மகளிர் ஹாக்கி: 2-வது ஆட்டத்திலும் தென் கொரியாவை கலங்கடித்தது இந்தியா...
மகளிர் ஹாக்கியின் 2-ஆவது ஆட்டத்தில் தென் கொரியாவை 3-2 என்ற கோல் கணக்கில் இந்தியா வெற்றி கொண்டது.
தென் கொரியாவில் சுற்றுப் பயணம் மேற்கொண்டு இந்திய மகளிர் ஹாக்கி அணி விளையாடி வருகிறது. அந்நாட்டின் தலைநகர் சியோல் நகரில் கடந்த திங்கள்கிழமை நடைபெற்ற முதல் ஆட்டத்தில் அந்த அணியை 1-0 என்ற கோல் கணக்கில் இந்தியா வென்றது.
இந்நிலையில், 2-வது ஆட்டம் இன்சியான் நகரில் நேற்று நடைபெற்றது. இந்த ஆட்டத்தின் ஆரம்பம் முதலே ஆதிக்கம் செலுத்திய இந்திய அணிக்கு 6-வது நிமிடத்தில் கோல் வாய்ப்பு கிடைத்தது. முதல் கோலை பூனம் ராணி பதிவு செய்தார்.
எனினும், தென் கொரிய அணி 10-வது நிமிடத்தில் இந்திய அணிக்கு பதிலடி கொடுக்கும் வகையில் முதல் கோலை பதிவு செய்தது. அந்த கோலை யூரிம் லீ அடித்தார்.
பின்னர், விவேகத்தைக் காட்டிய இந்திய வீராங்கனைகள் சிறப்பாக விளையாட, இந்திய அணியின் கேப்டன் ராணி 27-வது நிமிடத்தில் இரண்டாவது கோலைப் பதிவு செய்தார். ஒரு கோல் முன்னிலையுடன் முதல் பாதி ஆட்டம் முடிவுக்கு வந்தது.
இரண்டாவது பாதி ஆட்டம் தொடங்கியவுடன் 2-வது கோலை தென் கொரியா பதிவு செய்த மறுநிமிடமே இந்தியாவின் குர்ஜித் கௌர் அணியின் 3-வது கோலைப் பதிவு செய்தார்.
இதனையடுத்து, ஆட்ட நேரம் முடியும் வரை தென் கெரிய அணியால் கோல் எதுவும் பதிவு செய்ய இயலவில்லை. இதையடுத்து, இந்திய அணி 3-2 என்ற கோல் கணக்கில் வெற்றி பெற்றது.
இதையடுத்து 5 ஆட்டங்கள் கொண்ட தொடரில் இந்தியா 2-0 என முன்னிலை பெற்றுள்ளது.
தென் கொரியாவுக்கு எதிராக 3-வது ஆட்டம் நாளை நடைபெற உள்ளது என்பது குறிப்பிடத்தக்கது.
சேனலை கிளிக் செய்து பின்தொடரவும்
