கொரோனா 3ம் அலை.. எப்போது முடிவுக்கு வரும்..? விஞ்ஞானி மனீந்திர அகர்வால் வெளியிட்ட 'அப்டேட்'
இந்தியாவில் கொரோனாவின் 3ஆம் அலை எப்போது முடிவுக்கு வரும் என்ற கேள்விக்கு பதில் அளித்து இருக்கிறார் ஐஐடி விஞ்ஞானி மனீந்திர அகர்வால்.
இதுகுறித்து பேசிய ஐஐடி விஞ்ஞானி மனீந்திர அகர்வால், ‘இந்தியாவிற்கும் போதுமான தரவு இல்லாததால், அடுத்த மாத தொடக்கத்தில் அலை எங்காவது உச்சத்தை எட்டும் என்று எதிர்பார்க்கிறோம். மும்பையைப் பொறுத்தவரை, மூன்றாவது அலை இந்த மாதத்தின் நடுப்பகுதியில் உச்சத்தை எட்டும். அது வெகு தொலைவில் இல்லை. டெல்லியிலும் அதே நிலை தான் உள்ளது. தற்போதைய நிலவரப்படி, ஒரு நாளைக்கு நான்கு முதல் எட்டு லட்சம் பேர் வரை பாதிக்கப்படலாம்.
டெல்லி மற்றும் மும்பையில் பாதிப்புகள் எவ்வளவு வேகமாக உயர்கிறதோ, அதே வேகத்தில் குறைவதற்கு வாய்ப்புள்ளது. ஒட்டுமொத்த இந்தியாவில் பாதிப்பு தற்போது தான் அதிகரிக்க தொடங்கியுள்ளது. அது உச்சம் பெற்று கீழே வர இன்னும் ஒரு மாத காலம் ஆகும். மார்ச் மாதத்தின் நடுப்பகுதியில், தொற்றுநோயின் மூன்றாவது அலை ஏறக்குறைய முடிவுக்கு வரும்.பாதிக்கப்பட்ட நபர்கள் அதிகளவில் இருக்கும் போது, புதிய நோய் தொற்று பாதிப்பு அதிகளவில் உருவாகக்கூடும். ஏனெனில் அதிக இடமாற்றங்கள் நிகழலாம்.
நோய்த்தொற்று இல்லாதவர்கள் எவ்வளவு அதிகமாக இருப்பார்களோ, அவ்வளவு அதிகமாக பாதிக்கப்பட்டவர்கள் உருவாக்கப்படுவார்கள்.முதல் அலையில், மிகவும் கடுமையான லாக்டவுன் பரவல் வீதத்தை இரண்டு மடங்கு குறைத்தது. இரண்டாவது அலையின் போது, வெவ்வேறு மாநிலங்கள் வெவ்வேறு உத்திகளைக் கடைப்பிடித்தன. கட்டுப்பாடுகளுடன் ஊரடங்கை அமல்படுத்திய மாநிலங்களால், கொரோனா பரவலை கட்டுப்படுத்த முடிந்தது. கடுமையான லாக்டவுன் எப்பொழுதும் அதிகமாக உதவுகிறது,
ஆனால் அது பலரின் வாழ்வாதாரத்தை முழுமையாக பாதிக்கும். கொரோனாவால் ஏற்படும் மரணங்களை பற்றி பேசுகிறோம். அதே சமயம், வாழ்வாதார இழப்பால் ஏற்படும் மரணங்கள் பற்றியும் பேச வேண்டும்.ஜனவரி மாதத்தின் நடுப்பகுதியில் உச்சம் இருக்கும் என்று எதிர்பார்க்கும் நகரங்களுக்கு, லாக்டவுன் அவசியமில்லை. அதே சமயம், தற்போது லாக்டவுனை அமலப்படுத்தியுள்ள தமிழ்நாடு போன்ற மாநிலங்களில் பாதிப்பு வளர்ச்சி கட்டத்தில் மட்டுமே இருக்கிறது.
மருத்துவமனையில் நோயாளிகள் அதிகளவில் அனுமதிக்கப்படுவதற்கு முன்பே லாக்டவுன் போடப்பட்டுள்ளது. உங்கள் மருத்துவமனை அல்லது மருத்துவ கட்டமைப்பால் பாதிப்பை கையாள முடிந்தால், அதை வளர அனுமதிப்பது பயனுள்ள உத்தியாக இருக்கலாம். அதிவேகமாக பரவி, அதே வேகத்தில் குறைந்துவிடும். இது, அனைத்து தொற்று உறுதியாகி மீண்டு வருவதற்கான நேரத்தை குறைக்கிறது. ஆனால், அத்தகைய சூழ்நிலையில், தீவிர அழுத்தத்தை சமாளிக்க மருத்துவ கட்டமைப்பு தயாராக இருக்க வேண்டும்.
சேனலை கிளிக் செய்து பின்தொடரவும்
