மீனவர்களுக்கு வானிலை ஆய்வு மையத்தின் முக்கிய எச்சரிக்கை..!
தமிழகம் மற்றும் புதுச்சேரி மீனவர்கள் இன்று முதல் டிசம்பர் 8 வரையிலான 4 நாட்களுக்கு மீன்பிடிக்க கடலுக்கு செல்ல வேண்டாம் என வானிலை ஆய்வு மையம் அறிவுறுத்தியுள்ளது.
வானிலை ஆய்வு மைய இயக்குநர் பாலச்சந்திரன் சென்னையில் செய்தியாளர்களிடம் பேசியதாவது:
கடந்த 2 நாட்களாக தென்கிழக்கு வங்கக்கடல் பகுதியில் நிலவிய வலுவான குறைந்த காற்றழுத்த தாழ்வு பகுதி, இன்றும் அதே பகுதியில் நீடிக்கிறது. அடுத்த 12 மணி நேரத்தில் அது, காற்றழுத்த தாழ்வு மண்டலமாக மாறக்கூடும்.
மீனவர்களுக்கு அறிவுறுத்தல்:
டிசம்பர் 8 வரையிலான காலக்கட்டத்தில், அந்த காற்றழுத்த தாழ்வு மண்டலம் வடமேற்கு திசையில் நகர்ந்து வடதமிழகம் மற்றும் தெற்கு ஆந்திர கரையை நோக்கி நகரும். எனவே தமிழகம் மற்றும் புதுச்சேரி மீனவர்கள் இன்று முதல் டிசம்பர் 8 வரையிலான 4 நாட்களுக்கு கடலுக்கு மீன் பிடிக்க செல்ல வேண்டாம். ஆழ்கடலுக்கு மீன்பிடிக்க சென்றுள்ள மீனவர்கள், உடனடியாக கரை திரும்புமாறு அறிவுறுத்தப்படுகிறார்கள்.
மழை வாய்ப்பு:
அடுத்த 24 மணி நேரத்தில் தமிழகம் மற்றும் புதுவையில் ஓரிரு இடங்களில் மழை பெய்யும்.
இவ்வாறு பாலச்சந்திரன் தெரிவித்தார்.
சேனலை கிளிக் செய்து பின்தொடரவும்
