ஸ்ரீரங்கம் கோயில் அருகே பட்டப்பகலில் ரவுடி ஓட ஓட விரட்டி படுகொலை! அலறிய பக்தர்கள்!
திருச்சி ஸ்ரீரங்கத்தில் பட்டப்பகலில் ரவுடி ஒருவர் வெட்டிக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது.
Followதலைநகர் சென்னை உள்ளிட்ட தமிழகம் முழுவதும் அவ்வப்போது கொலை, கொள்ளை உள்ளிட்ட பல்வேறு குற்றச் சம்பவங்கள் அரங்கேறி வந்தது. இதனால் தமிழகத்தில் சட்டம் ஒழுங்கு சந்தி சிரிக்கிறது என எதிர்க்கட்சிகள் கடுமையாக விமர்சனங்களை முன்வைத்து வந்தனர். இதனையடுத்து என்கவுண்டர் சம்பவங்களும், ரவுடிகளும் கைது செய்யப்பட்டு வந்தனர். இதனால், பல்வேறு முக்கிய ரவுடிகள் வேறு மாநிலத்திற்கு சென்று தலைமறைவாகினர். மேலும் குற்றச்சம்பவங்களில் ஈடுபடுடாமல் ரவுடிகள் அடங்கி ஒடுங்கி இருந்து வந்தனர். இந்நிலையில் கடந்த சில நாட்களாக மீண்டும் கொலை சம்பவங்கள் அரங்கேறி வருகிறது.
திருச்சி மாவட்டம் ஸ்ரீரங்கம் மூலத்தோப்பு பகுதியை சேர்ந்தவர் தர்மராஜூன் மகன் அன்பு என்ற அன்புராஜ். இவர் மீது பல்வேறு வழக்குகள் இருப்பதாகவும், சி பிரிவு குற்றவாளி என கூறப்படுகிறது. இந்நிலையில் இன்று காலை தனது இருசக்கர வாகனத்தில் உடற்பயிற்சி மையத்துக்கு சென்று விட்டு ஸ்ரீரங்கம் தெப்பக்குளம் அருகே சென்றுக்கொண்டிருந்தார். அப்போது அங்கு 6 பேர் கொண்ட கும்பல் பயங்கர ஆயுதங்களுடன் வழிமறித்தது. இதனை கண்டு அதிர்ச்சி அடைந்த அவர் தப்பிக்க முயற்சித்தார். ஆனால், அந்த கும்பல் விடாமல் பட்டப்பகலில் ஒட ஒட தலை, கழுத்து உள்ளிட்ட இடங்களில் சரமாரியாக வெட்டியது.
இதையும் படிங்க: இஸ்ரோவின் 100வது ராக்கெட்! வரலாறு படைக்க தயாராகிறது இந்தியா! கவுண்டவுன் தொடங்கியது!
இதில், ரத்த வெள்ளத்தில் சரிந்த அன்புராஜ் சம்பவ இடத்திலேயே துடிதுடித்து உயிரிழந்தார். இதனையடுத்து அந்த கும்பல் இருசக்கர வாகனத்தில் அங்கிருந்து தப்பித்தனர். இந்த சம்பவம் தொடர்பாக ஸ்ரீரங்கம் போலீசாருக்கு தகவல் தெரிவிக்கப்பட்டது. சம்பவ இடத்திற்கு விரைந்த போலீசார் அன்புராஜ் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.
இதையும் படிங்க: ஆதாரம் காட்டுங்கள் நிலத்தை இலவசமாக எழுதி தருகிறோம்.! மீண்டும் தவெகவிற்கு சவால் விடுத்த ஜி ஸ்கொயர்
இந்த கொலை சம்பவம் தொடர்பாக ஸ்ரீரங்கம் போலீசார் வழக்குப்பதிவு செய்து விசாரணை மேற்கொண்டு வருகின்றனர். ஸ்ரீரங்கம் வைகுண்ட ஏகாதி திருவிழாவின் போது வேடுபறி நிகழ்ச்சியில் ஏற்பட்ட தகராறில் கொலை நடந்ததா அல்லது வேறு ஏதேனும் காரணமா என்பது குறித்தும் போலீசார் விசாரணை நடத்தி வரகின்றனர். மேலும் இந்த கொலை சம்பவத்தை அறிந்த நண்பர்கள் மற்றும் உறவினர்கள் மருத்துவமனை முன் குவிந்துள்ளதால் எந்த அசம்பாவிதம் நடைபெறாமல் இருக்க போலீசார் குவிக்கப்பட்டுள்ளனர். பட்டப்பகலில் பொதுமக்கள் நடமாட்டம் உள்ள பகுதியில் நடந்த கொலை சம்பவம் பொதுமக்கள் மத்தியிலும், பக்தர்கள் மத்தியிலும் அதிர்ச்சியை எஏற்படுத்தியுள்ளது.
சேனலை கிளிக் செய்து பின்தொடரவும்
