பெண்களைப் போலப் பேசி பணத்தைப் பறிக்கும் மாயக்கண்ணாடி! ChatGPT-ன் மறுபக்கத்தை தோலுரித்த ஓபன் ஏஐ!

ChatGPT மூலம் நடக்கும் டேட்டிங் மோசடிகள் மற்றும் சைபர் குற்றங்கள் குறித்த ஓபன் ஏஐ  OpenAI-இன் அதிர்ச்சி அறிக்கை வெளியானது. முழு விவரங்களை இங்கே படிக்கவும்.

Image Credit : Gemini

ChatGPT செயற்கை நுண்ணறிவும் அதன் மறுபக்கமும்: OpenAI-இன் அதிர்ச்சி அறிக்கை

இன்றைய தொழில்நுட்ப உலகில் செயற்கை நுண்ணறிவு (AI) எத்தனையோ நல்ல விஷயங்களுக்குப் பயன்படுத்தப்பட்டாலும், அதன் மறுபக்கம் மிகவும் ஆபத்தானதாக மாறி வருகிறது. மக்களின் வேலைகளை எளிதாக்க உருவாக்கப்பட்ட ChatGPT-ஐ தற்போது மோசடி கும்பல்கள் தங்கள் சுயலாபத்துக்காகவும், குற்றச் செயல்களுக்காகவும் பயன்படுத்தி வருவது அம்பலமாகியுள்ளது.

சமீபத்தில், ChatGPT-ன் தாய் நிறுவனமான ஓபன் ஏஐ (OpenAI) ஒரு அதிர்ச்சியூட்டும் பாதுகாப்பு அறிக்கையை வெளியிட்டுள்ளது. அதில், சீனா மற்றும் பிற நாடுகளைச் சேர்ந்த சில மோசடி கும்பல்கள் மற்றும் சட்ட அமலாக்க அமைப்புகளுடன் தொடர்புடைய கணக்குகள் ChatGPT-ஐ தவறாகப் பயன்படுத்தியது கண்டுபிடிக்கப்பட்டு, அவை நிரந்தரமாக முடக்கப்பட்டுள்ளதாக அந்நிறுவனம் தெரிவித்துள்ளது. இதன் மூலம் இந்தியா உள்ளிட்ட நாடுகளுக்குப் பெரிய ஆபத்துகள் இருந்ததும் தெரியவந்துள்ளது.

Image Credit : Getty

காதல் வலையில் வீழ்த்தும் 'டேட்டிங் மோசடிகள்' (Romance Scams)

இந்த அறிக்கையில் மிகவும் அதிர்ச்சியளிக்கும் ஒரு விஷயம் 'டேட்டிங் மோசடிகள்' தான். இந்தோனேசியாவைச் சேர்ந்த நூற்றுக்கணக்கான ஆண்களை குறிவைத்து ஆன்லைன் மூலம் போலி காதல் வலைகள் வீசப்பட்டுள்ளன. இதற்காக, மோசடி கும்பல்கள் ChatGPT-ஐப் பயன்படுத்தி மிகவும் தத்ரூபமான மற்றும் கவர்ச்சிகரமான காதல் குறுஞ்செய்திகளை (Romantic messages) உருவாக்கியுள்ளனர்.

டேட்டிங் வெப்சைட்களில் போலியான ப்ரொஃபைல்களை உருவாக்கி, அதில் ChatGPT எழுதிக்கொடுத்த வார்த்தைகளைப் பயன்படுத்திப் பலரை ஏமாற்றியுள்ளனர். முதலில் அன்பாகப் பேசி நம்பவைத்து, பின்னர் 'எளிமையான ஆன்லைன் டாஸ்க்' மூலம் நிறைய பணம் சம்பாதிக்கலாம் என ஆசை காட்டியுள்ளனர். சில சமயங்களில் தாங்கள் ஒரு வழக்கறிஞர் எனப் பொய் சொல்லி, சட்டப்படி நடவடிக்கை எடுப்போம் என மிரட்டி பணத்தை பறித்த சம்பவங்களும் அரங்கேறியுள்ளன.

Image Credit : Getty

அரசியல் தலையீடுகள் மற்றும் சைபர் குற்றங்கள்

மோசடி வெறும் காதலோடு நிற்கவில்லை. அரசியல் தலைவர்கள் மற்றும் அரசு அதிகாரிகளைக் குறிவைத்தும் ChatGPT பயன்படுத்தப்பட்டுள்ளது. உதாரணமாக, ஜப்பானின் முதல் பெண் பிரதமரைக் குறிவைத்து சில போலிக் கணக்குகள் மூலம் ஒருங்கிணைக்கப்பட்ட பிரச்சாரங்கள் (Influence campaigns) முன்னெடுக்கப்பட்டுள்ளன. மேலும், அமெரிக்காவின் கொள்கை நிபுணர்கள் போலப் போலியாகப் பேசி, அமெரிக்க மாகாண அதிகாரிகளுக்கு இமெயில் அனுப்பித் தகவல்களைத் திரட்டவும் முயற்சி செய்துள்ளனர்.

இதுமட்டுமின்றி, ஹேக்கர்கள் மற்றும் சைபர் குற்றவாளிகள் அமெரிக்க மக்களின் தனிப்பட்ட தரவுகள், ஃபெடரல் கட்டிடங்களின் இருப்பிடங்கள் மற்றும் முகத்தை அடையாளம் காணும் மென்பொருள்கள் (Facial recognition software) எப்படி வேலை செய்கின்றன என்பது போன்ற மிகவும் சென்சிட்டிவான தகவல்களைத் திரட்ட ChatGPT-ஐப் பயன்படுத்தியதும் கண்டறியப்பட்டுள்ளது.

Image Credit : Getty

OpenAI-இன் அதிரடி நடவடிக்கையும் எச்சரிக்கையும்

இந்த விவகாரம் குறித்து எச்சரிக்கை அடைந்துள்ள OpenAI நிறுவனம், இதுபோன்ற சந்தேகத்திற்குரிய நடவடிக்கைகளில் ஈடுபட்ட அனைத்து கணக்குகளையும் அதிரடியாகத் தடை செய்துள்ளது. மேலும், அமெரிக்காவின் சட்ட அமலாக்கத்துறை அதிகாரிகளுடன் இணைந்து இந்த மோசடி நெட்வொர்க்குகளை முறியடிக்கும் பணிகளில் தீவிரமாக ஈடுபட்டு வருகிறது.

செயற்கை நுண்ணறிவு தொழில்நுட்பம் நாளுக்கு நாள் அசுர வளர்ச்சி அடைந்து வரும் நிலையில், அதனால் ஏற்படும் ஆபத்துகளும் பெரிதாகிக் கொண்டே போகின்றன. பயனர்கள் ஆன்லைனில் முன்பின் தெரியாத நபர்களிடம் பழகும்போதும், பணப் பரிவர்த்தனைகளில் ஈடுபடும்போதும் மிகவும் கவனமாக இருக்க வேண்டும் என்பதே டெக் வல்லுநர்களின் அறிவுரையாக உள்ளது.