கர்நாடகாவில் தக் லைஃப் படத்துக்கு தடை விதித்தால் எத்தனை கோடி நஷ்டம் ஏற்படும் தெரியுமா?
கமல்ஹாசன் நடித்த தக் லைஃப் படத்துக்கு கர்நாடகாவில் தடைவிதிக்கப்பட்டால் அப்படத்திற்கு எவ்வளவு நஷ்டம் ஏற்படும் என்பதைப் பற்றி பார்க்கலாம்.
Thug Life Release Controversy
கன்னட மொழி தமிழ் மொழியில் இருந்து தோன்றியது என்று கூறியதால் கன்னடர்களின் கோபத்திற்கு ஆளான நடிகர் கமல்ஹாசன் வெள்ளிக்கிழமைக்குள் மன்னிப்பு கேட்க வேண்டும். இல்லையெனில், அவரது திரைப்படம் 'தக் லைஃப்' கர்நாடகாவில் வெளியிடப்படாது என்று கன்னட திரையுலகம் எச்சரிக்கை விடுத்துள்ளது. கமல்ஹாசனின் பிடிவாதத்தின் காரணமாக, கன்னட திரைப்பட வர்த்தக சபையில் வியாழக்கிழமை கூட்டம் நடைபெற்றது.
மன்னிப்பு கேட்காவிட்டால் தக் லைஃப் படத்துக்கு தடை
பின்னர் செய்தியாளர் சந்திப்பில் பேசிய முன்னாள் தலைவர் சா.ரா. கோவிந்து, 'கமல்ஹாசனின் பிடிவாதத்தைப் பார்த்திருக்கிறேன். அவர் மன்னிப்பு கேட்காமல் இங்கு எப்படி படம் வெளியிடுவார் என்று பார்ப்போம். விநியோகஸ்தர்களும் எங்களுடன் கைகோர்ப்பார்கள் என்று நம்புகிறோம். கமல் மீது எந்த இரக்கமும் இல்லை' என்றார். 'யார் கன்னடத்தைப் பற்றித் தவறாகப் பேசினாலும் நாங்கள் சகித்துக் கொள்ள மாட்டோம். அவர் நாளைக்குள் (வெள்ளிக்கிழமை) மன்னிப்பு கேட்கவில்லை என்றால், படத்தை வெளியிட அனுமதிக்க மாட்டோம்.
கமலுக்கு கெடு விதித்த கன்னட திரைப்பட வர்த்தக சபை
ஏற்கனவே கன்னட அமைப்புகள், கன்னட மேம்பாட்டு ஆணையத்தினர் கமலின் நிலைப்பாட்டைக் கண்டித்துள்ளனர். இப்போது நாம் அனைவரும் ஒற்றுமையாகவும் பொறுப்புடனும் நம் மொழி மற்றும் நாட்டின் மீது அக்கறை காட்ட வேண்டும். எனவே அவர் மன்னிப்பு கேட்கவில்லை என்றால் அவரது படம் வெளியாகாது. அடுத்த நாளில் என்ன பிரச்சனைகளை சந்திப்பாரோ சந்திக்கட்டும்' என்றார். வர்த்தக சபைத் தலைவர் நரசிம்மலு, 'கமல் மன்னிப்பு கேட்க வேண்டும்' என்று வலியுறுத்தினார்.
தக் லைஃப் படத்துக்கு எவ்வளவு நஷ்டம் ஏற்படும்?
கமல்ஹாசன் மன்னிப்பு கேட்கப்போவதில்லை என்கிற முடிவில் தீர்க்கமாக இருக்கிறார். இதனால் தக் லைஃப் திரைப்படம் கர்நாடகாவில் வெளியிடப்பட வாய்ப்புகள் மிகவும் குறைவு. ஒரு வேளை கர்நாடகாவில் தக் லைஃப் திரைப்படம் ரிலீஸ் ஆகாவிட்டால், நடிகர் கமல்ஹாசனுக்கு ரூ.20 கோடி வரை இழப்பு ஏற்பட வாய்ப்பு உள்ளதாம். அந்த இழப்பு ஏற்பட்டாலும் பரவாயில்லை, மற்ற மொழிகளில் கூடுதலாக புரமோஷன் செய்து அந்த காசை எடுத்துவிடலாம் என்கிற ஐடியாவில் உள்ளாராம் கமல். மணிரத்னம் இயக்கிய தக் லைஃப் திரைப்படம் வருகிற ஜூன் 5ந் தேதி திரைக்கு வர உள்ளது.