இலங்கைக்கு எதிரான முதலாவது டெஸ்ட் போட்டியில் சிறப்பாக செயல்பட்ட இந்திய அணி 165 ரன்கள் வித்தியாசத்தில் வெற்றி பெற்று அசத்தி உள்ளது. இந்திய அணிக்காக முதல் இன்னிங்சில் 167 ரன்கள் சேர்த்த தேவ்தத் படிக்கல் ஆட்ட நாயகனாக தேர்வு செய்யப்பட்டுள்ளார்.
இலங்கைக்கு எதிரான முதல் கிரிக்கெட் டெஸ்டில், இந்தியா 165 ரன்கள் வித்தியாசத்தில் அபார வெற்றி பெற்றது. 372 ரன்கள் எடுத்தால் வெற்றி என்ற இலக்குடன் களமிறங்கிய இலங்கை, ஐந்தாவது நாள் லஞ்ச் பிரேக்கிற்குப் பிறகு 206 ரன்களுக்கு ஆல் அவுட் ஆனது. இடது கை சுழற்பந்து வீச்சாளர் மானவ் சுதாரின் சிறப்பான பந்துவீச்சுதான் இந்தியாவின் வெற்றிக்கு முக்கிய காரணம். அவர் இரண்டாவது இன்னிங்ஸில் 6 விக்கெட்டுகளை வீழ்த்தினார். முதல் இன்னிங்ஸில் 4 விக்கெட்டுகளை எடுத்திருந்த சுதார், போட்டி முழுவதும் சேர்த்து மொத்தம் 10 விக்கெட்டுகளை கைப்பற்றினார்.
முதல் இன்னிங்ஸில் சதம் அடித்த சோனல் தினுஷா, இரண்டாவது இன்னிங்ஸில் 84 ரன்கள் எடுத்துப் போராடினார். ஆனால், 59 ரன்கள் எடுத்த தனஞ்சய டி சில்வாவைத் தவிர வேறு யாரும் அவருக்கு ஒத்துழைப்பு கொடுக்கவில்லை. லஞ்ச் பிரேக்கின்போது இலங்கை அணி 6 விக்கெட் இழப்பிற்கு 175 ரன்கள் எடுத்திருந்தது. பிரேக்கிற்குப் பிறகு ஒரே ஓவரில் 3 விக்கெட்டுகளை வீழ்த்தி, மானவ் சுதார் இந்தியாவின் வெற்றியை எளிதாக்கினார். இரண்டு போட்டிகள் கொண்ட இந்தத் தொடரின் கடைசிப் போட்டி, வரும் ஞாயிற்றுக்கிழமை கொழும்புவில் தொடங்குகிறது. ஸ்கோர்: இந்தியா 462 & 193, இலங்கை 284 & 206.
கடைசி நாளான இன்று, இலங்கை 4 விக்கெட் இழப்பிற்கு 84 ரன்கள் என்ற நிலையில் ஆட்டத்தைத் தொடங்கியது. முதல் இன்னிங்ஸில் சதம் அடித்த தினுஷாவும், தனஞ்சய டி சில்வாவும் இணைந்து அரைசத பார்ட்னர்ஷிப் அமைத்தனர். இதனால், விக்கெட் எடுக்க முடியாமல் இந்திய பந்துவீச்சாளர்கள் திணறினர். ஐந்தாவது விக்கெட்டுக்கு இருவரும் 95 ரன்கள் சேர்த்ததால், இந்தியாவின் வெற்றி வாய்ப்பு மங்குமோ என்று எதிர்பார்க்கப்பட்டது. ஆனால், அரைசதம் அடித்த சிறிது நேரத்திலேயே, ஜடேஜாவின் பந்தை ஸ்வீப் செய்ய முயன்ற தனஞ்சய டி சில்வா (59) ஆட்டமிழந்தார். ஜடேஜா பந்தில் மானவ் சுதார் கேட்ச் பிடித்து அவரை வெளியேற்றினார்.
Related Articles
அதன்பிறகு களமிறங்கிய நிரோஷன் டிக்வெல்லாவை (10), பிரசித் கிருஷ்ணா பந்துவீச்சில் ரிஷப் பந்த் கேட்ச் பிடித்து அவுட்டாக்கினார். இதனால் இந்தியா வெற்றிக்கு இன்னும் அருகில் சென்றது. இரண்டு விக்கெட்டுகள் விழுந்ததால், தினுஷா தற்காப்பு ஆட்டத்திற்கு மாறினார். லஞ்ச் பிரேக்கிற்குப் பிறகும் அவர் தாக்குப்பிடிக்க முயன்றார். ஆனால், போட்டியின் 76-வது ஓவரின் முதல் பந்திலேயே தினுஷாவை (84) அவுட்டாக்கி, இலங்கையின் கடைசி நம்பிக்கையையும் சுதார் தகர்த்தார். அடுத்த பந்திலேயே பிரபாத் ஜெயசூர்யாவை போல்டாக்கிய சுதார், ஹாட்ரிக் வாய்ப்பை நெருங்கினார். ஹாட்ரிக் கிடைக்கவில்லை என்றாலும், அந்த ஓவரின் கடைசிப் பந்தில் லஹிரு குமாராவையும் (0) வெளியேற்றினார். அடுத்த ஓவரில் கெஷார நுவந்தாவையும் (20) அவுட்டாக்கி, இந்தியாவின் வெற்றியை மானவ் சுதார் உறுதி செய்தார். இந்தியா வெற்றி பெற்ற உடனேயே காலியில் மழை பெய்யத் தொடங்கியது.
