2 மனைவிகளால் தர்மேந்திராவின் 450 கோடி சொத்துக்களை பிரிப்பதில் சிக்கலா? சொத்து யாருக்கு சொந்தம்?

பாலிவுட் திரையுலகின் சூப்பர்ஸ்டாராக வலம் வந்த தர்மேந்திரா தன்னுடைய 89 வயதில் காலமான நிலையில், அவரின் 450 கோடி மதிப்பிலான சொத்துக்கள் யாருக்கு செல்லும் என்பதை பார்க்கலாம்.

Image Credit : Instagram

Dharmendra 450 Crore Property

பாலிவுட்டின் 'ஹீ-மேன்' தர்மேந்திராவின் (Dharmendra) மறைவுக்கு ஒட்டுமொத்த திரையுலகமும் இரங்கல் தெரிவித்து வருகிறது. நீண்ட நாட்களாக உடல்நலக்குறைவால் பாதிக்கப்பட்டிருந்த தர்மேந்திரா, தனது 89வது வயதில் காலமானார். இரண்டு மனைவிகள் மற்றும் ஆறு பிள்ளைகளைக் கொண்ட தர்மேந்திரா, 400 முதல் 450 கோடி ரூபாய் மதிப்பிலான சொத்துக்களுக்கு அதிபர். 1960-ல் 'தில் பி தேரா ஹம் பி தேரே' படம் மூலம் திரையுலகில் நுழைந்த தர்மேந்திரா, அதன் பிறகு திரும்பிப் பார்க்கவே இல்லை. சுமார் 65 ஆண்டுகள் பாலிவுட்டில் கோலோச்சிய தர்மேந்திரா, 'பாலிவுட் தாதா' என்றும் அழைக்கப்பட்டார்.

Image Credit : instagram

450 கோடி ரூபாய் சொத்துக்களுக்கு அதிபதி தர்மேந்திரா

தர்மேந்திரா தனது வயோதிக காலத்திலும் நடிப்பதை நிறுத்தவில்லை. அவரது கடைசிப் படம் 'இக்கீஸ்'. இந்தப் படம் இன்னும் வெளியாகவில்லை. மேடாக் ஃபிலிம்ஸ் 'இக்கீஸ்' படத்தின் புதிய போஸ்டரை வெளியிட உள்ளது. தர்மேந்திராவின் குரலில் பட போஸ்டர் வெளியாகியுள்ளது. தர்மேந்திரா சினிமாவை மட்டும் நம்பி இருக்கவில்லை. பிராண்ட் விளம்பரங்கள் மற்றும் தொழில்களில் முதலீடு செய்வதன் மூலம் வருமானம் ஈட்டி வந்தார். அவர் 'கரம்-தரம்' என்ற பிரபலமான உணவகமும் வைத்திருந்தார். 'கரம்-தரம்' பல நகரங்களில் உணவகங்களைக் கொண்டுள்ளது. தர்மேந்திராவுக்கு மும்பையில் ஒரு சொகுசு பங்களாவும், கண்டாலா மற்றும் லோனாவாலாவில் பண்ணை வீடுகளும் உள்ளன. அவர் தனது பண்ணை வீட்டில்தான் வசித்து வந்தார்.

Image Credit : Instagram

இரண்டு மனைவிகள், ஆறு பிள்ளைகளின் தந்தை தர்மேந்திரா

நடிகர் தர்மேந்திராவுக்கு இரண்டு மனைவிகள். அவரது முதல் திருமணம் பிரகாஷ் கவுருடன் நடந்தது. இவர்களுக்கு சன்னி தியோல், பாபி தியோல், அஜிதா தியோல் மற்றும் விஜேதா தியோல் என நான்கு பிள்ளைகள் உள்ளனர். பிரகாஷ் கவுருக்குப் பிறகு ஹேமமாலினியை இரண்டாவதாகத் திருமணம் செய்துகொண்டார். இவர்களுக்கு இஷா தியோல் மற்றும் அஹானா தியோல் என இரண்டு மகள்கள் உள்ளனர். தர்மேந்திராவின் சொத்து பிரிக்கப்பட்டால், யாருக்கு எவ்வளவு பங்கு கிடைக்கும் என்ற கேள்வி எழுகிறது.

Image Credit : SOCIAL MEDIA

தர்மேந்திராவின் சொத்தில் யாருக்குப் பங்கு?:

இதுகுறித்து டெல்லி உயர்நீதிமன்ற வழக்கறிஞர் கமலேஷ் குமார் மிஸ்ரா கூறுகையில், "2023-ம் ஆண்டு ரேவணசித்தப்பா எதிர் மல்லிகார்ஜுன் வழக்கின் தீர்ப்பின்படி, இந்து திருமணச் சட்டத்தின் கீழ் ஒருவரின் இரண்டாவது திருமணம் செல்லாது எனக் கருதப்பட்டாலும், அந்தத் திருமணத்தின் மூலம் பிறந்த குழந்தைகள் சட்டப்பூர்வமானவர்களாகவே கருதப்படுவார்கள். சட்டப்பிரிவு 16(1)-ன் கீழ், இந்தக் குழந்தைகளுக்குத் தங்கள் பெற்றோரின் சொத்தில் முழு உரிமை உண்டு. ஆனால், இது பெற்றோரின் சுயசம்பாத்திய சொத்துக்களுக்கு மட்டுமே பொருந்தும், பூர்வீகச் சொத்துக்களுக்குப் பொருந்தாது.

தர்மேந்திராவின் மறைவுக்குப் பிறகு, அவரது சொத்துக்கள் அனைத்து சட்டப்பூர்வ வாரிசுகளுக்கும் சமமாகப் பிரிக்கப்படும். தர்மேந்திராவின் முதல் மனைவி பிரகாஷ் கவுரின் பிள்ளைகளான சன்னி தியோல், பாபி தியோல், அஜிதா தியோல், விஜேதா தியோல் மற்றும் இரண்டாவது திருமணத்தின் மூலம் பிறந்த மகள்களான இஷா தியோல், அஹானா தியோல் ஆகியோருக்கு தர்மேந்திராவின் சொத்தில் சம உரிமை உண்டு. ஆனால், இந்து திருமணச் சட்டத்தின்படி ஹேமமாலினியுடனான அவரது இரண்டாவது திருமணம் செல்லாததாகக் கருதப்பட்டால், ஹேமமாலினிக்கு தர்மேந்திராவின் சொத்தில் பங்கு கிடைக்காது."