு. இவர் நடிப்பில் தக் லைஃப் திரைப்படம் தற்போது உருவாகி உள்ளது. இப்படத்தை மணிரத்னம் இயக்கி உள்ளார். இதில் நடிகர் கமல்ஹாசனின் மகனாக நடித்துள்ளார் சிம்பு. மேலும் இதில் திரிஷா, அபிராமி, நாசர் என மிகப்பெரிய நட்சத்திர பட்டாளமே நடித்துள்ளது. தக் லைஃப் திரைப்படத்திற்கு இசைப்புயல் ஏ.ஆர்.ரகுமான் இசையமைத்துள்ளார். இப்படம் வருகிற ஜூன் 5ந் தேதி திரைக்கு வர உள்ளது. அதன் புரமோஷன் பணிகளில் தற்போது பிசியாக உள்ளார் சிம்பு.
சிம்புவின் அடுத்த படம் எஸ்.டி.ஆர் 49
தக் லைஃப் படத்தை தொடர்ந்து நடிகர் சிம்பு கமிட்டான படம் எஸ்.டி.ஆர்.49. இப்படத்தை பார்க்கிங் பட இயக்குனர் ராம்குமார் இயக்க உள்ளதாகவும், டான் பிக்சர்ஸ் நிறுவனம் சார்பில் ஆகாஷ் பாஸ்கரன் தயாரிக்க உள்ளதாகவும் அறிக்கப்பட்டு, கடந்த மாதம் இப்படத்திற்கு பூஜையும் போடப்பட்டது. அதில் நடிகர் சிம்புவுக்கு ஜோடியாக கயாடு லோகர் நடிக்க உள்ளதாகவும், நீண்ட இடைவெளிக்கு பின்னர் நடிகர் சந்தானம் இப்படத்தில் காமெடியனாக நடிப்பதாகவும் அறிவிக்கப்பட்டது. இப்படத்திற்கு சாய் அபயங்கர் இசையமைக்க இருந்தார்.
கைமாறுகிறதா எஸ்.டி.ஆர் 49?
எஸ்.டி.ஆர் 49 படத்தின் படப்பிடிப்பை ஜூன் மாதம் தொடங்க படக்குழு திட்டமிட்டிருந்த நிலையில், கடந்த மாதம் நடைபெற்ற அமலாக்கத்துறை சோதனையில் ஆகாஷ் பாஸ்கரன் சிக்கியதால், அவர் தயாரிக்கும் படங்களுக்கு சிக்கல் ஏற்பட்டு உள்ளது. இதனால் எஸ்.டி.ஆர் 49 திரைப்படம் திட்டமிட்டபடி தொடங்குவதில் சிக்கல் ஏற்பட்டு உள்ளது. இதனால் அப்படத்திற்கு கொடுத்த கால்ஷீட்டில் வேறு ஒரு படம் நடிக்க முடிவெடுத்துள்ளாராம் சிம்பு. இதனால் எஸ்.டி.ஆர் 49 படம் கைமாறி உள்ளதாக தகவல் கசிந்துள்ளது.
எஸ்.டி,ஆர் 49 படத்தின் இயக்குனர் யார்?
அதன்படி தக் லைஃப் படத்தின் இயக்குனர் மணிரத்னம் தான் எஸ்.டி.ஆர் 49 படத்தை இயக்க உள்ளதாக பேச்சு அடிபடுகிறது. ரொமாண்டிக் படமாக இது உருவாக உள்ளதாகவும். இப்படத்தில் சிம்புவுக்கு ஜோடியாக ருக்மினி வசந்த் நடிக்க இருப்பதாகவும் தகவல்கள் தெரிவிக்கின்றன. மேலும் இப்படத்தை லைகா நிறுவனம் தயாரிக்க உள்ளதாகவும் கூறப்படுகிறது. ஏற்கனவே மணிரத்னம் இயக்கத்தில் தக் லைஃப், செக்கச் சிவந்த வானம் போன்ற படங்களில் நடித்துள்ள சிம்பு, இதன்மூலம் மூன்றாவது முறையாக கூட்டணி அமைக்க உள்ளாராம். இப்படம் குறித்த அறிவிப்பு விரைவில் வெளியாகும் என எதிர்பார்க்கப்படுகிறது.