வெஸ்ட் இண்டீஸுக்கு எதிரான 2வது ஒருநாள் போட்டியில் 9 விக்கெட் வித்தியாசத்தில் அபார வெற்றி பெற்ற வங்கதேச அணி 2-0 என தொடரை வென்றது.
வங்கதேச அணி வெஸ்ட் இண்டீஸில் சுற்றுப்பயணம் செய்து விளையாடிவருகிறது. 3 ஒருநாள் போட்டிகள் கொண்ட தொடரின் முதல் போட்டியில் வங்கதேச அணி வெற்றி பெற்று1-0 என முன்னிலை வகித்த நிலையில், 2வது போட்டி கயானாவில் நடந்தது.
2வது ஒருநாள் போட்டியில் டாஸ் வென்ற வங்கதேச அணி ஃபீல்டிங்கை தேர்வு செய்தது.
வங்கதேச அணி:
தமீம் இக்பால் (கேப்டன்), லிட்டன் தாஸ், நஜ்முல் ஹுசைன் ஷாண்டோ, மஹ்மதுல்லா, அஃபிஃப் ஹுசைன், நூருல் ஹசன் (விக்கெட் கீப்பர்), மொசாடெக் ஹுசைன், மெஹிடி ஹசன், நசும் அகமது, முஸ்தாஃபிசுர் ரஹ்மான், ஷோரிஃபுல் இஸ்லாம்.
வெஸ்ட் இண்டீஸ் அணி:
கைல் மேயர்ஸ், ஷேய் ஹோப் (விக்கெட் கீப்பர்), ஷமர் ப்ரூக்ஸ், பிரண்டன் கிங், நிகோலஸ் பூரன் (கேப்டன்), ரோவமன் பவல், கீமோ பால், ரொமாரியோ ஷெஃபெர்டு, அகீல் ஹுசைன், குடாகேஷ் மோட்டி, அல்ஸாரி ஜோசஃப்.
இதையும் படிங்க - ரோஹித் சர்மா மாபெரும் சாதனை.. ஒருநாள் கிரிக்கெட் வரலாற்றில் டாப் இந்திய வீரர்..! சர்வதேச அளவில் 4ம் இடம்
முதலில் பேட்டிங் ஆடிய வெஸ்ட் இண்டீஸ் அணி வீரர்கள் தொடக்கம் முதலே சீரான இடைவெளியில் தொடர்ச்சியாக விக்கெட்டுகளை இழந்தனர். வெஸ்ட் இண்டீஸ் அணியில் அதிகபட்சமாக கீமோ பால் 25 ரன்கள் அடித்தார். ஷேய் ஹோப் 18 ரன்களும், கைல் மேயர்ஸ் 17 ரன்களும் அடித்தனர். பூரன், ப்ரூக்ஸ், ரோவ்மன் பவல், பிரண்டன் கிங் ஆகிய அனைவருமே சொதப்ப 35 ஓவரில் வெறும் 108 ரன்களுக்கு ஆல் அவுட்டானது வெஸ்ட் இண்டீஸ் அணி.
வங்கதேச அணி சார்பில் மெஹிடி ஹசன் 4 விக்கெட்டுகளும், நசும் அகமது 3 விக்கெட்டுகளும் வீழ்த்தினர்.
இதையும் படிங்க - 2023ல் இந்தியாவில் நடக்கும் ஒருநாள் உலக கோப்பையில் தென்னாப்பிரிக்கா ஆடமுடியாது..? இதுதான் காரணம்
109 ரன்கள் என்ற எளிய இலக்கை விரட்டிய வங்கதேச அணியின் தொடக்க வீரர் நஜிமுல் ஹுசைன் ஷாண்டோ 20 ரன்னில் ஆட்டமிழந்தார். ஆனால் மற்றொரு தொடக்க வீரரான தமீம் இக்பால் சிறப்பாக ஆடி அரைசதம் அடித்து 50 ரன்களுடன் கடைசி வரை களத்தில் நின்று போட்டியை முடித்து கொடுத்தார். 3ம் வரிசையில் இறங்கிய லிட்டன் தாஸ் 32 ரன்கள் அடித்தார். இக்பால் - தாஸ் ஜோடியின் சிறப்பான பேட்டிங்கால் 21வது ஓவரிலேயே இலக்கை அடித்து 9 விக்கெட் வித்தியாசத்தில் வெற்றி பெற்ற வங்கதேச அணி 2-0 என ஒருநாள் தொடரை வென்றது.
