கேட்டாலே நிம்மதி தரும் கண்ணதாசனின் டாப் 10 ஹிட்ஸ்.! மொத்தம் பத்து.! அத்தனையும் லட்டு.!
கவியரசு கண்ணதாசனின் வரிகள் காலத்தை வென்று இன்றும் நம் உணர்வுகளின் மொழியாக ஒலிக்கின்றன. காதல், தத்துவம், சோகம் என வாழ்வின் பல்வேறு தருணங்களுக்கு உயிரூட்டிய, என்றும் மறையாத அவரின் 10 திரைக்காவியப் பாடல்களை இந்தக் கட்டுரை அலசுகிறது.
திரையுலகின் 'கால' இயந்திரம்!
தமிழ் சினிமா வரலாற்றில் எத்தனையோ 'சூப்பர் ஸ்டார்களும்' 'உலக நாயகர்களும்' வந்து போகலாம். ஆனால், அவர்கள் பேசும் வசனங்களுக்கும், அவர்கள் பாடும் உணர்வுகளுக்கும் உயிர் கொடுத்த ஒரு 'நிழல் அரசன்' உண்டு. அவர்தான் கவியரசு கண்ணதாசன். வெறும் வார்த்தைகளை கோர்ப்பது கவிதை அல்ல; ஒரு மனிதனின் கண்ணீரை மையினால் நனைத்து காகிதத்தில் வடிப்பதுதான் கவிதை என்று நிரூபித்தவர். "நான் நிரந்தரமானவன் அழிவதில்லை" என்று அவர் சொன்னது வெறும் வசனமல்ல, அது தமிழ் திரையிசைக்கு அவர் இட்ட கட்டளை! 1981-ல் அவர் மறைந்தாலும், இன்றும் ஒரு காதலன் தோற்கும்போதும், ஒரு தத்துவவாதி ஜெயிக்கும்போதும் கண்ணதாசனின் வரிகளே பின்னணி இசையாக ஒலிக்கின்றன. இதோ, காலத்தை வென்ற அந்த 10 பாடல்களின் திரைப்பயணம்!
வசந்த மாளிகை – 'யாருக்காக... இது யாருக்காக?'
ஒரு கையில் மதுக்கிண்ணம், மறு கையில் உடைந்த இதயம் என சிவாஜி கணேசனின் விஸ்வரூப நடிப்பு ரசிகர்களை கட்டிப்போட்டது. காதலில் தோற்றவனுக்கு இந்த உலகம் ஒரு சுடுகாடாகத் தெரியும் என்பதை, "உடல் செத்துப்போனால் ஒருமுறை தூக்கம், மனம் செத்துப்போனால் தினமொரு தூக்கம்" என்ற வரிகளில் மரண மாஸாகப் பதிவு செய்திருப்பார் கவிஞர் கண்ணதாசன். இந்த பாடலை காதலிக்காதவர்கள் கேட்டால் கண்டிப்பாக காதலிக்க தொடங்குவர், பாட்டில் மயங்குவர்.
தில்லுமுல்லு – 'ராகங்கள் 16'
ஒரு குறும்பான காதலனாக ரஜினி, இசை கற்றுக்கொடுக்கும் பாவனையில் செய்யும் கலாட்டா நம்மையும் ரசிக்க வைக்கும். MSV-யின் இசையில், ராகங்களின் பெயர்களைச் சொல்லிக்கொண்டே காதலைச் சொல்லும் இந்தப் பாடல், கண்ணதாசனின் இளமைத் துள்ளலுக்கு ஒரு சான்று.
முள்ளும் மலரும் – 'செந்தாழம் பூவில்'
மலைச்சாலையில் ரஜினியின் ஸ்டைலான பயணம், கேமரா கோணங்களில் விரியும் இயற்கை அழகு நம்மை உசுப்பிவிடும். இளையராஜாவின் இசை மழையில், யேசுதாஸின் குரலில் "இதழோரம் ஒரு ராகம்..." என்று கேட்கும் போது, நாம் அறியாமலேயே ஒரு மலைப் பிரதேசத்திற்குள் நுழைகிறோம். அழகான வார்த்தைகளை கொண்டு நம்மை மயக்கி இருப்பார் கவிஞர்.
சூர்யகாந்தி – 'பரமசிவன் கழுத்தில் இருந்து...'
திரையில் கவிஞரே தோன்றுகிறார்! மதுவும் மங்கையரும் சூழ அவர் சொல்லும் தத்துவம் கண்டிப்பாக அனைவருக்கும் பிடித்திருக்கும். "நீயும் நானும் இருக்கின்ற நிலைமைக்கு அவசரப்படக் கூடாது" - அரசியல் முதல் தனிப்பட்ட வாழ்க்கை வரை எல்லா இடங்களுக்கும் பொருந்தும் ஒரு 'யதார்த்த' ஹிட்!
பாலும் பழமும் – 'நான் பேச நினைப்பதெல்லாம்'
சிவாஜி - சரோஜாதேவியின் எவர்-கிரீன் ரொமான்ஸ் பாட்டு இப்போது கேட்டாலும் உள்ளத்தை மயக்கும். வார்த்தைகள் தேவைப்படாத காதலுக்கு, வார்த்தைகளால் உயிர் கொடுத்திருப்பார் கவிஞர் கண்ணதாசன். "உயிரோடு உயிர் சேரும் உறவல்லவா" - இது இன்றும் திருமண வீடுகளின் தேசிய கீதம் என்றால் அது மிகையல்ல!
கர்ணன் – 'உள்ளத்தில் நல்ல உள்ளம்'
போர்க்களத்தில் அம்பு பட்டுச் சாயும் கர்ணன், எதிரில் சிரித்துக் கொண்டே நிற்கும் கிருஷ்ணன். அப்போது வரும் பாட்டு காண்போரை மெய்மறக்க செய்யும். "செஞ்சோற்றுக் கடன் தீர்க்க சேராத இடம் சேர்ந்து..." - நட்பின் இலக்கணத்தை இதைவிட உருக்கமாக யாராலும் சொல்ல முடியாது. மகாபாரதத்தின் சாரத்தையே ஒரு பாடலில் வடித்திருப்பார்.
ஆண்டவன் கட்டளை – 'ஆறுமனமே ஆறு'
வாழ்க்கையில் அடிபட்டு சோர்ந்து போய் நிற்கும் ஒரு மனிதனுக்கு இந்த பாடல் தரும் ஞானோதயம்.இது பாடல் அல்ல, ஒரு வாழ்வியல் தெரபி "இழந்தவன் பெறுவான், பெற்றவன் இழப்பான்" - திரையில் சிவாஜி பாடும்போது, தியேட்டரில் இருந்த அத்தனை பேருக்கும் அது ஆறுதல் மருந்தாக அமைந்தது.
பாவமன்னிப்பு – 'காலங்களில் அவள் வசந்தம்'
கோட்-சூட் அணிந்த ஜெமினி கணேசன், ஒரு கவிஞனாகவே மாறி வர்ணிக்கும் காட்சி காதல் வயப்பட்டுள்ளோருக்கு தீனி. ஒரு பெண்ணை எப்படியெல்லாம் வர்ணிக்கலாம் என்பதற்கு இதுவே 'இலக்கணம்'. பி.பி.ஸ்ரீனிவாஸின் அந்த காந்தக் குரல், கண்ணதாசனின் வரிகளுக்குக் கூடுதல் போதையைத் தருகிறது.
மூன்றாம் பிறை – 'கண்ணே கலைமானே'
கமலஹாசனின் தவிப்பு, குழந்தையாக மாறிய ஸ்ரீதேவியின் மடியில் அவர் பாடும் தாலாட்டு நம்மையும் குழந்தையாக்கும். இது கவிஞரின் கடைசி பாடல். "உன் மடியில் நான் உறங்க வேண்டும்" என்று அவர் எழுதிய சில நாட்களிலேயே மறைந்தது, இந்தப் பாடலை ஒரு தீராத சோக காவியமாக மாற்றியது.
ஏணிப்படிகள் – 'பூந்தேனில் கலந்து...'
மென்மையான மாலை நேரத் தென்றல், சிவகுமார் - ஷோபாவின் கவித்துவமான காதல் நம்மை வசீகரிக்கும். ஒரே மெட்டு, ஆனால் உணர்வுகள் வேறு. SPB பாடும்போது அது தேன் நிலவு; பி.சுசிலா பாடும்போது அது கண்ணீர்த் துளி. காதலின் இரு துருவங்களையும் ஒரே பாடலில் அடக்கிய வித்தை இது. உழைப்பையும், காதலையும் அப்படியே கண்முன் நிறுத்திய பாடம். அதற்கு உயிர் கொடுத்தது கவிஞர் வரிகள்.
திரை மறைந்தாலும் வரிகள் மறையாது!
கண்ணதாசன் ஒரு மந்திரவாதி. அவர் பேனா முனையில் இருந்து கொட்டியது வெறும் மையல்ல, அது நம் ஒவ்வொருவரின் ரசனைமொழி. அதனால்தான், இந்தப் பத்து பாடல்களும் இன்றும் யூடியூப் மற்றும் ஸ்பாட்டிஃபை தளங்களில் 'ட்ரெண்டிங்கில்' இருக்கின்றன. கேட்டாலே நிம்மதி தரும் இந்த 'கவியரசு மேஜிக்' என்றும் குறையாது!
தமிழ் சினிமா (Tamil Cinema News), டிவி நிகழ்ச்சிகள் (Tamil TV Shows), செலிபிரிட்டி செய்திகள் மற்றும் சமீபத்திய அப்டேட்களுக்காக ஏஷ்யாநெட் தமிழ் நியூஸின் பொழுதுபோக்கு பிரிவை ஆராயுங்கள். சினிமா விமர்சனங்கள் (Tamil Movies Review), நட்சத்திரங்களின் நேர்காணல்கள், தொடர்களில் நடக்கும் ட்ராமா மற்றும் பொழுதுபோக்கு உலகின் டிரெண்ட்ஸ்பாட்டிங்குடன் எப்போதும் புதுப்பித்த நிலையில் இருங்கள். திரையரங்குப் பின்னணி கதைகள்,டிரெய்லர் வெளியீடுகள்மற்றும் ரெட் கார்பெட் தருணங்களை அறிந்து கொள்ளுங்கள்.
