மதுரை என்றாலே அசைவம் உணவுகளின் பட்டியல் தான் நினைவிற்கு வரும். விதவிதமான அசைவ உணவு வகைகளை இங்கு மட்டுமே பார்க்க முடியும். அதில் தனித்துவமான சுவை கொண்டது மட்டன் சுக்கா. எல்லா ஊர்களிலும் மட்டன் சுக்கா கிடைக்கும் என்றாலும் மதுரை வரும் போதும் ஒரு முறை தவறாமல் சுவைத்து பாருங்க. அதை சுவையே தனி தான்.
மதுரை ஸ்டைல் மட்டன் சுக்கா மிகவும் பிரபலமான ஒரு உணவாகும். அசைவ பிரியர்களின் மெனுவில் பிரியாணிக்கு அடுத்த படியாக இருக்கும் ஐயிட்டம் இதுவாக தான் இருக்கும். இதன் தனித்துவமான மணமும், எளிமையான சமைக்கும் முறையும், பார்த்த உடனேயே நாக்கில் எச்சரில் ஊற வைத்து விடும். மட்டன் சுக்காவை சாதாரணமாக செய்வதை விட, ஒருமுறை பாரம்பரிய மதுரை ஸ்டைலில் செய்து சாப்பிட்டு பாருங்க. அந்த சுவை நாக்கிலேயே ஒட்டிக் கொள்ளும்.
தேவையான பொருட்கள்:
மட்டன் – 500 கிராம் (சிறிய துண்டுகளாக வெட்டியது)
பெரிய வெங்காயம் – 2 (நறுக்கியது)
பச்சை மிளகாய் – 2 (இரண்டாக வெட்டியது)
இஞ்சி-பூண்டு பேஸ்ட் – 1 டேபிள் ஸ்பூன்
தக்காளி – 1 (நறுக்கியது)
மிளகாய்த்தூள் – 1 டீஸ்பூன்
மஞ்சள்த்தூள் – 1/2 டீஸ்பூன்
மிளகு தூள் – 1 டீஸ்பூன்
சோம்புத்தூள் – 1 டீஸ்பூன்
கறிவேப்பிலை – 2 கைபிடு
மல்லித்தழை – சிறிதளவு (அலங்காரத்திற்காக)
நெய்/எண்ணெய் – 3 டேபிள் ஸ்பூன்
உப்பு – தேவையான அளவு
மசாலா பொடி தயாரிக்கும் முறை:
(இந்த மசாலா மட்டன் சுக்காவிற்கு ஒரு தனி சுவை கொடுக்கும்)
பெருங்காயம் – சிறிதளவு
மிளகு – 1 டீஸ்பூன்
சோம்பு – 1 டீஸ்பூன்
கறிவேப்பிலை – சிறிதளவு
கசகசா – 1 டீஸ்பூன்
தனியா – 1 டீஸ்பூன்
இவற்றை லேசாக வாசம் வரும் வரை வறுத்து, பொடியாக அரைத்துக் கொள்ளவும்.
பகல் உணவிற்கு பின் 10 நிமிடங்கள் நடப்பதால் என்னென்ன நன்மைகள் கிடைக்கும் ?
செய்முறை:
- ஒரு குக்கரில் மட்டன், மஞ்சள்த்தூள், உப்பு, சிறிது மிளகாய்த்தூள், 1 கப் தண்ணீர் சேர்த்து, 4 விசில் வரை விட்டு வேக வைக்கவும். நீரை வடிக்காமல் வைத்துக்கொள்ளவும்.
- ஒரு பெரிய கடாயில் எண்ணெய் அல்லது நெய் ஊற்றி சூடாக்கவும்.
- வெங்காயம், பச்சை மிளகாய், இஞ்சி-பூண்டு பேஸ்ட் சேர்த்து நன்றாக வதக்கவும்.
- தக்காளி சேர்த்து மெலிதாக வெந்தவுடன் மட்டன் சேர்க்கவும்.
- வேக வைத்த மட்டனில் மசாலா பொடியைச் சேர்த்து, கறிவேப்பிலையுடன் சேர்த்து வதக்கவும்.
- மிதமான தீயில் மட்டன் எண்ணெய் விட்டு, மென்மையாகும் வரை (சுமார் 10 நிமிடம்) வதக்கவும்.
- எண்ணெய் பிரிந்து வரும் சமயத்தில் கடைசியாக மிளகு தூள், சோம்பு தூள் சேர்த்து நன்கு கிளறவும்.
- அதற்கு மேலே கொத்தமல்லி சேர்த்து அடுப்பில் இருந்து இறக்கவும்.
அவ்வளவு தான் மதுரை ஸ்டைல் அட்டகாசமான, காரசாரமான மட்டன் சுக்கா ரெடி. சூடாக இருக்கும் போது பரிமாறவும். இதை பரோட்டா, சாதம், சப்பாத்தி, தோசை, இட்லி அல்லது சாதாரண ரொட்டியுடன் சாப்பிடலாம். பிரியாணி, தயிர் சாதத்திற்கு அசத்தலான சைட் டிஷ் இது. இதில் சேர்க்கப்பட்டுள்ள இஞ்சி, பூண்டு, மிளகு, தனியா, சோம்பு போன்றவை வாசனை, சுவைக்காக மட்டுமல்ல, எளிதில் ஜீரணமாக உதவும்.
