- Home
- டெக்னாலஜி
- இதயத்தின் எந்த பகுதி முதலில் முதுமையடைகிறது தெரியுமா? மருத்துவ உலகையே ஆச்சரியப்படுத்திய புதிய ஆய்வு!
இதயத்தின் எந்த பகுதி முதலில் முதுமையடைகிறது தெரியுமா? மருத்துவ உலகையே ஆச்சரியப்படுத்திய புதிய ஆய்வு!
நாம் நினைத்தது போல் இதயம் ஒரே சீராக முதுமையடைவதில்லை. இதயத்தின் வால்வுகள் மற்றும் பெருந்தமனி வேர்ப் பகுதிகளிலேயே முதுமையின் அறிகுறிகள் அதிகம் குவிந்திருப்பதை விஞ்ஞானிகள் கண்டறிந்துள்ளனர்.

இதயத்தின் முதுமைப் பகுதிகள் கண்டுபிடிப்பு
இதயம் முதுமையடைவது குறித்த முந்தைய கருத்துகளுக்கு மாறாக, இதயத்தின் சில குறிப்பிட்ட பகுதிகள் மட்டுமே வயதாவதால் ஏற்படும் வீக்கத்திற்கு முக்கிய மையங்களாகச் செயல்படுவதாக விஞ்ஞானிகள் புதிய கண்டுபிடிப்பை வெளியிட்டுள்ளனர். 'தி ஜாக்சன் ஆய்வகத்தைச்' (JAX) சேர்ந்த ஆராய்ச்சியாளர்கள் நடத்திய இந்த ஆய்வு, 'ஏஜிங் செல்' (Aging Cell) இதழில் வெளியிடப்பட்டுள்ளது.
ஆய்வு வெளிச்சம் போட்டு காட்டும் உண்மைகள்
பொதுவாக வயதாகும்போது இதயத்தில் வீக்கம் அதிகரிக்கும் என்பது தெரியும் என்றாலும், அது எங்கு அதிகம் தாக்கத்தை ஏற்படுத்துகிறது என்பது முழுமையாகத் தெரியாமல் இருந்தது. தற்போது எலிகளிடம் நடத்தப்பட்ட ஆய்வில், பெருந்தமனி வால்வுகள் (Aortic valves) மற்றும் பெருந்தமனி வேர் (Aortic root) ஆகிய பகுதிகளைச் சுற்றியே வீக்கம் மற்றும் திசுக்களில் வடுக்கள் குவிந்திருப்பது தெரியவந்துள்ளது.
முந்தைய ஆய்வுகள் அனைத்தும் இடது வென்ட்ரிக்கிள் போன்ற இதயத் தசைகளையே மையமாகக் கொண்டிருந்தன. ஆனால் தசைகளைத் தாண்டி, வால்வுகள் மற்றும் பெரிய ரத்த நாளங்களும் வயதாவதற்கான சமிக்ஞைகளைக் கொண்டுள்ள சிக்கலான பகுதிகள் என்பதை இந்தக் குழு நிரூபித்துள்ளது. வயதான மேக்ரோபேஜ்கள் மற்றும் ஃபைப்ரோபிளாஸ்ட்கள் போன்ற செல்கள் இந்த குறிப்பிட்ட பகுதிகளில் தீவிரமாகச் செயல்பட்டு திசு மாற்றங்களை ஏற்படுத்துகின்றன.
ஆச்சரியமான முடிவுகள் & பாலின வேறுபாடுகள்
ஆய்வில் மற்றொரு ஆச்சரியமான விஷயம் என்னவென்றால், வயதான செல்கள் தொடர்பான சில மூலக்கூறு குறிப்பான்கள் (Markers) இளம் எலிகளின் இதயங்களிலும்கூட ஆரம்பம் முதலே இருந்துள்ளன. எனவே, இந்த குறிகாட்டிகளை மட்டுமே வைத்து ஒரு செல்லை முதிர்ந்ததாகக் கணிக்க முடியாது என்பதை இது காட்டுகிறது.
மேலும், ஆண் மற்றும் பெண் எலிகளின் இதயங்களில் முதுமை ஒரே மாதிரியான மாற்றங்களைத் தருவதில்லை. ஆண் எலிகளில் ஃபைப்ரோபிளாஸ்ட்கள் திசு வடுக்களுடன் தொடர்புடையதாக இருந்தன. பெண் எலிகளிலோ இதய வளர்ச்சி மற்றும் புரத உற்பத்திப் பாதைகளுடன் தொடர்புடையதாக இருந்தன. மனிதர்களில் மாதவிடாய் நிறுத்தத்திற்குப் பிறகு இதய நோய் வருவதற்கும், ஆண்களுக்கு அது படிப்படியாக மாறுவதற்கும் இந்த உயிரியல் வேறுபாடுகள் காரணமாக இருக்கலாம்.
பயன்கள்
மனிதர்களின் இதயத் தரவுகளுடன் ஒப்பிடும்போது, அழுத்தத்திற்கு எதிர்வினையாற்றும் சில மூலக்கூறு செயல்முறைகள் இரு இனங்களிலும் ஒன்றாக இருப்பது தெரியவந்துள்ளது. இந்த ஆய்வு இப்போதே புதிய சிகிச்சையைக் கண்டறியாவிட்டாலும், எதிர்காலத்தில் இதயச் செயல்பாடு குறைவதைத் தடுக்கவும், ஆரோக்கியமான முதுமையை அடையவும் உறுதுணையாக இருக்கும்.
ஸ்மார்ட்போன்கள் மற்றும் AI முதல் சைபர் பாதுகாப்பு, அறிவியல் முன்னேற்றங்கள் வரை — சமீபத்திய தொழில்நுட்ப (Technology News in Tamil) அப்டேட்களை தொடர்ச்சியாக பெறுங்கள். டிஜிட்டல் டிரெண்ட்ஸ் குறித்து நிபுணர்களின் கருத்துகள், விரிவான தகவல்கள் மற்றும் பிரேக்கிங் நியூஸை வழங்கும் ஒரே தளம் ஏஷ்யாநெட் தமிழ் நியூஸ்.புதிய கேஜெட் ரிலீஸ் ஆனதா? புதிய ஸ்டார்ட்அப்புகள் வந்தவையா? எதிர்காலத்தை மாற்றக்கூடிய எந்த டெக் பாலிஸி வந்துள்ளது? இவை அனைத்திற்கும் சிறு சிறு தகவல்கள் இங்கு கிடைக்கும். டெக் விளக்கக் குறிப்புகள் மற்றும் கேஜெட் டெமோ வீடியோக்களையும் நீங்கள் பார்க்கலாம்.









