ICC WTC ஃபைனலுக்கான இந்திய அணி ஓர் அலசல்..! சாரி ராகுல் உங்களுக்கு இடம் இல்ல..! உத்தேச ஆடும் லெவன்
ஐசிசி டெஸ்ட் சாம்பியன்ஷிப் ஃபைனலுக்கான இந்திய அணி அறிவிக்கப்பட்டுள்ள நிலையில், ஃபைனலில் களமிறங்கும் உத்தேச ஆடும் லெவனை பார்ப்போம்.
Followஐசிசி டெஸ்ட் சாம்பியன்ஷிப் ஃபைனலுக்கு இந்தியா - ஆஸ்திரேலியா அணிகள் முன்னேறியுள்ளன. லண்டன் ஓவல் மைதானத்தில் வரும் ஜூன் 7ம் தேதி டெஸ்ட் சாம்பியன்ஷிப் ஃபைனல் தொடங்குகிறது.
ஃபைனலுக்கான ஆஸ்திரேலியா டெஸ்ட் அணி ஏற்கனவே அறிவிக்கப்பட்டுவிட்ட நிலையில், இந்திய அணி இன்று அறிவிக்கப்பட்டுள்ளது. கடந்த டெஸ்ட் சாம்பியன்ஷிப் ஃபைனலில் நியூசிலாந்திடம் தோற்று கோப்பையை இழந்த இந்திய அணி இந்த முறை ஃபைனலில் ஆஸ்திரேலியாவை வீழ்த்தி கோப்பையை வெல்லும் முனைப்பில் உள்ளது.
ரோஹித் சர்மா தலைமையிலான இந்திய அணியில் கில், புஜரா, கோலி, ராகுல் ஆகிய பேட்ஸ்மேன்கள் இடம்பெற்றுள்ளனர். அஜிங்க்யா ரஹானே டெஸ்ட் அணியிலிருந்து நீக்கப்பட்ட பின் 5ம் வரிசை வீரராக ஆடிவந்த ஷ்ரேயாஸ் ஐயருக்கு காயம் காரணமாக அறுவை சிகிச்சை செய்யப்பட்டிருப்பதால் அவர் ஃபைனலுக்கான இந்திய அணியில் இடம்பெறவில்லை. இதற்கிடையே ஐபிஎல்லில் அபாரமாக ஆடி சாதனை இன்னிங்ஸ்களை ஆடி, தனது கெரியரில் மிகச்சிறப்பான ஆட்டத்தை அஜிங்க்யா ரஹானே வெளிப்படுத்த, அதன்விளைவாக ரஹானே ஒன்றரை ஆண்டுக்கு பிறகு மீண்டும் இந்திய டெஸ்ட் அணியில் எடுக்கப்பட்டுள்ளார்.
டெஸ்ட் சாம்பியன்ஷிப் ஃபைனல் இங்கிலாந்தில் நடக்கிறது. ரஹானே பொதுவாக வெளிநாடுகளில் மிகச்சிறப்பாக ஆடக்கூடியவர். வெளிநாடுகளில் டெஸ்ட் கிரிக்கெட்டில் நல்ல ரெக்கார்டு வைத்துள்ளார். அதன்விளைவாக, அவர் அணிக்கு வலுசேர்ப்பார்; மிடில் ஆர்டரில் நல்ல பேலன்ஸை கொடுப்பார் என்பதால் அவர் மீண்டும் டெஸ்ட் அணியில் சேர்க்கப்பட்டுள்ளார்.
விக்கெட் கீப்பர் ரிஷப் பண்ட்டும் காயம் காரணமாக டெஸ்ட் அணியில் இல்லை. விக்கெட் கீப்பராக கேஎஸ் பரத் ஆடுகிறார். இவர் ஆஸ்திரேலியாவிற்கு எதிரான டெஸ்ட் தொடரில் பேட்டிங்கில் பெரிதாக சோபிக்கவில்லை. ஆனால் விக்கெட் கீப்பிங் நன்றாக செய்தார். விக்கெட் கீப்பிங்கில் நம்பிக்கையளித்தாலும், பரத்தை பேட்டிங்கில் பெரிதாக நம்ப முடியாது. ரிஷப் பண்ட் இங்கிலாந்தில் ஏற்கனவே சதமடித்து அசத்தியிருக்கிறார். டெஸ்ட் சாம்பியன்ஷிப் ஃபைனல் நடக்கும் இதே லண்டன் ஓவலில் 2018ல் சதமடித்திருக்கிறார் ரிஷப் பண்ட். எனவே ரிஷப் பண்ட் இல்லாதது பின்வரிசை பேட்டிங்கில் கண்டிப்பாகவே பின்னடைவாக அமையும். ரிஷப் பண்ட் அதிரடியாக பேட்டிங் ஆடி ஒருசில ஓவர்களில் ஆட்டத்தின் போக்கை மாற்றக்கூடியவர் ஆவார். டெஸ்ட் கிரிக்கெட்டில் அவரது அதுமாதிரியான ஆட்டத்தை திருப்பும் இன்னிங்ஸ்களை பலமுறை பார்த்திருக்கிறோம்.
ஸ்பின்னர்களாக ரவிச்சந்திரன் அஷ்வின், ரவீந்திர ஜடேஜா, அக்ஸர் படேல் ஆகிய மூவரும், ஃபாஸ்ட் பவுலர்களாக முகமது ஷமி, முகமது சிராஜ், உமேஷ் யாதவ், ஜெய்தேவ் உனாத்கத் ஆகியோருடன் ஷர்துல் தாகூரும் எடுக்கப்பட்டுள்ளனர்.
டெஸ்ட் சாம்பியன்ஷிப் ஃபைனலுக்கான இந்திய அணி:
ரோஹித் சர்மா (கேப்டன்), ஷுப்மன் கில், புஜாரா, விராட் கோலி, அஜிங்க்யா ரஹானே, கேஎல் ராகுல், கேஎஸ் பரத் (விக்கெட் கீப்பர்), ரவிச்சந்திரன் அஷ்வின், ரவீந்திர ஜடேஜா, அக்ஸர் படேல், ஷர்துல் தாகூர், முகமது ஷமி, முகமது சிராஜ், உமேஷ் யாதவ், ஜெய்தேவ் உனாத்கத்.
லண்டன் ஓவலில் நடக்கும் டெஸ்ட் சாம்பியன்ஷிப் ஃபைனலில் களமிறங்கும் இந்திய அணியின் உத்தேச ஆடும் லெவனை பார்ப்போம்.
கேப்டன் ரோஹித் சர்மாவுடன் ஷுப்மன் கில் தொடக்க வீரராக இறங்குவார். எனவே கேஎல் ராகுலுக்கு ஆடும் லெவனில் இடம் கிடைக்க வாய்ப்பில்லை. ஏனெனில் ஓபனிங்கை தவிர எந்த இடத்திலும் ராகுலை புகுத்த முடியாது. 3ம் வரிசையில் புஜாரா, 4ம் வரிசையில் விராட் கோலி, 5ம் வரிசையில் ரஹானே ஆகியோர் ஆடுவார்கள். அதன்பின்னர் விக்கெட் கீப்பர் கேஎஸ் பரத் களமிறங்குவார்.
IPL 2023: ஐபிஎல் 16வது சீசனில் கண்டிப்பாக அந்த அணி தான் கோப்பையை வெல்லும்..! அடித்துச்சொல்லும் மைக்கேன் வான்
இங்கிலாந்து கண்டிஷனில் கண்டிப்பாக 4 ஃபாஸ்ட் பவுலர்கள் ஆடுவார்கள். அதனால் ஒரு ஸ்பின்னருக்கு மட்டுமே ஆடும் லெவனில் இடம் கிடைக்கும். அந்த ஒரு ஸ்பின்னர் ரவீந்திர ஜடேஜாவாகத்தான் இருப்பார். ஃபாஸ்ட் பவுலர்களாக முகமது ஷமி, முகமது சிராஜ், ஷர்துல் தாகூர் ஆகிய மூவரும் கண்டிப்பாக ஆடுவார்கள். உனாத்கத் - உமேஷ் யாதவ் ஆகிய இருவரில் ஒருவர் ஆடுவார்.
உத்தேச இந்திய அணி:
ரோஹித் சர்மா (கேப்டன்), ஷுப்மன் கில், புஜாரா, விராட் கோலி, அஜிங்க்யா ரஹானே, கேஎஸ் பரத் (விக்கெட் கீப்பர்), ரவீந்திர ஜடேஜா, ஷர்துல் தாகூர், முகமது ஷமி, முகமது சிராஜ், ஜெய்தேவ் உனாத்கத்/உமேஷ் யாதவ்.
சேனலை கிளிக் செய்து பின்தொடரவும்
