கீது மோகன்தாஸ் இயக்கத்தில் யாஷ், நயன்தாரா நடிப்பில் உருவாகி இருக்கும் டாக்ஸிக் திரைப்படத்தின் டீசர் வில்லங்கத்தில் சிக்கி உள்ளதால், அப்படத்திற்கு எதிர்ப்பு தெரிவித்து புகார் எழுந்துள்ளது.
Toxic movie teaser complaint : நடிகர் யாஷ் நடிக்கும் 'டாக்ஸிக்' படத்தின் முதல் டீசர் வெளியான சில நாட்களில், படம் சட்ட சிக்கலில் சிக்கியுள்ளது. சமூக ஆர்வலர் தினேஷ் கல்லஹள்ளி, டீசரில் உள்ள 'மோசமான மற்றும் ஒழுக்கக்கேடான காட்சிகளுக்கு' எதிர்ப்பு தெரிவித்து, மத்திய திரைப்பட சான்றிதழ் வாரியத்திடம் (CBFC) முறைப்படி புகார் அளித்துள்ளார். CBFC தலைவர் பிரசூன் ஜோஷிக்கு அனுப்பப்பட்ட புகார் மனுவின்படி, 'டாக்ஸிக்' டீசரில் 'மிகவும் மோசமான மற்றும் அருவருப்பான காட்சிகள்' இருப்பதாக சமூக ஆர்வலர் கூறியுள்ளார்.
'இந்த டீசர் எந்தவித கட்டுப்பாடும் இன்றி சமூக ஊடகங்களில் பரவலாகப் பகிரப்படுகிறது. இதனால், சிறுவர்கள் மற்றும் இளைஞர்கள் உட்பட பொது மக்கள், சட்டவிரோதமான மற்றும் சமூகத்திற்கு தீங்கு விளைவிக்கும் விதமாக உள்ள இந்த டீசரை பார்க்க நேரிடுகிறது,' என்று அவர் கூறினார். பேச்சு மற்றும் கருத்து சுதந்திரத்திற்கான அரசியலமைப்பு உரிமைகளை இந்த டீசர் மீறுவதாக புகாரில் குறிப்பிட்டுள்ளார்.
மேலும், ''டாக்ஸிக்' டீசரில் காட்டப்படும் உள்ளடக்கம் அரசியலமைப்பு வரம்புகளை மீறுகிறது. மோசமான மற்றும் பாலியல் ரீதியான உள்ளடக்கங்கள் பாதுகாக்கப்பட்ட கருத்து வெளிப்பாடுகள் அல்ல என்று இந்திய உச்ச நீதிமன்றம் தொடர்ந்து கூறி வருகிறது, என்பதும் அந்த புகாரில் குறிப்பிடப்பட்டுள்ளது.
Related Articles
டாக்ஸிக் படத்திற்கு சிக்கல்
திரைப்படச் சட்டம் 1952, திரைப்படச் சான்றிதழ் விதிகள் மற்றும் மத்திய திரைப்பட சான்றிதழ் வாரியத்தின் வழிகாட்டுதல்களையும் அவர் சுட்டிக்காட்டி, திரைப்படங்கள், டீசர்கள் மற்றும் பிற விளம்பரப் பொருட்கள் 'நாகரிகம், ஒழுக்கம் மற்றும் சமூகப் பொறுப்பு' ஆகிய தரங்களுக்கு இணங்க வேண்டும் என்றும் கூறினார். இந்தக் குறைகளைக் கருத்தில் கொண்டு, டீசரை மறுஆய்வு செய்து, சர்ச்சைக்குரிய காட்சிகளை நீக்குவது உட்பட தேவையான நடவடிக்கைகளை எடுத்து, அதன் பரவலைத் தடுக்க வேண்டும் என்று புகார்தாரர் CBFC-யை வலியுறுத்தியுள்ளார்.
மேலும், 'டாக்ஸிக்' படத்தின் இயக்குனர், தயாரிப்பாளர்கள் மற்றும் சம்பந்தப்பட்டவர்கள் மீது சட்ட நடவடிக்கை எடுக்கவும் அவர் கோரியுள்ளார். 'இந்த விவகாரம் பொது ஒழுக்கம், சிறுவர்களின் பாதுகாப்பு சம்பந்தப்பட்டது என்பதால், இந்த புகார் மீது அவசர கவனம் தேவை,' என்றும் புகாரில் கூறப்பட்டுள்ளது. இந்தப் புகார் குறித்து படக்குழுவினர் இன்னும் எந்தக் கருத்தும் தெரிவிக்கவில்லை.
யாஷ் மற்றும் கீது மோகன்தாஸ் எழுதி, இயக்கும் 'டாக்ஸிக்' படத்தில் யாஷ் கதாநாயகனாக நடிக்க, கியாரா அத்வானி, நயன்தாரா, ஹூமா குரேஷி, ருக்மிணி வசந்த் மற்றும் தாரா சுதாரியா போன்ற நடிகைகளும் நடிக்கின்றனர். KVN புரொடக்ஷன்ஸ் மற்றும் மான்ஸ்டர் மைண்ட் கிரியேஷன்ஸ் பேனர்களின் கீழ் வெங்கட் கே நாராயணா மற்றும் யாஷ் தயாரிக்கும் 'டாக்ஸிக்' படம், மார்ச் 19ந் தேதி உலகம் முழுவதும் திரையரங்குகளில் வெளியாக உள்ளது.
