பராமரிப்பு பணிகள் காரணமாக மதுரை வழியாக செல்லும் முக்கிய ரயில்களின் வழித்தடங்களில் மாற்றம் செய்யப்பட்டுள்ளன. இதுகுறித்து
மதுரை கோட்ட ரெயில்வே வாரியம் வெளியிட்டு உள்ள செய்திக்குறிப்பில் கூறி இருப்பதாவது:

மதுரை கோட்டத்தில் தண்டவாள பராமரிப்பு பணிகள் நடக்கிறது. எனவே அந்த வழியாக செல்லும் ரெயில்களின் போக்குவரத்தில் நாளை (5-ந்தேதி) முதல் மார்ச் 4-ந்தேதி வரை மாற்றம் செய்யப்பட்டு உள்ளது. மதுரை- பழனி பயணிகள் ரெயில் (வண்டி எண்: 56624) வருகிற 12-ந் தேதி முதல் 29-ந்தேதி வரை முழுமையாக ரத்து செய்யப்படுகிறது. எனவே அந்த நாட்களில் ஒரு பயணிகள் சிறப்பு ரெயில் இயக்கப்படும். மதுரையில் இருந்து காலை 6.30 மணிக்கு புறப்பட்டு, அன்றைய தினம் காலை 10 மணிக்கு பழனி செல்லும்.

மதுரை-செங்கோட்டை பயணிகள் ரெயில் (வண்டி எண் 56734/ 56735) வருகிற 10-ந் தேதி முதல் 25-ந்தேதி வரை வியாழன் தவிர மற்ற நாட்களில் மதுரை- விருதுநகர் இடையே இரு மார்க்கங்களிலும் பகுதியாக ரத்து செய்யப்படுகிறது. நாகர்கோவில்- கோவை பயணிகள் ரெயில் (வண்டி எண் 56319/56320) நாளை (5-ந் தேதி) முதல் 25-ந் தேதி வரை வியாழன் தவிர மற்ற நாட்களில் திருப்பரங்குன்றம்- திண்டுக்கல் இடையே இருமார்க்கங்களிலும் பகுதியாக ரத்து செய்யப்படுகிறது. மேலும் இந்த ரெயில் வருகிற 11-ந்தேதி சாத் தூர்- திண்டுக்கல் இடையே பகுதியாக ரத்து செய்யப்படும். மதுரையில் இருந்து காலை 6.45 மணிக்கு புறப்படும் ராமேசுவரம் பயணிகள் ரெயில் (வண்டி எண்: 56723) வருகிற 10, 11, 12 மற்றும் மார்ச் 2, 3 ஆகிய நாட்களில் மண்டபம்- ராமேசுவரம் இடையே பகுதியாக ரத்து செய்யப்படும்.

 

ராமேசுவரத்தில் இருந்து காலை 11. 15 மணிக்கு புறப்படும் மதுரை பயணிகள் ரெயில் (வண்டி எண்: 56722) வருகிற 13-ந் தேதி முதல் 29-ந்தேதி வரை ஞாயிறு தவிர மற்ற நாட்களில் பரமக்குடி- ராமேசுவரம் இடையிலும், வருகிற 10, 11, 12 மற்றும் மார்ச் 2, 3-ந்தேதிகளில் மண்டபம்- ராமேசுவரம் இடையே பகுதியாக ரத்து செய்யப்படுகிறது. மதியம் 12.15 மணிக்கு மதுரையில் இருந்து புறப்படும் ராமேசுவரம் பயணிகள் ரெயில் (வண்டி எண்: 56721) வருகிற 13-ந் தேதி முதல் 29-ந்தேதிவரை ஞாயிறு தவிர மற்ற நாட்களில் பரமக்குடி- ராமேசுவரம் இடையே பகுதியாக ரத்து செய்யப்படுகிறது. திருச்சி- ராமேசுவரம் பயணிகள் ரெயில் (வண்டி எண்: 56829/56830) வருகிற 13-ந் தேதி முதல் 29-ந்தேதிவரை ஞாயிறு தவிர மற்ற நாட்களில் மானாமதுரை- ராமேசுவரம் இடையே இரு மார்க்கங்களிலும் பகுதியாக ரத்து செய்யப்படுகிறது.

நெல்லை-திண்டுக்கல்- மயிலாடுதுறை இணைப்பு ரெயில் (வண்டி எண்: 56822) வருகிற 7, 10, 12, 14, 17, 19, 21, 24, 26, 28, மார்ச் 2, 4-ந்தேதிகளில் திண்டுக்கல்- திருச்சி இடையே பகுதியாக ரத்து செய்யப்படுகிறது. வருகிற 13, 15, 18, 20, 22, 25, 27, 29-ந்தேதிகளில் 1 மணிநேரம் தாமதமாக இயங்கும். பாலக்காடு- திருச்செந்தூர் பயணிகள் ரெயில் (வண்டி எண்: 56769/56770) வருகிற 10, 11, 14, 15, 17, 18, 21, 22, 24, 25-ந்தேதிகளில் சாத்தூர்-நெல்லை இடையிலும், 12, 16, 19, 23-ந்தேதிகளில் மதுரை- நெல்லை இடையேயும் பகுதியாக ரத்து செய்யப்படுகிறது. இந்த நாட்களில் அந்த ரெயில் மதுரையில் இருந்து மாலை 6.45 மணிக்கு புறப்படும்.திருச்சி பயணிகள் ரெயில் (வண்டி எண்: 76840) காரைக்குடியில் இருந்து நாளை (5-ந் தேதி) முதல் 29-ந்தேதி வரை ஞாயிறு தவிர மற்ற நாட்களில் காலை 9.50 மணிக்கு பதில் ஒரு மணி நேரம் தாமதமாக 10.50 மணிக்கு புறப்படும்.

நெல்லை- ஈரோடு பயணிகள் ரெயில் (வண்டி எண்: 56826) வருகிற 12-ந் தேதி முதல் 29-ந்தேதி வரை ஞாயிறு தவிர மற்ற நாட்களில் மதுரை கோட்டத்துக்கு 2 மணி நேரம் தாமதமாக வரும்.

இவ்வாறு அதில் கூறப்பட்டு உள்ளது.