பஹல்காம் தாக்குதலில் மூளையாக செயல்பட்ட நபர் உள்பட மூன்று தீவிரவாதிகள் சுட்டுக் கொல்லப்பட்டதாக மத்திய உள்துறை அமைச்சர் அமித் ஷா நாடாளுமன்றத்தில் விளக்கம் அளித்துள்ளார்.
ஜம்மு காஷ்மீர் மாநிலத்தின் பஹல்காம் சுற்றுலாத் தளத்தில் கடந்த ஏப்ரல் 22ம் தேதி தங்கள் குடும்ப உறுப்பினர்களுடன் பொழுதை கழித்துக் கொண்டிருந்த அப்பாவி பொதுமக்கள், சுற்றுலாப் பயணிகள் மீது பயங்கரவாதிகள் திடீர் தாக்குதல் நடத்தினர். வனப்பகுதியில் இருந்து திடீரென வந்த பயங்கரவாதிகள் சுற்றுலாப் பயணிகளின் மதம், பெயர் உள்ளிட்ட அடையாளங்களைக் கேட்டிரிந்து துப்பாக்கிச்சூடு நடத்தியதில் 26 அப்பாவி பொதுமக்கள் சுட்டு கொல்லப்பட்டனர்.
இந்தியா தொடங்கி உலக நாடுகள் பலவும் இந்த தாக்குதலுக்கு கடும் கண்டனம் தெரிவித்தன. பஹல்காம் தாக்குதலுக்கு பதிலடி கொடுக்கும் விதமாக இந்தியா பாகிஸ்தானில் அமைக்கப்பட்டிருந்த தீவிரவாதிகளின் முகாம்கள் மீது கடந்த மே 7ம் தேதி தாக்குதல் நடத்தியது. இந்த தாக்குதலில் பாகிஸ்தானில் அமைக்கப்பட்டிருந்த தீவிரவாத முகாம்கள் மட்டுமே அழிக்கப்பட்டதாகவும், பொதுமக்களுக்கு எந்த பாதிப்பும் இல்லை என்று இந்தியா விளக்கம் அளித்தது.
இந்நிலையில், பஹல்காம் தாக்குதல், ஆபரேஷன் சிந்தூர் தொடர்பாக மத்திய உள்துறை அமைச்சர் அமித்ஷா நாடாளுமன்றத்தில் விளக்கம் அளித்து வருகிறார். நாடாளுமன்றத்தில் பேசிய அவர், மகா தேவ் நடவடிக்கையில், இந்திய ராணுவம், சி.ஆர்.பி.எஃப் மற்றும் ஜம்மு-காஷ்மீர் காவல்துறை ஆகியவை பாஹல்காம் பயங்கரவாதத் தாக்குதலில் ஈடுபட்ட மூன்று பயங்கரவாதிகளை சுட்டுக் கொன்றதாக மத்திய உள்துறை அமைச்சர் அமித் ஷா உறுதிப்படுத்தியுள்ளார்.
Related Articles
பாஹல்காமில் உள்ள பைசரானில் நடந்த தாக்குதலுடன் தொடர்புடைய சுலைமான் ஷா என்ற ஹாஷிம் மூசா மற்றும் இரண்டு பேர் இந்த நடவடிக்கையில் கொல்லப்பட்டதாக ஷா மக்களவையில் தெரிவித்தார். “பாஹல்காம் தாக்குதலில் ஈடுபட்ட மூன்று பயங்கரவாதிகளும் கொல்லப்பட்டதன் மூலம் பாதிக்கப்பட்டவர்களுக்கு நியாயம் கிடைத்துள்ளது,” என்று அமித் ஷா நாடாளுமன்றத்தில் தெரிவித்தார்.
மக்களவையில் பேசிய அமித்ஷா, சுலைமான் லஷ்கர்-இ-தொய்பா (LeT) பயங்கரவாதக் குழுவின் தளபதி என்றும், கங்காங்கிர் தாக்குதலிலும் அவருக்கு பங்கு இருந்ததாகவும் கூறினார். சுலைமானைத் தவிர, மேலும் இரண்டு பயங்கரவாதிகள் கொல்லப்பட்டனர். கடந்த ஆண்டு சோனாமார்க் சுரங்கப்பாதை தாக்குதலில் ஈடுபட்டதாகக் கூறப்படும் ஜிப்ரான் மற்றும் மற்றொரு லஷ்கர் பயங்கரவாதியான ஹம்சா ஆப்கானி ஆகியோர் அடையாளம் காணப்பட்டுள்ளனர்.
பயங்கரவாதிகளை அடையாளம் கண்டது எப்படி?
பாஹல்காம் தாக்குதலுக்கு காரணமான பயங்கரவாதிகளின் அடையாளத்தை உறுதிப்படுத்த பாதுகாப்புப் படையினர் பெரும் முயற்சி எடுத்தனர். அவர்களுக்கு அடைக்கலம் கொடுத்தவர்களை NIA ஏற்கனவே கைது செய்துள்ளது. அவர்களுக்கு உணவளித்தவர்கள் காவலில் வைக்கப்பட்டுள்ளனர். சுட்டுக் கொல்லப்பட்ட பயங்கரவாதிகளிடம் இருந்து பறிமுதல் செய்யப்பட்ட ஆயுதங்கள், பஹல்காம் தாக்குதலில் பொதுமக்களின் உடல்களில் இருந்து எடுக்கப்பட்ட துப்பாக்கி குண்டுகளுடன் ஒத்துப்போனது. அவர்கள் பயன்படுத்திய துப்பாக்கி உள்ளிட்ட ஆயுதங்கள் பறிமுதல் செய்யப்பட்டுள்ளன. அதன் அடிப்படையில் பாஹல்காமில் பயங்கரவாதத் தாக்குதலை நடத்திய மூன்று பேர் என அடையாளம் காணப்பட்டனர்.
"பயங்கரவாதத் தாக்குதலில் இருந்து தோட்டாக்களின் FSL அறிக்கை ஏற்கனவே தயாராக உள்ளது... நேற்று, மூன்று பயங்கரவாதிகளின் துப்பாக்கிகள் பறிமுதல் செய்யப்பட்டு FSL அறிக்கைகளுடன் பொருத்தப்பட்டன... மேலும் சோதனைகள் நேற்று சண்டிகரில் நடத்தப்பட்டன, அதன் பிறகு இவர்கள் மூவரும் தான் பயங்கரவாதத் தாக்குதலை நடத்தியவர்கள் என்பது உறுதி செய்யப்பட்டது...,” என்று உள்துறை அமைச்சர் மேலும் கூறினார்.
பாஹல்காம் பயங்கரவாதத் தாக்குதலுக்குப் பின்னணியில் இருந்த சுலைமான், பாதுகாப்புப் படையினரின் கூட்டு நடவடிக்கையில் கொல்லப்பட்டதாக மத்திய உள்துறை அமைச்சர் அமித் ஷா செவ்வாயன்று தெரிவித்தார்.
ஜிப்ரான் மற்றும் ஆப்கானி இருவரும் ‘A’ பிரிவு பயங்கரவாதிகள் என்று அமித் ஷா கூறினார், அதாவது அவர்கள் பாதுகாப்பு நிறுவனங்களால் மிகவும் தேடப்படும் நபர்களில் ஒருவர்.
திங்கட்கிழமை, பாஹல்காம் தாக்குதலின் மூளையாக செயல்பட்டவர் சுலைமான் என்றும், பாதுகாப்புப் படையினரின் திட்டமிட்ட தாக்குதலின் போது அவர் கொல்லப்பட்டார் என்றும் அதிகாரிகள் உறுதிப்படுத்தினர்.