வெறும் 5.2 கிராம் எடையுள்ள அரிய இரட்டைத் தலை ஆமை: இயற்கையின் அபூர்வ அதிசயம்!
அமெரிக்காவில் கண்டெடுக்கப்பட்ட 5.2 கிராம் எடையுள்ள இரட்டைத் தலை ஆமை. 2 தலைகளுக்கும் தனித்தனி குணங்கள் இருப்பது எப்படி? வியப்பூட்டும் அறிவியல் பின்னணியை பற்றி பார்போம்.
மசாசூசெட்ஸில் இரட்டைத் தலை ஆமை கண்டெடுப்பு
அமெரிக்காவின் மசாசூசெட்ஸ் மாநிலத்தில் உள்ள கேப் கோட் பகுதியில், அரிதினும் அரிய இரட்டைத் தலை கொண்ட 'டைமண்ட்பேக் டெர்ராபின்' (Diamondback terrapin) ஆமைக்குஞ்சு ஒன்று கண்டெடுக்கப்பட்டுள்ளது. இதன் எடை வெறும் 5.2 கிராம் மட்டுமே உள்ளது. வனவிலங்கு மருத்துவ நிபுணர்கள் இந்த விசித்திரமான ஆமையின் உடல்நிலையை தீவிரமாகக் கண்காணித்து வருகின்றனர். மசாசூசெட்ஸில் உள்ள 'மாஸ் ஆடபான் வெல்ஃபிளீட் பே வனவிலங்கு சரணாலயத்தின்' தன்னார்வலர்கள், கேப் கோடில் உள்ள பாதுகாக்கப்பட்ட ஆமை கூடுகள் அமைக்கும் பகுதியில் இந்த ஆமைக்குஞ்சைக் கண்டெடுத்தனர். தொடர்ந்து செப். 17 அன்று பார்ன்ஸ்டேபிள் நகரில் உள்ள கேப் வனவிலங்கு மையத்திற்கு இது கொண்டு வரப்பட்டது.
பைசெபாலி' எனும் அரிய பிறவிக் குறைபாடு
இந்த ஆமைக்கு 'பைசெபாலி' (Bicephaly) எனும் அரிய வகை மரபணு/பிறவிக் குறைபாடு இருப்பது கண்டறியப்பட்டுள்ளது. கருவில் இரட்டைக் குழந்தைகளாக உருவெடுக்கத் தொடங்கும் உயிரி, முழுமையாகப் பிரியாமல் அரைகுறையாக நின்றுவிடுவதால் இந்நிலை ஏற்படுகிறது. நியூ இங்கிலாந்து வனவிலங்கு மையங்களின் தலைமை நிர்வாக அதிகாரி (CEO) ஜாக் மெர்ட்ஸ் (Zak Mertz) கூறுகையில், "கரு பிரியும் செயல்முறை முழுமையடையாமல் போவதால், இத்தகைய விலங்குகளில் உள்ளுறுப்புகளின் அமைப்பும் ஒன்றுடன் ஒன்று பிணைந்து காணப்படலாம்" என்று விளக்கமளித்தார்.
இரு தலைகளுக்கும் தனித்தனி குணாதிசயங்கள்
ஆமையின் பாலினத்தை இன்னும் உறுதி செய்ய முடியாது என்றாலும், அது இயல்பாக நீந்துவது, உண்பது மற்றும் சிக்னல்களுக்குப் பதிலளிப்பது என ஆரோக்கியமாக உள்ளது. சுவாரசியமாக, இந்த ஆமையின் 2 தலைகளும் வெவ்வேறு குணாதிசயங்களைக் கொண்டுள்ளன. இடது பக்கத் தலை மிகவும் சுறுசுறுப்பாகவும் கோபமாகவும் இருப்பதாக மருத்துவக் குழுவினர் தெரிவிக்கின்றனர். ஆமை மையத்திற்கு வந்த முதல் நாளிலேயே அதன் இடது தலை கடிக்கத் தொடங்கிவிட்டதாக தலைமை மருத்துவ தொழில்நுட்ப வல்லுநர்கள் குறிப்பிட்டுள்ளனர்.
தொடரும் ஆய்வுகள்
கேப் கோட் பகுதியில் இரட்டைத் தலை ஆமைகள் கண்டெடுக்கப்படுவது அரிது என்றாலும், கடந்த 6 ஆண்டுகளில் கேப் வனவிலங்கு மையத்திற்கு வரும் 3-வது இரட்டைத் தலை டைமண்ட்பேக் டெர்ராபின் ஆமை இதுவாகும். 2000-களின் தொடக்கத்திலிருந்து இப்பகுதியில் இதுவரை 5 இரட்டைத் தலை ஆமைகள் கண்டறியப்பட்டுள்ளன. இந்த ஆமை சற்று பெரியதாக வளர்ந்த பிறகு, சி.டி ஸ்கேன் மற்றும் எக்ஸ்-ரே (X-ray) பரிசோதனைகள் மூலம் ஓட்டின் உள்ளே உள்ள உறுப்புகள் எவ்வாறு அமைந்துள்ளன என்பதை விரிவாக ஆய்வு செய்ய மருத்துவர்கள் திட்டமிட்டுள்ளனர்.
ஆமையின் எதிர்காலம் & சிறப்பம்சங்கள்
எதிர்கால திட்டம் - ஆமை சுயமாக வாழும் அளவிற்கு வலுப்பெற்றால் மீண்டும் இயற்கையான வாழிடத்திலேயே விடுவிக்கப்படும். இல்லையெனில், வனவிலங்கு மையத்திலேயே தொடர்ந்து பராமரிக்கப்படும்.
இயற்கை வாழிடம் - டைமண்ட்பேக் டெர்ராபின்கள் அமெரிக்காவின் வடகிழக்கு மற்றும் வளைகுடா கடலோரப் பகுதிகளில் உள்ள உவர்நீர் (Brackish water) சதுப்பு நிலங்களில் வாழ்கின்றன. இவற்றின் ஓட்டில் வைர வடிவிலான அமைப்புகள் இருப்பதால் இப்பெயர் பெற்றுள்ளன.
உணவு முறை - காடுகளில் நத்தைகள், நண்டுகள், சிப்பிகள், மீன்கள் மற்றும் பூச்சிகளை உண்ணும். தற்பொழுது வனவிலங்கு மையத்தில் இதற்கு நறுக்கப்பட்ட மீன், புழுக்கள் மற்றும் வைட்டமின் மாத்திரைகள் அடங்கிய சிறப்பு உணவு வழங்கப்பட்டு வருகிறது.
அச்சுறுத்தல்கள் - மசாசூசெட்ஸில் இவ்வகை ஆமைகள் 'அச்சுறுத்தலுக்கு உள்ளான இனமாக' அறிவிக்கப்பட்டுள்ளன. காலநிலை மாற்றத்தால் உயரும் கடல் மட்டம், நகர்மயமாக்கல், வாகன விபத்துகள் மற்றும் மீன்பிடி வலைகளில் சிக்குவது ஆகியவை இவற்றின் முதன்மை அச்சுறுத்தல்களாகும். தற்போது இந்த அரிய இரட்டைத் தலை ஆமைக்கு மருத்துவ மையத்தில் தீவிர பராமரிப்பு அளிக்கப்பட்டு வருகிறது.
ஸ்மார்ட்போன்கள் மற்றும் AI முதல் சைபர் பாதுகாப்பு, அறிவியல் முன்னேற்றங்கள் வரை — சமீபத்திய தொழில்நுட்ப (Technology News in Tamil) அப்டேட்களை தொடர்ச்சியாக பெறுங்கள். டிஜிட்டல் டிரெண்ட்ஸ் குறித்து நிபுணர்களின் கருத்துகள், விரிவான தகவல்கள் மற்றும் பிரேக்கிங் நியூஸை வழங்கும் ஒரே தளம் ஏஷ்யாநெட் தமிழ் நியூஸ்.புதிய கேஜெட் ரிலீஸ் ஆனதா? புதிய ஸ்டார்ட்அப்புகள் வந்தவையா? எதிர்காலத்தை மாற்றக்கூடிய எந்த டெக் பாலிஸி வந்துள்ளது? இவை அனைத்திற்கும் சிறு சிறு தகவல்கள் இங்கு கிடைக்கும். டெக் விளக்கக் குறிப்புகள் மற்றும் கேஜெட் டெமோ வீடியோக்களையும் நீங்கள் பார்க்கலாம்.
