இரவிலும் சூரிய வெளிச்சமா? விண்வெளியில் 50,000 செயற்கைகோள்கள்; ஸ்டார்ட்அப் நிறுவனத்தின் புரட்சி!

இரவு நேரத்திலும் சூரிய வெளிச்சத்தை விற்பனை செய்யும் நோக்கில் 'ரிப்ளெக்ட் ஆர்பிட்டல்' எனும் அமெரிக்க விண்வெளி ஸ்டார்ட்அப் நிறுவனம், விண்வெளியில் ராட்சத ஆடிகளைப் (Mirrors) பொருத்தும் பிரமாண்ட திட்டத்தைக் கையில் எடுத்துள்ளது.

Image Credit : gemini

விண்வெளி மின்சாரம் தயாரிப்பு

இரவு நேரத்திலும் சூரிய வெளிச்சத்தை மின்சாரத்தைப் போல வாங்கி விற்க முடிந்தால் எப்படி இருக்கும்? அறிவியல் புனைகதை போலத் தோன்றும் இத்தகைய ஒரு விண்வெளி திட்டத்தில் கலிஃபோர்னியாவைச் சேர்ந்த 'ரிப்ளெக்ட் ஆர்பிட்டல்' (Reflect Orbital) என்ற அமெரிக்க ஸ்டார்ட்அப் நிறுவனம் தீவிரமாக ஈடுபட்டு வருகிறது.

விண்வெளியில் ராட்சத ஆடிகளைப் (Mirrors) பொருத்தி, சூரியன் மறைந்த பிறகும் பூமியின் குறிப்பிட்ட பகுதிகளுக்குச் சூரிய வெளிச்சத்தைப் பிரதிபலிக்கச் செய்வதே இத்திட்டத்தின் முக்கிய நோக்கமாகும். இதன் மூலம் சோலார் பண்ணைகள் இரவிலும் தொடர்ந்து மின்சாரம் தயாரிக்கவும், இயற்கை பேரிடரால் பாதிக்கப்பட்ட பகுதிகளில் மீட்புப் பணிகளுக்கு வெளிச்சம் தரவும் முடியும் என அந்நிறுவனம் தெரிவிக்கிறது. தொழில்நுட்பத்தைச் சோதிப்பதற்காக, இந்தியாவின் 'ஸ்கைரூட் ஏரோஸ்பேஸ்' (Skyroot Aerospace) நிறுவனத்துடன் 2 ராக்கெட் ஏவுதல்களுக்கான ஒப்பந்தத்தில் 'ரிப்ளெக்ட் ஆர்பிட்டல்' கையெழுத்திட்டுள்ளது.

அதேவேளையில், இத்திட்டம் உலகெங்கிலும் உள்ள விஞ்ஞானிகள், வானியலாளர்கள் மற்றும் சுற்றுச்சூழல் ஆர்வலர்களிடையே கடுமையான கவலையையும் எதிர்ப்பையும் ஏற்படுத்தியுள்ளது.

Image Credit : gemini

திட்டம் என்ன?

தாழ்வான பூமி சுற்றுப்பாதையில் (Low-Earth Orbit) 18x18 மீட்டர் அளவு கொண்ட ஆடிகளை அனுப்புவது தான் ரிப்ளெக்ட் ஆர்பிட்டல் நிறுவனத்தின் திட்டம். இந்த ஆடிகளின் திசையை பூமியிலிருந்து கட்டுப்படுத்தி, வாடிக்கையாளர்கள் கட்டணம் செலுத்திய குறிப்பிட்ட பகுதிகளுக்கு இரவு நேரத்திலும் சூரிய வெளிச்சத்தைப் பிரதிபலிக்க வைக்க முடியும்.

சோதனையாக அனுப்பப்படும் முதல் ஆடி மூலம் தோராயமாக 5 கி.மீ சுற்றளவு கொண்ட பகுதிக்கு வெளிச்சம் திருப்பப்படும். இதன் முதற்கட்ட சோதனைப் பயணம் (Inaugural Mission) 2027-ஆம் ஆண்டின் 2-ம் காலாண்டில் திட்டமிடப்பட்டுள்ளது.

Image Credit : gemini

மெகா திட்டம் & ஏ.ஐ பயன்பாடு

2035-ஆம் ஆண்டிற்குள் சுமார் 50,000 செயற்கைக்கோள்களை விண்ணில் நிலைநிறுத்த அந்நிறுவனம் திட்டமிட்டுள்ளது. ஈரண்டில்-1 (Earendil-1) என்ற சோதனை செயற்கைக்கோள் மூலம் இத்திட்டம் தொடங்கப்படவுள்ளது. வாடிக்கையாளர்கள் தங்களின் மொபைல் ஆப்கள் (App) மூலமாகவே எந்த இடத்திற்கு சூரிய வெளிச்சம் வேண்டும் என்பதைத் தேர்வு செய்யும் வசதி வழங்கப்படும் என தெரிவிக்கப்பட்டுள்ளது.

தொடக்கத்தில் இந்த வெளிச்சம் நிலா வெளிச்சத்தைப் போல இருக்கும் என்றும், செயற்கைக்கோள்களின் எண்ணிக்கை அதிகரிக்கும் போது வெளிச்சத்தின் தீவிரமும் நேரமும் அதிகரிக்கும் என்றும் கூறப்பட்டுள்ளது.

Image Credit : gemini

சுற்றுச்சூழல் & வளிமண்டலச் சிக்கல்கள்

ஆகஸ்ட் 2025-இல் வெளியிடப்பட்ட சக மதிப்பாய்வு செய்யப்பட்ட (Peer-reviewed) ஆய்வின்படி, பிரதிபலிக்கப்படும் சூரிய ஒளி பூமியின் வளிமண்டலம் வழியாக வரும்போது, வளிமண்டலத்தில் உள்ள மூலக்கூறுகள் மற்றும் ஏரோசால்கள் (Aerosols) காரணமாக வெளிச்சம் சிதறடிக்கப்படும்.

இதன் காரணமாக, வெளிச்சமானது திட்டமிட்ட 5 கி.மீ பகுதியைத் தாண்டி மிக பரந்த பரப்பிற்குப் பரவும். ஆடிகள் 14 கி.மீ தூரத்திற்கு அப்பால் இருந்தாலும் கூட, பூமியின் மேற்பரப்பில் ஏற்படும் இந்தச் செயற்கை வெளிச்சம் முழு நிலவின் ஒளியை விடப் பிரகாசமாக இருக்கும். இதனால் வெளிச்சத்திற்கு ஆர்டர் செய்யாத மக்களும், இயற்கை மற்றும் வனவிலங்குகளும் இரவு நேரங்களில் பாதிக்கப்படும் அபாயம் உள்ளது.

அமெரிக்கக் கூட்டாட்சி தகவல் தொடர்பு ஆணையத்திடமிருந்து (FCC) இந்நிறுவனம் ஜூலை மாதத்தில் இதற்கான முதற்கட்ட ஒழுங்குமுறை ஒப்புதலைப் பெற்றிருந்தாலும், பல வானியலாளர்கள் மற்றும் சுற்றுச்சூழல் அமைப்புகள் இத்திட்டத்தை உடனடியாக ரத்து செய்ய வேண்டும் என வலியுறுத்தி எதிர்ப்புகளைப் பதிவு செய்து வருகின்றனர்.