அடுத்த படம் எப்போது தொடங்கும்? ஏகே 64 பற்றி சுடசுட அப்டேட் வெளியிட்ட அஜித்
நடிகர் அஜித் குமார் தான் அடுத்ததாக நடிக்க உள்ள ஏகே 64 திரைப்படத்தின் படப்பிடிப்பு எப்போது தொடங்கும் என்பதைப் பற்றி பேட்டி ஒன்றில் பேசி இருக்கிறார்.
Ajithkumar AK64 Movie Update
கோலிவுட்டின் ஸ்டைலிஷ் ஹீரோவான அஜித் சமீபத்தில் 'குட் பேட் அக்லி' படத்தின் மூலம் கம்பேக் கொடுத்தார். 'விடாமுயற்சி' படத்தின் தோல்விக்குப் பிறகு, இந்தப் படம் அவருக்கு மிகப்பெரிய வெற்றியைத் தேடித் தந்தது; அஜித் ரசிகர்களுக்கும் 'குட் பேட் அக்லி' படம் விருந்தாக அமைந்தது. அதேபோல் சமீபத்தில் கார் பந்தயத்திலும் பங்கேற்று வெற்றி பெற்றார் அஜித். இவ்வாறு சினிமா மற்றும் கார் ரேஸ் என இரண்டிலும் வெற்றி பெற்ற, உற்சாகத்தில் உள்ளார் அஜித். சமீபத்தில் இரண்டு, மூன்று நாடுகளில் நடந்த கார் ரேஸில் அவர் பங்கேற்று வெற்றி பெற்றது குறிப்பிடத்தக்கது.
சினிமாவிற்கு பிரேக் விட்ட அஜித்
அதே நேரத்தில், அவர் தொடர்ந்து விபத்துகளுக்கும் உள்ளானார். இரண்டு, மூன்று மாதங்களில் அவரது கார் மூன்று முறை விபத்துக்குள்ளானது. இந்நிலையில், அஜித் தற்போது அதிரடி முடிவு ஒன்றை எடுத்துள்ளார். சினிமா மற்றும் கார் ரேஸ் இரண்டிலும் ஒரே நேரத்தில் கவனம் செலுத்த முடியவில்லை என்பதால் ரேஸ் நடைபெறும் காலங்களில் சினிமாவில் இருந்து பிரேக் எடுக்க இருப்பதாக அஜித் தெரிவித்துள்ளார்.
8 மாதங்களில் 42 கிலோ குறைத்த அஜித்
கார் ரேஸ் என்றால் தனக்கு மிகவும் பிடிக்கும் என்றும், அதற்கு உடற்தகுதி மிகவும் அவசியம் என்றும், நீண்ட நாட்களுக்குப் பிறகு கார் ரேஸில் கவனம் செலுத்தும்போது, முதலில் உடல் ரீதியாக தகுதியுடன் இருக்க வேண்டும் என்பதை உணர்ந்ததாகவும் அஜித் கூறினார். நீச்சல், சைக்கிளிங் மற்றும் பிற உடற்பயிற்சிகள், டயட் போன்றவற்றை மேற்கொண்டதன் மூலம், கடந்த எட்டு மாதங்களில் சுமார் 42 கிலோ எடை குறைந்துள்ளதாக அவர் தெரிவித்தார்.
ஏகே 64 அப்டேட் வெளியிட்ட அஜித்
கார் ரேஸ் சீசன் இருக்கும்போது சினிமாவில் இருந்து விலகி இருக்க முடிவு செய்துள்ளதாக அஜித் தெரிவித்தார். 'பந்தயத்தில் பங்கேற்கும்போது பல விபத்துகள் ஏற்பட்டன. உண்மையைச் சொல்ல வேண்டுமானால், என் படங்களில் ஸ்டண்ட்களை நானே செய்கிறேன். இதனால் எனக்கு பல அறுவை சிகிச்சைகள் செய்யப்பட்டுள்ளன.
அதனால் அதிரடி படங்களை விட்டுவிட முடியுமா? அதேபோல், விபத்துகள் ஏற்பட்டால் ரேஸையும் விட்டுவிட முடியாது. என் பார்வையில் இரண்டும் ஒன்றுதான்' என்று அஜித் கூறினார். மேலும் தனது அடுத்த படமான ஏகே 64 படத்தின் படப்பிடிப்பு நவம்பரில் தொடங்கும் என்றும் அவர் தெரிவித்தார். அவர் யார் இயக்கத்தில் நடிக்க உள்ளார் என்பது சஸ்பென்ஸாகவே உள்ளது.