Bigg Boss : ரெட் டீமில் இருந்துகொண்டே ப்ளூ டீமுக்கு சப்போர்ட்.. ஜேசனின் டபுள் கேமால் பிக் பாஸ் வீட்டில் ஆரம்பமான அடுத்த பஞ்சாயத்து!

Bigg Boss Tamil 10 : பிக் பாஸ் தமிழ் சீசன் 10 நிகழ்ச்சியில் இந்த வாரம் ரெட் டீம், ப்ளூ டீம் என இரு அணிகளுக்கும் டபுள் கேம் ஆடி அதிர்ச்சி கொடுத்துள்ளார் ஜேசன். அதைப்பற்றி விரிவாக பார்க்கலாம்.

Image Credit : jiohotstar

டபுள் கேம் ஆடிய ஜேசன்

விஜய் டிவியில் ஒளிபரப்பாகி வரும் பிக் பாஸ் தமிழ் சீசன் 10 நிகழ்ச்சி நாளுக்கு நாள் பரபரப்பான கட்டத்தை எட்டி வருகிறது. மக்கள் செல்வன் விஜய் சேதுபதி தொகுத்து வழங்கும் இந்த நிகழ்ச்சி, கடந்த செப்டம்பர் மாதம் தொடங்கிய நிலையில், தற்போது 47 நாட்களைக் கடந்து ரசிகர்களின் கவனத்தை ஈர்த்து வருகிறது. ஆரம்பத்தில் 19 போட்டியாளர்களுடன் தொடங்கிய பிக் பாஸ் வீட்டில், எவிக்ஷன் மற்றும் வைல்ட் கார்டு என்ட்ரிகளுக்குப் பிறகு தற்போது 16 போட்டியாளர்கள் களத்தில் உள்ளனர்.

Image Credit : jiohotstar

சர்வைவல் டாஸ்க்கால் இரண்டாகப் பிரிந்த பிக் பாஸ் வீடு!

பிக் பாஸ் நிகழ்ச்சியின் ஏழாவது வாரம் சர்வைவல் டாஸ்க்குடன் தொடங்கியது. இதற்காக ஹவுஸ்மேட்ஸ் ரெட் டீம், ப்ளூ டீம் என இரண்டு அணிகளாகப் பிரிக்கப்பட்டனர். ஆரம்பத்தில் இருந்தே இரு அணிகளுக்கும் இடையே கடுமையான போட்டி நிலவி வந்த நிலையில், ஜேசனின் நடவடிக்கைகள் புதிய சர்ச்சைக்கு வழிவகுத்துள்ளன. ரெட் அணியில் இடம்பெற்றிருந்த ஜேசன், தனது ஆதரவு ப்ளூ அணிக்குத்தான் என வெளிப்படையாக அறிவித்தது சக போட்டியாளர்களை அதிர்ச்சியடைய வைத்தது. அவரது இந்த முடிவு ரெட் அணியில் மட்டுமின்றி ப்ளூ அணிக்குள்ளும் குழப்பத்தை ஏற்படுத்தியுள்ளது.

Image Credit : jiohotstar

ஜேசன் - வினோத் பாபு இடையே வெடித்த வாக்குவாதம்!

இந்நிலையில், தற்போது வெளியாகியுள்ள புதிய ப்ரோமோவில் ஜேசனுக்கும் வினோத் பாபுவுக்கும் இடையே காரசாரமான வாக்குவாதம் நடைபெறுவது காட்டப்பட்டுள்ளது. அனைத்து போட்டியாளர்கள் முன்னிலையிலும் தான் ரெட் அணியில் இருந்தாலும், தனது ஆதரவு ப்ளூ அணிக்குத்தான் என்பதை ஜேசன் மீண்டும் உறுதியாகத் தெரிவிக்கிறார். இதனால் இருவருக்கும் இடையேயான கருத்து வேறுபாடு மேலும் தீவிரமடைகிறது. ஏற்கெனவே ஜேசனின் செயல்பாடுகளால் அதிருப்தியில் இருந்த போட்டியாளர்கள், அவரது இந்த அறிவிப்பால் மேலும் கோபமடைந்துள்ளதாகத் தெரிகிறது.

Image Credit : jiohotstar

லக்ஷ்மி பிரியாவிடம் மனக்குமுறலை வெளிப்படுத்திய ஜேசன்!

இதற்கிடையே லக்ஷ்மி பிரியாவிடம் தனது தரப்பு நியாயத்தை ஜேசன் விளக்குவதும் ப்ரோமோவில் இடம்பெற்றுள்ளது. ஆரம்பத்தில் ரெட் அணியில் இருக்கவே தான் விரும்பியதாகவும், ஆனால் ஷமா மற்றும் வினோத் தன்னை வேண்டாம் எனக் கூறியதால்தான் அணித் தேர்வில் மாற்றம் ஏற்பட்டதாகவும் அவர் தெரிவிக்கிறார். மேலும், அங்கிருந்த கேப்டன்ஷிப் முறை தனக்குப் பிடிக்கவில்லை என்றும் லக்ஷ்மி பிரியாவிடம் தனது அதிருப்தியை வெளிப்படுத்துகிறார். ஜேசனின் இந்த விளக்கம் சக போட்டியாளர்களைச் சமாதானப்படுத்துமா அல்லது அவருக்கு எதிரான மனநிலையை மேலும் அதிகரிக்குமா என்ற எதிர்பார்ப்பு எழுந்துள்ளது.

Image Credit : jiohotstar

ஜேசன் வைத்த ட்விஸ்ட்

இந்த வார சர்வைவல் டாஸ்க் தொடங்கியதில் இருந்தே பிக் பாஸ் வீடு போர்க்களமாக மாறியுள்ளது. ப்ளூ அணியினரின் அணுகுமுறை, ரெட் அணியினர் மீது எழுந்த திருட்டுக் குற்றச்சாட்டுகள் என ஒவ்வொரு நாளும் புதிய பிரச்சனைகள் உருவாகி வருகின்றன. அதிலும் ஒரு அணியில் இருந்துகொண்டே எதிரணிக்கு ஆதரவு தெரிவிக்கும் ஜேசனின் நடவடிக்கை, அவர் டபுள் கேம் ஆடுகிறாரா என்ற கேள்வியை எழுப்பியுள்ளது.

மறுபுறம், டிடிஎஃப் வாசனுக்கு ரெட் கார்டு கிடைக்கச் செய்வது தொடர்பாகப் போட்டியாளர்கள் மத்தியில் நடைபெற்ற பேச்சுகளும் இந்த வாரத்தின் பரபரப்பை அதிகரித்துள்ளன. ஏற்கெனவே இரு அணிகளுக்கும் இடையே மோதல் உச்சத்தை எட்டியுள்ள நிலையில், தற்போது ஜேசன் விவகாரம் புதிய பஞ்சாயத்தைக் கிளப்பியுள்ளது. இந்தச் சர்ச்சை பிக் பாஸ் வீட்டில் எப்படிப்பட்ட திருப்பத்தை ஏற்படுத்தப்போகிறது என்பதைப் பொறுத்திருந்துதான் பார்க்க வேண்டும்!