தமிழக சட்டப்பேரவைத் தேர்தலில் அதிமுக கூட்டணியில் போட்டியிட 27 வெற்றி வாய்ப்புள்ள தொகுதிகளை தமிழ் மாநில காங்கிரஸ் கட்சி அடையாளம் கண்டிருக்கிறது.
தமிழகத்தில் தேர்தல் களம் சூடுபிடிக்கத் தொடங்கிவிட்டது. அதிமுக - திமுக ஆகிய கட்சிகள் தீவிர தேர்தல் பிரசாரத்தில் ஈடுபட்டு வருகின்றன. திமுக - அதிமுக என இரு கூட்டணியிலும் தேர்தல் கூட்டணி பேச்சுவார்த்தைகள் அதிகாரபூர்வமற்ற முறையில் தொடங்கியுள்ளன. கூட்டணியில் உள்ள ஒவ்வொரு கட்சியும் தங்களுக்கு வெற்றி வாய்ப்புள்ள தொகுதிகளை அடையாளம் கண்டு பேச்சிவார்த்தைக்கு தயாராகிவருகின்றன. அந்த வகையில் அதிமுக கூட்டணியில் உள்ள தமாக தங்கள் வெற்றி வாய்ப்புள்ள தொகுதிகளை அடையாளம் கண்டு பேச்சுவார்த்தைக்கு தயாராகியுள்ளது.
கடந்த சட்டப்பேரவைத் தேர்தலில் மக்கள் நலக் கூட்டணியில் இடம் பெற்று 26 தொகுதிகளில் தமாக போட்டியிட்டது. ஆனால், ஒரு தொகுதியிலும் வெற்றி பெற முடியவில்லை. வரும் தேர்தலில் அதிமுக கூட்டணியில் இரட்டை இலக்கத் தொகுதிகளில் போட்டியிட்டு வெற்றி பெற வேண்டும் என்று அக்கட்சி திட்டமிட்டுள்ளது. அதற்காக தமிழகத்தில் 27 தொகுதிகளை அடையாளம் கண்டுள்ளதாக அக்கட்சி வட்டாரங்கள் தெரிவிக்கின்றன. இந்தத் தொகுதிகளிலிருந்து தமாகவுக்கு தொகுதிகள் ஒதுக்கினால், நிச்சயமாக வெற்றி கிடைக்கும் என்று அக்கட்சியினர் தெரிவிக்கிறார்கள்.
