ஜோதிகா தான் கரெக்டா இருக்கும்.. சூர்யாவால் ஒதுக்கப்பட்ட அசின்.. செய்யாறு பாலு சொன்ன தகவல்..

2004-ம் ஆண்டு வெளியான எம்.குமரன் சன் ஆஃப் மகாலட்சுமி படத்தின் மூலம் தமிழ் திரையுலகில் அறிமுகமானவர் நடிகை அசின். கேரளாவை பூர்வீகமாக கொண்ட அவர் அந்த படத்தில் மலையாளப் பெண்ணாக நடித்து அனைவரின் கவனத்தையும் ஈர்த்திருப்பார். அந்த படம் வசூல் ரீதியிலும் விமர்சன ரீதியிலும் மிகப்பெரிய வெற்றி பெற்ற நிலையில் அசினுக்கு அடுத்தடுத்து பட வாய்ப்புகள் குவிந்தன. தொடர்ந்து விஜய், அஜித், சூர்யா, விக்ரம், கமல் என பல முன்னணி நடிகர்களுடன் ஜோடி சேர்ந்தார்.

மஜா, சிவகாசி, போக்கிரி, ஆழ்வார், வேல், தசாவதாரம் என பல படங்களில் நடித்தார். குறிப்பாக சூர்யா நடிப்பில், ஏ. ஆர் முருகதாஸ் இயக்கத்தில் வெளியான கஜினி படத்தில் அசினின் கல்பனா கதாப்பாத்திரம் வெகுவாக பாராட்டப்பட்டது. அசினின் நடிப்பு திறமைக்கு மிகச்சிறந்த உதாரணமாக கஜினி படம் அமைந்தது. 

தொடர்ந்து பாலிவுட்டில் நடிக்கவும் அசினுக்கு வாய்ப்பு கிடைத்தது. ஹிந்தியிலும் ஆமீர்கான், சல்மான் கான், அக்‌ஷய் குமார் போன்ற முன்னணி நடிகர்களுடன் ஜோடி சேர்ந்து ஹிந்தி திரையுலகில் உச்சத்தில் இருந்தார். இதனிடையே 2016-ம் ஆண்டு மைக்ரோமேக்ஸ் இணை நிறுவனர் ராகுல் ஷர்மாவை திருமணம் செய்தார். திருமணத்திற்கு பிறகு படங்களில் நடிப்பதை நிறுத்திவிட்ட அசினுக்கு அரின் என்ற பெண் குழந்தை உள்ளது.

இந்த நிலையில் சினிமா பத்திரிகையாளர் செய்யாறு பாலு அசின் குறித்து தனியார் ஊடகம் ஒன்றுக்கு பேட்டியளித்துள்ளார். அப்போது பேசிய அவர் “ சூர்யா ஜோதிகா நடிப்பில் வெளியான சில்லுனு ஒரு காதல் படத்தில் நடிக்க முதலில் அசினிடம் பேச்சுவார்த்தை நடந்தது. இந்த படத்தில் 2 ஹீரோயின்கள் என்றும், அதில் அசினுக்கு ஐஷு என்ற கேரக்டர் என்றும் கூறினார்கள். ஆனால் அசினோ தனக்கு ஜோதிகா நடித்த குந்தவை கேரக்டர் தான் வேண்டும் என்று கூறியுள்ளார்.

ஆனால் படக்குழுவினர், அந்த கேரக்டரில் ஜோதிகா தான் நடிக்க வேண்டும் என்று சூர்யா திட்டவட்டமாக இருபப்தாக கூறிவிட்டனர். ஆனால் அசினோ குந்தவை கேரக்டர் என்றால் நடிக்கிறேன், மற்ற கேரக்டர் என்றால் வேண்டாம் என்று கூறி மறுத்துவிட்டார். அந்த கேரக்டரில் ஜோதிகா தான் நடிக்க வேண்டும் என்று சூர்யா உறுதியாக இருந்ததால் அதில் அசின் நடிக்கவில்லை. அதன்பிறகே அதில் பூமிகா நடித்தார்” என்று தெரிவித்தார்.