மத்திய அமைச்சரவை மாற்றம் குறித்த செய்திகள் தற்போது சமூக வலைத்தளங்களில் வைரலாகி வருகிறது. இது உண்மையா? அல்லது பொய்யா? என்பதை இங்கு பார்க்கலாம்.
சமூக ஊடகங்களில் சமீப நாட்களாக, மத்திய அரசியலில் பெரிய மாற்றம் வரப்போகிறது எனும் தகவல்கள் வேகமாக பரவி வருகின்றன. குறிப்பாக, பீகார் அரசின் அமைச்சர் மற்றும் பாஜக தேசிய செயல் தலைவர் பொறுப்பு வகிக்கும் நிதின் நபின், மத்திய சாலை போக்குவரத்து மற்றும் நெடுஞ்சாலை துறை அமைச்சர் நிதின் கட்கரி-யை மாற்றி அந்தப் பதவியை ஏற்கப் போவதாக செய்திகள் வெளியாகின. இதனுடன், ராஜ்யசபா நியமனங்கள் குறித்த பல பெயர்களும் பேசுபொருளாக மாறின.
இந்த தகவல்களின் உண்மை நிலையை ஆராய்ந்தால், தற்போது வரை நிதின் நபின் நிதின் கட்கரியை மாற்றி மத்திய அமைச்சராக நியமிக்கப்படுவார் எந்தவொரு அதிகாரப்பூர்வ அறிவிப்பும் மத்திய அரசு அல்லது பாஜக தலைமையிடம் இருந்து வெளியாகவில்லை. நிதின் கட்கரி தொடர்ந்து மத்திய அமைச்சராகவே வருகிறார். எனவே, இந்த மாற்றம் குறித்த செய்திகள் தற்போது ஊகங்களாகவே பார்க்கப்படுகின்றன.
ஆனால், நிதின் நபின் பற்றி பேசப்படும் தகவல்கள் முழுவதும் அடிப்படையற்றவை என்றும் சொல்ல முடியாது. பாஜக அமைப்பில் அவருக்கு சமீபத்தில் தேசிய அளவில் முக்கிய பொறுப்பு வழங்கப்பட்டுள்ளது. இதனால், எதிர்காலத்தில் அவருக்கு ராஜ்யசபா வாய்ப்பு வழங்கப்படலாம் என்ற அரசியல் கணிப்புகள் வெளியாகி வருகின்றன. இருப்பினும், இது குறித்து அதிகாரப்பூர்வ உறுதிப்படுத்தல் எதுவும் இல்லை.
Related Articles
அதேபோல், போஜ்புரி நடிகரும் பாடகருமான பவன் சிங் மற்றும் பாஜக எம்எல்ஏ நிதிஷ் மிஸ்ரா ஆகியோருக்கும் ராஜ்யசபா இடம் வழங்கப்படும் என சமூக ஊடகங்களில் பேசப்படுகிறது. ஆனால், இவை குறித்து இதுவரை நம்பகமான ஊடகங்கள் உறுதியான செய்தி வெளியிடவில்லை.
பீகாரில் நடைபெறவுள்ள ராஜ்யசபா தேர்தலில் பாஜக வலுவான நிலையில் இருப்பது உண்மை. கூட்டணி கணக்குகளின் அடிப்படையில், பாஜக அனைத்து இடங்களையும் கைப்பற்றும் வாய்ப்பு உள்ளது என்ற அரசியல் மதிப்பீடுகள் உள்ளன. ஆனால், எந்தெந்த நபர்களாக அறிவிக்கப்படுவார்கள் என்பது இன்னும் தீர்மானிக்கப்படவில்லை.
மொத்தத்தில், நிதின் நபின் மத்திய அமைச்சர் ஆகப்போகிறார், நிதின் கட்கரி மாற்றப்படுகிறார், பவன் சிங் மற்றும் நிதிஷ் மிஸ்ராவுக்கு ராஜ்யசபா இடம் கிடைக்கிறது போன்ற செய்திகள் தற்போது உறுதி செய்யப்படாத ஊகங்கள் மட்டுமே என்பது குறிப்பிடத்தக்கது.
