Maamanithan : விஜய் சேதுபதியின் மாமனிதன் உட்பட இந்த வாரம் தியேட்டரில் ரிலீசாகும் 5 படங்களின் முழு விவரம்
Maamanithan : தமிழ் சினிமாவில் நாளை மொத்தம் 5 படங்கள் ரிலீசாக உள்ளது. இவை அனைத்தும் குறைந்த பட்ஜெட்டில் தயாரான படங்கள். அவற்றைப்பற்றி தற்போது பார்க்கலாம்.
தமிழ் சினிமாவில் தொடர்ந்து பெரிய படங்களின் வருகையால் சிறு பட்ஜெட் படங்களின் வருகை தற்போது குறைந்துள்ளது. கடந்த 3 மாதங்களாக வாரந்தோறும் முன்னணி நடிகர்களின் படங்கள் வெளிவந்த வண்ணம் இருந்தன. இந்த மாதமும் கமலின் விக்ரம் படம் ஜூன் 3-ந் தேதி ரிலீசானது. இப்படத்திற்கு கிடைத்த மாபெரும் வரவேற்பால் அடுத்த இரண்டு வாரங்களுக்கு சிறு பட்ஜெட் படங்கள் எதுவும் ரிலீசாகவில்லை.
இந்நிலையில், இந்த வாரம் சிறு பட்ஜெட் படங்கள் அதிகளவில் ரிலீசாக உள்ளன. நாளை மொத்தம் 5 படங்கள் ரிலீசாக உள்ளது. இவை அனைத்தும் குறைந்த பட்ஜெட்டில் தயாரான படங்கள். அவற்றைப்பற்றி தற்போது பார்க்கலாம்.
விஜய் சேதுபதி நடித்துள்ள மாமனிதன் படம் நாளை ரிலீசாக உள்ளது. சீனு ராமசாமி இயக்கியுள்ள இப்படத்தில் நடிகர் விஜய் சேதுபதிக்கு ஜோடியாக காயத்ரி நடித்துள்ளார். இப்படத்திற்கு இளையராஜாவும், யுவன் சங்கர் ராஜாவும் இணைந்து இசையமைத்து உள்ளனர். இப்படத்தை யுவன் சங்கர் ராஜா தயாரித்துள்ளார்.
அடுத்ததாக அசோக் செல்வனின் வேழம் படமும் நாளை தான் ரிலீசாக உள்ளது. சந்தீப் ஷாம் இயக்கியுள்ள இப்படத்தில் அசோக் செல்வனுக்கு ஜோடியாக ஜனனி, ஐஸ்வர்யா மேனன் ஆகியோர் நடித்துள்ளனர். ஜானு சந்தர் இப்படத்திற்கு இசையமைத்துள்ளார்.
இதையடுத்து சிபி சத்யராஜ் நடிப்பில் உருவாகி இருக்கும் மாயோன் படமும் நாளை தான் ரிலீசாக உள்ளது. இப்படத்தில் சிபிராஜுக்கு ஜோடியாக தன்யா ரவிச்சந்திரன் நடித்துள்ளார். கிஷோர் இயக்கியுள்ள இப்படத்திற்கு இசைஞானி இளையராஜா இசையமைத்துள்ளார்.
அடுத்ததாக சுந்தர் சி, ஜெய் நடிப்பில் உருவாகி இருக்கும் பட்டாம்பூச்சி படமும் நாளை தான் திரைக்கு வர உள்ளது. இப்படத்தை பத்ரி இயக்கி உள்ளார். இப்படத்தில் சுந்தர் சி-க்கு ஜோடியாக நடிகை ஹனிரோஸ் நடித்துள்ளார். குஷ்பு இப்படத்தை தயாரித்துள்ளார். இதுதவிர நாகராஜ் பாய் துரைலிங்கம் இயக்கியுள்ள போலாமா ஊர்கோலம் படமும் நாளை தான் ரிலீசாக உள்ளது. இந்த 5 படங்கள் எந்தெந்த படங்கள் வெற்றிவாகை சூடப்போகிறது என்பதை பொருத்திருந்து தான் பார்க்க வேண்டும்.
இதையும் படியுங்கள்... சிம்பு பாடிய புல்லட் பாடலை தொடர்ந்து யூடியூப்பில் வைரலாகும் ‘தி வாரியர்’ படத்தின் விசில் பாடல்
சேனலை கிளிக் செய்து பின்தொடரவும்
